មហាសាមគ្គីជនជាតិ គំរូក្នុងសហគមន៍

26/06/2026 - 22:17

ប្រធានគណៈប្រជាជនភូមិមានប្រិយភាព និងអស់ពីចិត្តចំពោះជនរួមជាតិខ្មែរ

ជាមួយនឹងស្មារតីទទួលខុសត្រូវនិងអស់ពីចិត្តគិតគូរដល់ជីវភាពប្រជាជន លោកតាំងរ៉ូគ្វីសា ប្រធានគណៈប្រជាជនភូមិបឹងទ្រៀត ឃុំលីវទូ ទីក្រុងកឹងធើ បានរួមចំណែកយ៉ាងសំខាន់ក្នុងបន្ថយភាពក្រីក្រ កសាងជីវភាពវប្បធម៌ ព្រមទាំងលើកកម្ពស់ការយល់ដឹង និងគុណភាពរស់នៅជូនជនរួមជាតិខ្មែរនៅភូមិភាគ។

លោកតាំងរ៉ូគ្វីសា (អង្គុយកណ្តាល) ប្រធានគណៈប្រជាជនភូមិមានប្រិយភាពនិងអស់ពីចិត្តចំពោះជនរួមជាតិខ្មែរ។

មកកាន់ភូមិបឹងទ្រៀត ឃុំលីវទូ មាមីងខ្មែរនៅទីនេះនរណាក៏ស្គាល់លោកតាំងរ៉ូគ្វីសា ប្រធានគណៈប្រជាជនភូមិបឹងទ្រៀត និងជាអ្នកមានប្រិយភាពម្នាក់ក្នុងឃុំ។ ដោយសារភាពជាគំរូក្នុងជីវភាពរស់នៅ និងខ្នះខ្នែងចូលរួមក្នុងចលនានានារបស់ភូមិភាគ នាឆ្នាំ២០២១ លោកក៏បានគណៈកម្មាធិការបក្ស រដ្ឋអំណាចភូមិភាគ និងប្រជាជនទំនុកចិត្តបោះឆ្នោតជ្រើសរើសធ្វើជាប្រធានគណះប្រជាជនភូមិបឹងទ្រៀត។ តបស្នងនូវទំនុកទុកចិត្តនោះ លោកបានខិតខំប្រឹងប្រែងឥតឈប់ឈរក្នុងការគិតគូរដល់ជីវភាពរបស់ប្រជាជន។ បឹងទ្រៀកជាភូមិដែលមានជនរួមជាតិខ្មែររស់នៅជាង៩០% ហើយសេដ្ឋកិច្ចពឹងផ្អែកចម្បងលើកសិកម្ម ជាមួយនឹងការប្តេជ្ញាចិត្តជួយឱ្យស្រុកកំណើតរួចផុតពីភាពក្រីក្រ កន្លងមក លោកបានចូលរួមយ៉ាងសកម្មក្នុងការឧបត្ថម្ភគ្រួសារជួបលំបាកឱ្យមានលក្ខណៈអភិវឌ្ឍការផលិត តាមរយៈប្រភពទុនបុលពីធនាគារគោលនយោបាយសង្គម។ លោកក៏បានចលនាមាមីងផ្លាស់ប្តូរផ្នត់គំនិតផលិត អនុវត្តវិទ្យាសាស្ត្រ-បច្ចេកទេសក្នុងការដាំដុះ និងចិញ្ចឹមសត្វ។ តាមរយៈនោះ ជីវភាពរស់នៅរបស់មាមីងបានកែលម្អជាបណ្តើរៗ។ មិនត្រឹមតែជួយមាមីងអភិវឌ្ឍសេដ្ឋកិច្ចប៉ុណ្ណោះទេ លោកតាំងរ៉ូគ្វីសានៅទាំងជាអ្នកយកចិត្តទុកដាក់គិតគូរចំពោះបញ្ហា "ផ្ទះសម្បែង" សម្រាប់អ្នកក្រផងដែរ។ ជាមួយនឹងប្រិយភាព និងការខ្នះខ្នែងអស់ពីចិត្ត លោកបានសហការជាមួយអង្គការមហាជនភូមិធ្វើសេនាធិការជូនរដ្ឋអំណាច និងចលនាកសាងផ្ទះសម្បែង រួមចំ ណែកធ្វើឱ្យក្តីប្រាថ្នាអំពីជម្រកស្នាក់នៅដ៏រឹងមាំរបស់គ្រួសារដែលមានជីវភាពលំបាកបានក្លាយជាការពិត។ ចាប់ពីឆ្នាំ២០២៥ ដល់បច្ចុប្បន្ន ផ្ទះថ្មីចំនួន ៦ ខ្នង បានកសាងឡើង រួមជាមួយនឹងអំណោយរាប់រយចំណែក គិតជាទឹកប្រាក់សរុបជិត ៥០០ លានដុង។ រស់នៅក្នុងផ្ទះថ្មីដ៏រឹងមាំ លោកយាយត្រឹងធីយុល នៅភូមិបឹងទ្រៀត ឃុំលីវទូ បានសម្តែងការរំភើបចិត្ត៖ “កាលពីមុន គ្រួសារខ្ញុំលំបាកណាស់ សមាជិក ៤ នាក់រស់នៅក្នុងផ្ទះតូចដែលទ្រុឌទ្រោម។ អាស្រ័យបានក្មួយគ្វីសា ជួយជ្រោមជ្រែង ទើបពេលនេះ ខ្ញុំមានផ្ទះរឹងមាំនៅ”។

ទន្ទឹមនឹងការគិតគូរដល់ជីវភាពរបស់ប្រជាជន លោកតាំងរ៉ូគ្វីសា នៅទាំងចលនាបានថវិកាជិត ៦០០ លានដុងពីមាមីងនិងសប្បុរសជន ដើម្បីកសាងនិងជួសជុលស្ពាន ផ្លូវ ព្រមទាំងស្តារប្រឡាយធារាសាស្ត្រ ដើម្បីបម្រើការផលិតរបស់មាមីងឱ្យបានងាយស្រួលទៀតផង។ លោកតាំងរ៉ូគ្វីសា បានចែករំលែក៖ “ខ្ញុំគិតថា ក្នុងនាមជាកម្មាភិបាលនិងជាបក្ខជនម្នាក់ ត្រូវរស់នៅយ៉ាងណាឱ្យសក្ដិសមនឹងទំនុកចិត្តរបស់ប្រជាជន។ ផ្ទះនីមួយៗបានកសាងឡើង គ្រួសារក្រីក្រនីមួយៗដែលបានរួចផុតពីភាពក្រីក្រ គឺជាសេចក្តីរីករាយ និងជាកម្លាំងចិត្តដើម្បីឱ្យខ្ញុំបន្តលះបង់កម្លាំងកាយចិត្ត”។

តាមរយៈការខិតខំប្រឹងប្រែងអស់រយៈពេលជាច្រើនឆ្នាំក្នុងការងារ មកទល់បច្ចុប្បន្ន ទិដ្ឋភាពភូមិស្រុកកាន់តែរីកចម្រើនជាលំដាប់។ អត្រាគ្រួសារក្រីក្រនិងក្បែរក្របានថយចុះយ៉ាងច្រើន ពោលគឺពី១០០ គ្រួសារ (នាឆ្នាំ២០២១) ចុះនៅត្រឹម ១៦ គ្រួសារប៉ុណ្ណោះ (នាឆ្នាំ២០២៦)។ ទន្ទឹមនឹងនោះ ជីវភាពរស់នៅរបស់ប្រជាជនត្រូវបានលើកកម្ពស់ជាបន្តបន្ទាប់ ហើយស្មារតីមហាសាមគ្គីទូទាំងប្រជាជនក៏បានពង្រីកយ៉ាងខ្លាំងក្លាផងដែរ។

លោកស្រី វ៉ធីញី អនុប្រធានគណៈកម្មាធិការប្រជាជនឃុំលីវទូ បានឱ្យដឹង ៖ “ក្នុងតួនាទីជាប្រធានគណះប្រជាជនភូមិបឹងទ្រៀត លោកតាំងរ៉ូគ្វីសា តែងធ្វើជាគំរូ និងចលនាមាមីងអនុវត្តល្អនូវរាល់គោលការណ៍ មាគ៌ារបស់បក្ស គោលនយោបាយ និងច្បាប់របស់រដ្ឋ; លោកតែងខិតខំអនុវត្តល្អនូវរាល់ភារកិច្ចដែលបានប្រគល់ជូន ព្រមទាំងស្តាប់ និងឆ្លុះបញ្ចាំងទាន់ពេលនូវបំណងប្រាថ្នារបស់មាមីងជូនដល់គណៈកម្មាធិការបក្ស និងរដ្ឋអំណាចគ្រប់ថ្នាក់ រួមចំណែកអនុវត្តល្អនូវរាល់ភារកិច្ចសេដ្ឋកិច្ច និងនយោបាយរបស់ភូមិភាគក្នុងរយៈពេលកន្លង”៕

ថាញវ៉ាង - ថាច់ធី

ចែករំលែកអត្ថបទ

ពាក្យគន្លឹះ