គោលនយោបាយ -ការរស់នៅ គោលនយោបាយ

23/06/2015 - 10:20

ភាពផ្លាស់ថ្មីនៅស្រុកវីធ្វី

រយៈពេលកន្លង ឃុំវីប៊ិញនិងវីធ្វីរបស់ស្រុកវីធ្វី ខេត្តហូវយ៉ាង បានរដ្ឋផ្តោតការយកចិត្តទុកដាក់វិនិយោគទុន ដូច្នេះជីវភាពមាមីងជនជាតិភាគតិចនៅលើភូមិសាស្រ្តត្រូវបានកែល្អជាបណ្តើរៗ។

ផ្លូវគមនាគមន៍ទៅកាន់ឃុំវីធ្វី។

លើភូមិសាស្រ្តស្រុកវីធ្វី ឃុំដែលមានជនរួមជាតិខ្មែររស់នៅកុះករនោះ គឺឃុំវីប៊ិញនិងវីធ្វី។ តាមប្រសាសន៍របស់លោកផាងវាំុងតុង អនុប្រធានគណៈកម្មាធិការប្រជាជនឃុំវីធ្វី ឲ្យដឹង៖ មាមីងរស់នៅទីនេះ សំខាន់គឺប្រកបរបរកសិកម្ម ម៉្លោះហើយពេលអនុវត្តបណ្តាគោលនយោបាយពិសេសរបស់រដ្ឋចំពោះជនជាតិភាគតិច គណៈកម្មាធិការប្រជាជនឃុំបានស្វែងយល់និងកសាងផែនការសមស្រប។ តួយ៉ាងដូចនៅភូមិ៦និងភូមិ៨ ដោយយល់ឃើញថាផ្លូវគមនាគមន៍តូចចង្អៀត ប្រឡាយរាក់ដូច្នេះមិនអាចនឹងនាំទឹកស្រោចស្រពដំណាំបានគ្រប់គ្រាន់នៅរដូវប្រាំង។ ផ្ទុយមកវិញ រដូវភ្លៀងរំដោះទឹកមិនទាន់ នាំឲ្យជន់លិចផ្លូវ ប៉ះពាល់ដល់ជីវភាពរស់នៅរបស់មាមីង។ ព្រោះហេតុនោះ ពេលអនុវត្តកម្មវិធី១៣៥ដំណាក់កាលII គណៈកម្មាធិការប្រជាជនឃុំបានរៀបចំបង្កើនកម្រិតផ្លូវ ជីកស្តារប្រឡាយដើម្បីទឹកជោរនាចគ្មានការរាំងស្ទះ។ ផ្តើមពីចំណែកដីជីកស្តារប្រឡាយ ឃុំឆ្លៀតយកការបង្កើនកម្រិតនិងពង្រីកផ្លូវឆ្លងកាត់ភូមិ៦និងភូមិ៨។ បងយ័ញលឹ្វង លេខាសាខាបក្សភូមិ និងជាប្រធានភូមិ៦ ឲ្យដឹង៖" ឥឡូវមាមីងធ្វើស្រែចម្ការនៅរដូវប្រាំងមានទឹកស្រោចស្រពគ្រប់គ្រាន់។ ជាងនេះទៅទៀត ពេលជីកស្តារប្រឡាយរួចរាល់ ទូកលក់ដូរទំនិញធំៗ អាចចេញចូលបានកសិផលលក់បានតម្លៃខ្ពស់ជាង មាមីងក្នុងភូមិរីករាយណាស់"។

ឃុំវីប៊ិញនិងវីធ្វី ជាឃុំជំនាញធ្វើស្រែចម្ការដូច្នេះការឧបត្ថម្ភមាមីងអភិវឌ្ឍផលិតកម្ម ត្រូវបានថ្នាក់ដឹកនាំឃុំទាំង២ផ្តោតការយកចិត្តទុកដាក់ពិសេស។ រយៈពេលកន្លង មានគ្រួសារជនជាតិខ្មែរជិត៩០នៅលើភូមិសាស្រ្តឃុំ បានឧបត្ថម្ភបុលទុនជិត៦០០លានដុង ដើម្បីវិនិយោគទុន ចិញ្ចឹមជលផល ដាំដំណាំ រួមផ្សំចិញ្ចឹមកន្ធាយ ជ្រូក ទិញម៉ាស៊ីនភ្ជួររាស់ដី និងម៉ាស៊ីនបូមទឹក។ ទន្ទឹមនឹងនោះ មានគ្រួសារប្រជាជនចំនួន៩៨ បានបុលទុនដោយមិនគិតប្រាក់ការក្នុងអំឡុងពេល៥ឆ្នាំ ដើម្បីអភិវឌ្ឍផលិតកម្ម ជាមួយនឹងទុនឲ្យបុលសរុបជិត៥០០លានដុង។ លោកគីហ៊ីវថាញ់ ប្រធានគណៈជនជាតិខេត្តហូវយ៉ាង ឲ្យដឹង៖ "បណ្តាគោលនយោបាយឧបត្ថម្ភរបស់រដ្ឋ ពង្រីកបាននូវប្រសិទ្ធភាព ជួយគ្រួសារប្រជាជនជាច្រើនចាកផុតពីភាពក្រីក្រ"។ អនុវត្តសេចក្តីសម្រេច១០២/QĐ-TTg របស់នាយករដ្ឋមន្រ្តីនៃរដ្ឋាភិបាល ស្តីពីការឧបត្ថម្ភដោយផ្ទាល់ចំពោះជនជាតិភាគតិច ឋិតក្នុងក្របខ័ណ្ឌគ្រួសារក្រីក្រនៅតំបន់លំបាកស្រុកវី ធ្វី បានឧបត្ថម្ភដោយផ្ទាល់ដល់គ្រួសារលំបាកជាច្រើន។ ព្រមជាមួយនោះ ក៏បានកសាងឈាបនដ្ឋានបោះទូកង ឧបត្ថម្ភកសាងជួសជុលវត្តខ្មែរជាច្រើន...។

អាចនិយាយបានថា អាស្រ័យគោលនយោបាយវិនិយោគទុនពិសេសរបស់រដ្ឋ សម្រាប់តំបន់មានជនជាតិភាគតិចរស់នៅបានជួយឲ្យផ្នែកហេដ្ឋារចនាសម្ព័ន្ធនៅលើភូមិសាស្រ្តឃុំវីប៊ិញនិងវីធ្វី មានការផ្លាស់ប្តូរច្រើន។ ផ្តើមពីនោះ ជីវភាពរបស់មាមីងពីមួយថ្ងៃទៅមួយថ្ងៃកាន់តែមានការរីកចម្រើន៕

ហាថាញ់-មុនី

ចែករំលែកអត្ថបទ

ពាក្យគន្លឹះ