កីឡា - ទេសចរណ៍ ទេសចរណ៍

19/07/2021 - 14:53

វិលទៅរកវ័យកុមារនៅ"ក្វេមិញ''

មិនអាចទៅទីណាឆ្ងាយបានក្នុងដំណាក់កាលជំងឺ COVID-១៩ មានការប្រែប្រួលយ៉ាងស្មុគស្មាញ ភ្ញៀវទេសចរគប្បីមកកាន់មណ្ឌលភោជនីយដ្ឋាន”ក្វេមិញ” ដើម្បីស្វែងយល់ពីលក្ខណៈអតីតកាល។

រូប៖១-២-៣ ទិដ្ឋភាពនៃភោជនីយដ្ឋាន”ក្វេមិញ”។

មណ្ឌលភោជនីយដ្ឋាន”ក្វេមិញ” តែងបានមិត្តភ័ក្ដិនិយមហៅយ៉ាងខ្លីនៅពេលបបួលគ្នាទៅផឹកកាហ្វេ៖ “ក្វេមិញ”ណ៎ា ឬផឹកកាហ្វេ “ក្វេមិញ”ចុះមិត្តអើយ “ក្វេមិញ” មានន័យថា “ភូមិយើង”។ ព្រោះហេតុនេះ គ្រាន់តែឮឈ្មោះហាងក៏ហាក់មានភាពស្និទ្ធស្នាល គួរឱ្យចូលចិត្តទៅហើយ។ ហាងឋិតនៅត្រង់មជ្ឈមណ្ឌលដែលមានមនុស្សម្នាអ៊ូអរបំផុតរបស់ក្រុងកឹងធើ ម្ល៉ោះហើយមានភ្ញៀវជាច្រើនទៅរកហាងនេះនៅអាសយដ្ឋានលេខ ៣៦ វិថីលេខ ០៣ មណ្ឌលតាំងទីលំនៅ Metro ខ័ណ្ឌនិញកេវ។ ភោជនីយដ្ឋានត្រូវបានកសាងលើផ្ទៃដីប្រមាណ ៧.០០០ម២ មានភាពទាក់ទាញភ្ញៀវដោយសារលក្ខណៈជនបទសុទ្ធសាធ។ នោះគឺផ្ទះ ៣ ល្វែង សង់តាមលំនាំស្ថាបត្យកម្មណាមបូបុរាណ មានវត្ថុះធ្វើពីស្ពាន់ ចង្កៀងប្រេងកាត តុតាំងបុរាណ រូបគំនូរ កុម្ភការភ័ណ្ឌណាមបូ។ល។ ជុំវិញផ្ទះ គឺទ្រើងឃ្លោក ទ្រើងននោង ផ្លែរណែងរណោង លើស្រះចិញ្ចឹមត្រី។ មានគំនរឧសមួយចំនួន ត្រូវបានតម្រៀបឡើងត្រង់ភ្លឹងក្បែរផ្លូវដើរ។ នៅក្បែរនោះគឺចង្រ្កានដុតឧសមួយចំនួនដែលឆេះនៅសល់កន្ទុយឧស។ បងស្រីត្រឹងធីថាញធ្វី ផ្ទះនៅសង្កាត់ហឹងឡើយ ខ័ណ្ឌនិញកេវ បានរ៉ាយរ៉ាប់៖ “រយៈពេលជាងមួយខែនេះ នាងខ្ញុំនឹកស្រុក នឹកម្ដាយ មិនទាន់ទៅបាន ពេលមកកាន់ភោជនីយដ្ឋាន”ក្វេមិញ” ធ្វើឱ្យនាងខ្ញុំនឹកស្រណោះស្ទើរស្រក់ទឹកភ្នែក។ ប្រហែលជាម្ចាស់ភោជនីយដ្ឋាន”ក្វេមិញ” ធ្លាប់ជាអ្នកនៅជនបទដែរ ទើបគាត់អាចយកទិដ្ឋភាពនៅតំបន់ជនបទណាមបូទាំងស្រុកមកទីនេះ។ គ្រាន់តែសម្លឹងឃើញទូចានធ្វើអំពីឈើសាមញ្ញ អមដោយរបស់របរធ្វើចុងភៅពីបុរាណ ដាក់នៅសំពីងសំពោង ក៏អាចដឹងថាម្ចាស់ហាងមានការប៉ិនប្រសប់យ៉ាងណា”។

មិនត្រឹមតែមានផ្ទះបុរាណ ៣ ល្វែងប៉ុណ្ណោះទេ ភោជនីយដ្ឋាន”ក្វេមិញ” នៅទាំងមានកម្រង សមុច្ច័យពិសេសនៃទសវត្សរ៍មុនៗទៀត។ នោះ គឺម៉ាញេ ម៉ាស៊ីនចាក់សំឡេងដែលនៅដំណើរការបានល្អជាង ១០០ គ្រឿង ចង្កៀងមុាំងសុងដែលនៅល្អចំនួន ២០០ គ្រឿង។ ពិសេសគឺកម្រងសមុច្ច័យម៉ាស៊ីន Kohler ៤ ជាង ១០០ គ្រឿង សម្រាប់រត់ទូកឬបូមទឹកអណ្ដូង។ល។ ម៉ាស៊ីនខ្មៅព្រីក ដ៏កញ្ចាស់នេះ គឺជាក្ដីស្រមៃរបស់មនុស្សច្រើនគ្នា កាលពី ៣០-៥០ ឆ្នាំមុន។ បងស្រីង្វៀងធីភឿង នៅឃុំញើុងអាយ ស្រុកផុងដៀង ឱ្យដឹង៖ មើលឃើញម៉ាស៊ីន Kohler ៤ ធ្វើឱ្យនាងខ្ញុំនឹកឃើញសម័យនាំផ្លែឈើទៅលក់ នៅផ្សារអណ្ដែតផុងដៀង។ ម៉ាស៊ីនកន្រ្តាក់មិនឆេះម្តងហើយម្តងទៀត ទូក ៣ សន្លឹកទឹកនាចរសាត់ទៅដល់ប្រឡាយត្រានៀង។ នាងខ្ញុំតែងនឹកស្រណោះកាលពីនៅវ័យកុមារ ខណៈពេលប្រទះឃើញឧបករណ៍ប្រើប្រាស់នៅភោជនីយដ្ឋាន”ក្វេមិញ”។ ព្រោះហេតុនោះ ទោះបីជាផឹកកាហ្វេមួយកែវក៏ដោយ នាងខ្ញុំច្រើនតែមកកាន់ទីនេះដើម្បីនឹកឃើញគ្រាកាលខ្លួនធ្លាប់ជួបលំបាក ដើម្បីកាន់តែជឿជាក់សម្រាប់បោះជំហានឈានទៅមុខទៀត”៕

ហាថាញ - ថាច់ធី

ចែករំលែកអត្ថបទ

ពាក្យគន្លឹះ