គោលនយោបាយ -ការរស់នៅ ការរស់នៅ

08/08/2026 - 21:07

ខ្ទង់បុលដែលមិនបង្កជាបន្ទុក ប៉ុន្តែបើកនូវក្តីសង្ឃឹម

ប៉ុន្មានឆ្នាំកន្លងមកនេះ ប្រភពទុនរបស់ធនាគារគោលនយោបាយសង្គម បាននិងកំពុងពង្រីកប្រសិទ្ធភាពយ៉ាងខ្លាំងនៅពេលដែលអនុវត្តចំគោលដៅ រួមជាមួយការជួយឧបត្ថម្ភ និងការរួមដំណើរពីសំណាក់អង្គការសមាគមនានា។ ផ្តើមពីនោះ បានជួយឱ្យគ្រួសារក្រីក្រ គ្រួសារជិតក្រ និងគ្រួសារមានការលំបាកជាច្រើននៅលើភូមិឋានក្រុងកឹងធើ បង្កើនប្រាក់ចំណូល ជាជំហានរួចផុតពីភាពក្រីក្រដោយចីរភាព។

ទម្រង់ដាំពោតបារាំងនាំមកនូវប្រសិទ្ធភាពរបស់លោក គឹម សារី (កណ្តាល)
សង្កាត់វិញភឿក។

ប៉ុន្មានឆ្នាំមុន សេដ្ឋកិច្ចគ្រួសារលោក គឹម សារី នៅតំបន់បៀនយ៉ឺយ សង្កាត់វិញភឿក ជួបការលំបាកដោយខ្វះដើមទុនផលិត ។ ប៉ុន្តែអាស្រ័យបានសមាគមកសិករសង្កាត់ បង្កលក្ខណៈឱ្យបុលទុនពីធនាគារគោលនយោបាយចំនួន ២០លានដុង លោក សារី បានចាប់ផ្តើមរៀបចំកែប្រែដីឡើងវិញ ទិញគ្រាប់ពូជ និងជីដើម្បីអភិវឌ្ឍន៍ការផលិត។ ជាមួយនឹងផ្ទៃដី ១.០០០ ម៉ែត្រការ៉េ លោកបានដាំឆ្លាស់ស់រដូវនូវដំណាំរួមផ្សំផ្សេងៗដូចជា៖ ជីរវ៉ាន់ស៊ុយ, ពោតបារាំង, សាឡាត់... ចំនួន ៤ រដូវ/ឆ្នាំ។ តាមលោក សារី ការដាំដំណាំរួមផ្សំថ្វីដ្បិតតែហត់នឿយដោយសារបង់កម្លាំងថែទាំ ប៉ុន្តែផ្ទុយមកវិញគឺទទួលបានប្រាក់ចំណូលស្ថិរភាព។ ដើម្បីលក់បានតម្លៃខ្ពស់ ក៏ដូចជាទទួលបានជោគជ័យក្នុងដូវដំណាំ កសិករត្រូវចេះក្តាប់យកតម្រូវការទីផ្សារ។ ប្រសិនបើដាំបន្លែខុសរដូវ នឹងផ្តល់ប្រាក់ចំណូលខ្ពស់ជាង ប៉ុន្តែទាមទារកសិករត្រូវចំណាយកម្លាំងថែទាំច្រើនជាង... ជាមួយនឹងតម្លៃលក់ស្ថិរភាព បន្ទាប់ពីទូទាត់ការចំណាយរួច ក្នុងមួយរដូវៗលោក សារី នៅចំណេញប្រមាណ ២០ លានដុង។ លោក សារី បានចែករំលែក៖ “អាស្រ័យដោយប្រភពទុនអនុគ្រោះរបស់ធនាគារគោលនយោបាយ ទើបគ្រួសារខ្ញុំមានលក្ខណៈអភិវឌ្ឍន៍ការផលិត មានប្រាក់ចំណូលបន្ថែម លំនឹងជីវភាព”។

ទម្រង់ចិញ្ចឹមគោទឹកដោះផ្តើមពីប្រភពទុនធនាគារគោលនយោបាយ បានជួយគ្រួសារអ្នកមីង ថាច់ ធីសាផល ឃុំមីហឿង លំនឹងជីវភាព។

ដោយសារភាពឧស្សាហ៍ព្យាយាម រួមជាមួយការប្រើប្រាស់ដើមទុនចំគោលដៅ ទម្រង់ចិញ្ចឹមគោទឹកដោះរបស់គ្រួសារអ្នកមីង ថាច់ ធីសាផល ភូមិដាយអ៊ុយ ឃុំមីហឿង មួយថ្ងៃកាន់តែរីកចម្រើន ។ ផ្តើមពីគោពូជ ០១ ក្បាលដំបូងនៅឆ្នាំ ២០០៦ បន្ទាប់ពីលក់គោទឹកដោះចំនួន ១០ ក្បាល និងកូនគោចំនួន ៣០ ក្បាល រហូតមកទល់ពេលនេះ គ្រួសារអ្នកមីងរក្សាបានគោចំនួន ១៤ ក្បាល ក្នុងនោះមាន ០៥ ក្បាលកំពុងផ្តល់ទឹកដោះ មធ្យមទទួលបានប្រមាណ ៧០ គីឡូក្រាមទឹកដោះ/ថ្ងៃ លក់ក្នុងតម្លៃ ១៤.០០០ ដុង/គីឡូក្រាម។ អ្នកមីង សាផល បានឱ្យដឹង៖ “ទម្រង់ចិញ្ចឹមគោទឹកដោះបាននាំមកនូវប្រាក់ចំណូលគ្រួសារខ្ញុំប្រមាណ ២០០ លានដុង/ឆ្នាំ បន្ទាប់ពីទូទាត់ការចំណាយរួច។ អាស្រ័យដោយទម្រង់ចិញ្ចឹមគោទឹកដោះផ្តើមពីប្រភពទុនធនាគារគោលនយោបាយ ទើបគ្រួសារខ្ញុំមានជីវភាពលំនឹងដូចសព្វថ្ងៃ។ ខ្ញុំសង្ឃឹមថានាពេលខាងមុខ គ្រួសារនឹងបន្តបានខិតជិតប្រភពទុនបន្ថែមទៀត ដើម្បីពង្រីកទ្រុងចិញ្ចឹម បង្កើនប្រាក់ចំណូល និងឈានឡើងធូរធារ”។

តាមលោក ដាំង តឹងយ៉ាង អនុប្រធានសមាគមកសិករក្រុងកឹងធើ បានឱ្យដឹង ជាក់ស្តែងបង្ហាញឱ្យឃើញថា ប្រភពទុនអនុគ្រោះរបស់ធនាគារគោលនយោបាយ មិនត្រឹមតែជួយឱ្យប្រជាជនមានលក្ខណៈវិនិយោគអភិវឌ្ឍន៍សេដ្ឋកិច្ចប៉ុណ្ណោះទេ ប៉ុន្តែថែមទាំងបង្កកម្លាំងចលករឱ្យគ្រួសារនានាហានប្តូរផ្លាស់វិធីសាស្ត្រផលិត បង្កើនប្រាក់ចំណូល ជាជំហានធ្វើមាននៅស្រុកកំណើតរបស់ខ្លួន ។ ផ្តើមពីដើមទុនដែលបានចែកបុលចំមុខសញ្ញា និងចំទិសដៅ បានលេចចេញនូវទម្រង់សេដ្ឋកិច្ចមានប្រសិទ្ធភាពជាច្រើន រួមចំណែកយ៉ាងសកម្មក្នុងការងារបន្ថយភាពក្រីក្រប្រកបដោយចីរភាព កសាងជនបទថ្មី និងជំរុញអភិវឌ្ឍសេដ្ឋកិច្ច - សង្គមនៅភូមិភាគ៕

ថាញ់វ៉ាង - វ៉ាន់តឹន

ចែករំលែកអត្ថបទ

ពាក្យគន្លឹះ