ព្រឹត្តិការណ៍ - នយោបាយ ព្រឹត្តិការណ៍

24/07/2026 - 21:39

យុវជន វិញភឿក ឈានមុខក្នុងការកសាងសហគមន៍ឌីជីថលតាមរយៈទម្រង់ជិតដិតជាមួយប្រជាជន

ការផ្លាស់ប្តូរឌីជីថលសម្រេចបានជោគជ័យលុះត្រាតែប្រជាជនអាចចូលប្រើប្រាស់ និងប្រើប្រាស់បច្ចេកវិទ្យាយ៉ាងងាយស្រួលក្នុងជីវភាពប្រចាំថ្ងៃ។ ផ្អែកលើការយល់ដឹងនេះ នាពេលកន្លង យុវជនសង្កាត់វិញភឿក ទីក្រុងកឹងធើ បានអនុវត្តទម្រង់ជាក់ស្តែង និងជិតដិតជាមួយប្រជាជនជាច្រើន រួមចំណែកនាំយកបច្ចេកវិទ្យាឌីជីថលចូលក្នុងជីវភាពរស់នៅ ព្រមទាំងបង្កើតទម្លាប់ និងជំនាញឌីជីថលក្នុងសហគមន៍ជាបណ្តើរៗ។

សម្ព័ន្ធយុវជនចូលរួមយ៉ាងសកម្មក្នុងការជំនួយប្រជាជនធ្វើបែបបទរដ្ឋបាល។

លេចធ្លោជាងគេក្នុងចំណោមនោះ គឺទម្រង់ “លំហឌីជីថល - សម្ព័ន្ធយុវជន យុវជនស្ម័គ្រចិត្តដើម្បីសហគមន៍ឌីជីថល”។ ដោយរបៀបធ្វើច្នៃប្រតិដ្ឋ និងយកប្រជាជនជាស្នូល ទម្រង់នេះបានក្លាយជាទីតាំងស្និទ្ធស្នាល ជាកន្លែងដែលប្រជាជន ជាពិសេសគឺជនជាតិភាគតិច ទទួលបានការណែនាំដោយផ្ទាល់ បានសាកល្បង និងប្រើប្រាស់នូវភាពងាយស្រួលនៃឌីជីថល។

នៅ “លំហឌីជីថល” កម្លាំងសម្ព័ន្ធយុវជន និងយុវជនដើរតួនាទីជា “ស្ពានតភ្ជាប់” ជួយប្រជាជនដោយអស់ពីចិត្តក្នុងការអនុវត្តសេវារដ្ឋតាមប្រព័ន្ធអនឡាញ ដំឡើង និងប្រើប្រាស់គណនីអត្តសញ្ញាណប័ណ្ណអេឡិចត្រូនិក VNeID ការទូទាត់មិនប្រើប្រាស់ប្រាក់មុខ ចុះឈ្មោះពិនិត្យ ព្យាបាលជំងឺអនឡាញ ព្រមទាំងទាញយកផលប្រយោជន៍ពីកម្មវិធីឌីជីថលនានា ដើម្បីបម្រើការសិក្សា ផលិត និងជីវភាពរស់នៅ។ ទន្ទឹមនឹងនោះ យុវជននៅទាំងឃោសនា ណែនាំជំនាញធានាសុវត្ថិភាពព័ត៌មានលើលំហអ៊ីនធឺណិត ជួយប្រជាជនកំណត់ដឹងពីឧបាយកលបោកប្រាស់ប្រើបច្ចេកវិទ្យាជាន់ខ្ពស់។ លើសពីនេះ ទម្រង់មិនបង្អង់ត្រឹមការផ្សព្វផ្សាយជំនាញមូលដ្ឋានប៉ុណ្ណោះទេ ថែមទាំងណែនាំប្រជាជនបានកៀកជិតបណ្តើរៗ ជាមួយកម្មវិធីបញ្ញាសិប្បនិម្មិត (AI) ក្នុងការស្វែងរកព័ត៌មាន ជំនួយដល់ការសិក្សា រៀបរៀងឯកសារ និងលើកកម្ពស់ប្រសិទ្ធភាពការងារ។ តាមរយៈនោះ រួមចំណែកផ្លាស់ប្តូរការគិត ជួយប្រជាជនម្ចាស់ការជាងក្នុងការអនុវត្តបច្ចេកវិទ្យា ចូលក្នុងជីវភាពរស់នៅ។

ទន្ទឹមនឹងនោះ ទម្រង់ “ថ្ងៃព្រហស្បតិ៍មិនសរសេរ” ដែលសម្ព័ន្ធយុវជនសង្កាត់បានសហការជាមួយមជ្ឈមណ្ឌលបម្រើសេវារដ្ឋបាលរដ្ឋ អនុវត្តចាប់ពីខែមីនា ឆ្នាំ២០២៦ ក៏ទទួលបានប្រសិទ្ធភាពជាក់ស្តែងផងដែរ។ រៀងរាល់ថ្ងៃព្រហស្បតិ៍ សម្ព័ន្ធយុវជន យុវជនស្ម័គ្រចិត្តបានចុះទៅជួយប្រជាជនដោយផ្ទាល់ ក្នុងការប្រកាសឯកសារ ធ្វើបែបបទរដ្ឋបាលតាមប្រព័ន្ធអនឡាញ សកម្មភាពបើកគណនី VNeID និងការទូទាត់តម្លៃសេវា ឬកម្រៃផ្សេងៗតាមប្រព័ន្ធអេឡិចត្រូនិក។ តាមរយៈនោះ បានកាត់បន្ថយការប្រើប្រាស់ក្រដាសស្នាម និងលើកកម្ពស់ប្រសិទ្ធភាពនៃការកែទម្រង់រដ្ឋបាល។ បងស្រីគឹមធីហ្វៀង នៅមណ្ឌលតាវង បានចែករំលែក៖ “ថ្ងៃនេះខ្ញុំធ្វើលិខិតកំណើតឱ្យកូន ដោយសារធ្វើលើកដំបូង ដូច្នេះនៅមានការអល់អែក។ អាស្រ័យបានក្មួយៗយុវជនណែនាំយ៉ាងយកចិត្តទុកដាក់ ខ្ញុំបានដឹងពីវិធីចុះឈ្មោះ និងដាក់ឯកសារតាមអនឡាញយ៉ាងឆាប់រហ័ស”។

ក្រុម “ប្រជាសិក្សាឌីជីថល” ចុះទៅដល់ផ្ទះនីមួយៗ ណែនាំប្រជាជនឱ្យប្រើប្រាស់ទូរស័ព្ទឆ្លាតវៃ។

ជាពិសេស ស្មារតីឈានមុខរបស់យុវជន នៅទាំងបានបង្ហាញយ៉ាងច្បាស់តាមរយៈក្រុម “ប្រជាសិក្សាឌីជីថល”។ ជាមួយនឹងទិសស្លោក “ចុះទៅគ្រប់ច្រកល្ហក គ្រប់ផ្ទះ ដើម្បីណែនាំដល់គ្រប់រូប” កងកម្លាំងសម្ព័ន្ធយុវជនមិនខ្លាចនឿយហត់ បានចុះទៅដល់ផ្ទះប្រជាជន ដើម្បីជួយដំឡើងកម្មវិធី និងណែនាំពីរបៀបប្រើប្រាស់សេវាឌីជីថល នៅកន្លែងរស់នៅតែម្តង។ មុខសញ្ញាអាទិភាពដូចជា អ្នកវ័យចាស់ ស្ត្រី គ្រួសារអាជីវកម្មតូច ទទួលបានការជួយណែនាំដោយអស់ពីចិត្ត ដើម្បីឱ្យពួកគាត់បានស៊ាំនឹងបច្ចេកវិទ្យាបន្តិចម្តងៗ។

ចំណុចលេចធ្លោមួយទៀត គឺទម្រង់ “ដងផ្លូវកាត់បន្ថយប្រើប្រាស់ប្រាក់មុខ” ដែលបានអនុវត្តនៅផ្សារវិញថាញ់ (ផ្សារអុងថូង) និងផ្សារដើមអំពិល។ ត្រឹមតែពីរថ្ងៃបំផុសចលនា គ្រួសារអាជីវកម្មជាង ៨០% បានបើកគណនីធនាគារ ដំឡើងកូដ QR ឬឧបករណ៍ទូទាត់អេឡិចត្រូនិក។ ប្រការនេះមិនត្រឹមតែបង្កើតភាពងាយស្រួលក្នុងការទូទាត់ប៉ុណ្ណោះទេ ថែមទាំងរួមចំណែកបង្កទម្លាប់ប្រើប្រាស់ដោយលក្ខណៈស៊ីវិល័យ និងទំនើបនៅក្នុងសហគមន៍។ លោកហ្វិញមិញតាយ សមាជិកយុវជនសង្កាត់ បានឱ្យដឹង៖ “ពេលណែនាំប្រជាជនដោយផ្ទាល់ ជាពិសេសគឺអ្នកវ័យចាស់ យើងខ្ញុំបានកំណត់ថាត្រូវតែមានចិត្តអត់ធ្មត់ កាន់ដៃបង្ហាញការងារបន្តិចម្តងៗ។ ប្រជាជនម្នាក់ៗចេះប្រើប្រាស់កម្មវិធីឌីជីថលបានស្ទាត់ជំនាញ គឺបន្ថែមផ្នែកដ៏សំខាន់មួយទៀត ក្នុងដំណើរការផ្លាស់ប្ដូរឌីជីថល។ ប្រការនោះក៏ជួយឱ្យយើងខ្ញុំមើលឃើញច្បាស់ពីអត្ថន័យនៃភារកិច្ចដែលយើងខ្ញុំកំពុងធ្វើ”។

បំផុសចលនាប្រជាជនប្រើប្រាស់កូដ QR ក្នុងការទូទាត់មិនប្រើប្រាស់ប្រាក់មុខ។

មិនត្រឹមតែជួយប្រជាជនប៉ុណ្ណោះទេ ទម្រង់ទាំងនេះថែមទាំងរួមចំណែកបង្កើតការផ្លាស់ប្តូរយ៉ាងច្បាស់ក្រឡែត ក្នុងសកម្មភាពរបស់រដ្ឋអំណាចមូលដ្ឋានទៀតផង។ ក្នុងរយៈពេល ៦ខែដើមឆ្នាំ២០២៦ មជ្ឈមណ្ឌលបម្រើសេវារដ្ឋបាលរដ្ឋសង្កាត់វិញភឿក បានទទួលឯកសារចំនួន ២.៩៩៧ ច្បាប់ ក្នុងនោះមាន ៩៩,៨០% ត្រូវបានអនុវត្តតាមប្រព័ន្ធអនឡាញ។ មានឯកសារចំនួន ២.៨៨១ ច្បាប់ត្រូវបានដោះស្រាយ ដោយមាន ៩៩,៧២% ដោះស្រាយមុនកាលកំណត់; អត្រាឌីជីថលភាវូបនីយកម្មសមាសភាពឯកសារសម្រេចបាន ៩៧,៩១%, ឌីជីថលភាវូបនីយកម្មលទ្ធផលសម្រេចបាន ៩៧,២៩% ការទូទាត់តាមអនឡាញសម្រេច ៨៦,៧៤% ហើយកម្រិតពេញចិត្តរបស់ប្រជាជននិងអាជីវកម្មសម្រេចបាន ១០០%។

លោកត្រឹងហ្វាងញ៉ូ លេខាសម្ព័ន្ធយុវជនសង្កាត់វិញភឿក បានឱ្យដឹង៖ “ទិសដៅនៃទម្រង់ទាំងនេះ មិនឈប់ត្រឹមការជួយឱ្យប្រជាជនចេះប្រើប្រាស់បច្ចេកវិទ្យាប៉ុណ្ណោះទេ អ្វីដែលសំខាន់ជាងនេះ គឺបង្កទំនុកចិត្ត ដើម្បីឱ្យអ្នករាល់គ្នាម្ចាស់ការចូលរួមក្នុងដំណើរការផ្លាស់ប្ដូរឌីជីថល។ នាពេលខាងមុខ សម្ព័ន្ធយុវជនសង្កាត់នឹងបន្តសហការជាមួយបណ្តាផ្នែក អង្គការមហាជន និងអាជីវកម្មបច្ចេកវិទ្យា ដើម្បីរៀបចំថ្នាក់បំប៉នជំនាញឌីជីថលបន្ថែមទៀត ណែនាំការអនុវត្ត AI ពង្រីកការជំនួយលើសេវារដ្ឋតាមប្រព័ន្ធអនឡាញ និងពង្រឹងការឃោសនាស្តីពីសុវត្ថិភាពព័ត៌មានបណ្តាញ នៅតាមតំបន់ប្រជាជនរស់នៅ”។

ការផ្លាស់ប្ដូរឌីជីថល មិនមែនជាទស្សនៈដ៏ឆ្ងាយទៀតទេ នៅពេលដែលប្រជាជនម្នាក់ៗអាចប្រើប្រាស់ភាពងាយស្រួលនៃបច្ចេកវិទ្យាបានស្ទាត់ជំនាញក្នុងជីវភាពរស់នៅប្រចាំថ្ងៃ។ តាំងពីការងារជាក់លាក់ ជាក់ស្តែង និងមានប្រយោជន៍ គឺយុវជនសង្កាត់វិញភឿក កំពុងរួមចំណែកកសាងសហគមន៍ឌីជីថលទំនើប ស៊ីវិល័យ និងអភិវឌ្ឍន៍ប្រកបដោយចីរភាពជាបណ្តើរៗ៕

ហុងទើ - ថាច់ធី

ចែករំលែកអត្ថបទ

ពាក្យគន្លឹះ