គោលនយោបាយ -ការរស់នៅ ការរស់នៅ

08/08/2026 - 21:07

រួមដំណើរជាមួយកសិករខ្មែរធ្វើមាន

តាំងពីការឧបត្ថម្ភបុលទុន ផ្ទេរជូនបច្ចេកទេស រហូតដល់ការតភ្ជាប់លក់ចេញកសិផល សហករណ៍សាមគ្គីនិងអភិវឌ្ឍន៍ នៅឃុំញូយ៉ា ទីក្រុងកឹងធើ បានក្លាយជាទីបង្អែកដ៏រឹងមាំរបស់កសិករខ្មែរជាច្រើនរូប។ មិនត្រឹមតែជួយឱ្យសមាជិកមោះមុតផ្លាស់ប្តូររបៀបផលិត លើកកម្ពស់ប្រាក់ចំណូលប៉ុណ្ណោះទេ សហករណ៍នៅទាំងកសាងខ្សែសង្វាក់តភ្ជាប់ការលក់ចេញស្រូវដោយចីរភាព បង្កជាកម្លាំងចលករដើម្បីឱ្យសមាជិកលំនឹងចិត្តក្នុងការវិនិយោគ ឈានឡើងចាកផុតពីភាពក្រីក្រ និងធ្វើមាននៅលើទឹកដីកំណើតរបស់ខ្លួនជាបណ្តើរៗ។

ទម្រង់ដាំម្ទេសមានប្រសិទ្ធភាពរបស់សមាជិកសហករណ៍សាមគ្គីនិងអភិវឌ្ឍន៍។

នៅឆ្នាំ ២០២២ ដោយឃើញប្រជាជនខ្មែរជាច្រើនគ្រួសារនៅតែមានទម្រង់ផលិតតូចតាច ខ្វះដើមទុនវិនិយោគ មិនទាន់មោះមុតអនុវត្តវិទ្យាសាស្ត្របច្ចេកទេសជឿនលឿន ធ្វើឱ្យទិន្នផលទាប ប្រាក់ចំណូលមិនស្ថិរភាព។ ហេតុដូច្នេះ សមាគមកសិករឃុំញូយ៉ា បានសហការជាមួយសាខាសមាគមកសិករភូមិព្រែកអណ្ដើក ចលនាប្រជាជនចូលរួមនិងបង្កើតសហករណ៍សាមគ្គីនិងអភិវឌ្ឍន៍។ កាលពីដំបូង សហករណ៍មានសមាជិក ៣៣ នាក់ ជាមួយផ្ទៃដីផលិតស្រូវនិងដំណាំរួមផ្សំជាង ៩០ ហិកតា ដោយលោកហាងខុម ធ្វើជានាយក។ មកដល់សព្វថ្ងៃ សហករណ៍មានសមាជិកដល់ ៤៦ នាក់ ជាមួយផ្ទៃដីផលិតស្រូវ ១៤០ ហិកតា និងដំណាំរួមផ្សំ ៦០ ហិកតា។ តាមលោកស្រី ង្វៀងហុងក្វាង ប្រធានសមាគមកសិករឃុំញូយ៉ា នេះជាសហករណ៍តែមួយគត់របស់ឃុំដែលមានសមាជិក ១០០% ជាជនជាតិខ្មែរ។ ដើម្បីឱ្យសហករណ៍សកម្មភាពមានប្រសិទ្ធភាព សមាគមបានឧបត្ថម្ភឱ្យសមាជិក ១៧ នាក់ បុលប្រាក់ ៥០០ លានដុងពីប្រភពមូលនិធិឧបត្ថម្ភកសិករ។ ក្រៅពីនោះ សមាជិកទាំងឡាយនៅទាំងបានសមាគមណែនាំឱ្យបុលទុនពីធនាគារគោលនយោបាយសង្គម ដើម្បីអភិវឌ្ឍការផលិត ព្រមទាំងចាត់តាំងបណ្តាវគ្គហ្វឹកហ្វឺនអំពីការដាំដំណាំរួមផ្សំ ផលិតស្រូវគុណភាពខ្ពស់។ អាស្រ័យហេតុនោះ បណ្តាសមាជិកបានមោះមុតអនុវត្តវិទ្យាសាស្ត្របច្ចេកទេសជឿនលឿនក្នុងការផលិត ប្រើប្រាស់ជី ថ្នាំការពាររុក្ខជាតិសមស្រប ដំឡើងប្រព័ន្ធស្រោចស្រពប្រិតសំចៃទឹក និងដាំដំណាំឆ្លាស់វេនសមស្រប... រួមចំណែកបង្កើនទិន្នផល គុណភាពកសិផល នាំមកនូវប្រសិទ្ធភាពសេដ្ឋកិច្ចយ៉ាងច្បាស់ក្រឡែត។

កំពុងប្រមូលផលត្រសក់នៅចម្ការ លោកស៊ើងសង្ហា សមាជិកសហករណ៍ បានឱ្យដឹងដោយក្តីរីករាយ៖ "អាស្រ័យបានចូលរួមសហករណ៍ ខ្ញុំបានបុលដើមទុនអនុគ្រោះដើម្បីវិនិយោគដាំដំណាំរួមផ្សំដោយប្រើផ្ទាំងគម្រប់កសិកម្ម ដំឡើងប្រព័ន្ធទុយោស្រោចស្រពស្វ័យប្រវត្តិ ដូច្នេះមិនបាច់រែកទឹកស្រោចស្រពលំបាកដូចមុនទៀត។ បច្ចុប្បន្ន ត្រសក់ ៣ កុង ខ្ញុំប្រមូលផលជារៀងរាល់ថ្ងៃបានប្រមាណ ៥០០ គីឡូក្រាម លក់ក្នុងតម្លៃពី ៥.០០០ ដល់ ៦.០០០ ដុងក្នុងមួយគីឡូក្រាម។ រយៈពេលប្រមូលផលត្រសក់អូសបន្លាយប្រមាណ ១ ខែ បន្ទាប់ពីទូទាត់ចំណាយរួច ខ្ញុំនៅចំណេញប្រមាណ ៣០ លានដុង"។ ដោយការឧបត្ថម្ភរបស់សហករណ៍ លោកសង្ហា បានផលិតស្រូវ ៣ ហិកតា និងបានតភ្ជាប់ចុះកិច្ចសន្យាប្រមូលទិញជាមួយអាជីវកម្ម។ មានច្រកចេញលំនឹងជួយឱ្យលោកលំនឹងចិត្តក្នុងការផលិត មោះមុតបង្កបង្កើនផលពូជស្រូវគុណភាពខ្ពស់ លើកកម្ពស់ទិន្នផលនិងប្រាក់ចំណេញ។

លោកស៊ើងសង្ហា សមាជិកសហករណ៍កំពុងប្រមូលផលត្រសក់។

មិនត្រឹមតែពង្រីកប្រសិទ្ធភាពក្នុងការដាំដំណាំរួមផ្សំ សហករណ៍នៅទាំងកសាងខ្សែសង្វាក់ចងសម្ព័ន្ធផលិតស្រូវជាមួយអាជីវកម្ម។ បច្ចុប្បន្ន សហករណ៍បានចងសម្ព័ន្ធជាមួយក្រុមហ៊ុន ង្វៀងហ៊ូវដាំង ប្រមូលទិញស្រូវលើផ្ទៃដីជាង ៣០ ហិកតាជូនសមាជិក។ ក្រៅពីនោះ សមាជិកនៅទាំងបានណែនាំពីរបៀបបង្កបង្កើនផលជឿនលឿន បន្ថយចំណាយដើមទុន បង្កើនទិន្នផល និងគុណភាពគ្រាប់ស្រូវ។ បណ្តាពូជស្រូវដូចជា OM៥៧៦, ដៃធើម ៨, OM១៨… សុទ្ធតែបានផ្គត់ផ្គង់ពូជធានាគុណភាពក្នុងតម្លៃសមរម្យ។ ការចុះកិច្ចសន្យាធានាប្រមូលទិញកសិផលបានជួយឱ្យកសិករលំនឹងចិត្តក្នុងការផលិត បន្ថយស្ថានភាពស្រូវបានផលតែតម្លៃចុះថោក។ បងយឿងយៀង សមាជិកសហករណ៍ បានឱ្យដឹង៖ "ប្រការដែលល្អ គឺពេលចូលរួមសហករណ៍តែងមានអ្នករួមដំណើរ។ ចាប់ពីដំណាក់កាលជ្រើសរើសពូជ រៀបចំដី ថែទាំ រហូតដល់ការទប់ស្កាត់ដង្កូវនិងជំងឺ សុទ្ធតែបានណែនាំជាក់ស្តែង ហើយច្រកចេញក៏ស្ថិរភាព។ អាស្រ័យហេតុនោះ ខ្ញុំលំនឹងចិត្តក្នុងការផលិត ទិន្នផលស្រូវខ្ពស់ជាង ចំណាយថយចុះ ប្រាក់ចំណេញកើនឡើង ជីវភាពកាន់តែធូរធារ"។

ទន្ទឹមនឹងឧបត្ថម្ភក្នុងការផលិត ជារៀងរាល់ខែ សមាជិកទាំងអស់នៅទាំងរក្សាការប្រជុំតាមកាលកំណត់ ចែករំលែកបទពិសោធន៍ ផ្លាស់ប្តូរបច្ចេកទេស រួមគ្នាដោះស្រាយការលំបាក រួមចំណែកពង្រឹងស្មារតីសាមគ្គី ជិតស្និទ្ធ។ លោកហាងខុម នាយកសហករណ៍ បានឱ្យដឹង៖ "នាពេលខាងមុខ សហករណ៍នឹងបន្តពង្រីកផ្ទៃដីចងសម្ព័ន្ធផលិតស្រូវ ជំរុញការអនុវត្តវិទ្យាសាស្ត្របច្ចេកទេស យន្តូបនីយកម្មក្នុងការផលិត ផ្លាស់ប្តូរឌីជីថលក្នុងការគ្រប់គ្រងការផលិត បង្កើនការហ្វឹកហ្វឺន ជួយឧបត្ថម្ភសមាជិកកៀកជិតប្រភពដើមទុនអនុគ្រោះ និងពង្រីកទីផ្សារលក់ចេញ។ ជាក់ស្តែងបង្ហាញឱ្យឃើញថា ពេលកសិករខ្មែរបានឧបត្ថម្ភដើមទុន បច្ចេកទេសទាន់ពេលវេលា និងមានច្រកចេញស្ថិរភាព ពួកគាត់នឹងមោះមុតវិនិយោគ ផ្លាស់ប្តូររបៀបផលិត និងធ្វើឱ្យមានជាបណ្តើរៗ។ សហករណ៍បន្តពង្រីកតួនាទីជាស្ពានតភ្ជាប់រវាងកសិករជាមួយអាជីវកម្ម វិទ្យាសាស្ត្របច្ចេកទេសនិងទីផ្សារ"។

វាលស្រែពណ៌បៃតងនាថ្ងៃនេះ ជាភស្តុតាងអំពីប្រសិទ្ធភាពនៃទម្រង់សេដ្ឋកិច្ចសមូហភាពក្នុងការអភិវឌ្ឍកសិកម្ម។ ជាមួយរបៀបធ្វើបត់បែន ដោយយកផលប្រយោជន៍សមាជិកធ្វើជាស្នូល សហករណ៍សាមគ្គីនិងអភិវឌ្ឍន៍នៅភូមិព្រែកអណ្ដើក មិនត្រឹមតែជួយឱ្យកសិករខ្មែរជាច្រើនរូបបង្កើនប្រាក់ចំណូល ឈានឡើងចាកភាពក្រីក្រនិងធ្វើមានប៉ុណ្ណោះទេ ថែមទាំងរួមចំណែកកសាងប្រព័ន្ធផលិតកសិកម្មទំនើប ប្រកបដោយចីរភាព លើកកម្ពស់តម្លៃកសិផលនិងជំរុញការអភិវឌ្ឍសេដ្ឋកិច្ចជនបទទៀតផង៕

យ្វីអាញ - សុផន

ចែករំលែកអត្ថបទ

ពាក្យគន្លឹះ