បណ្តាក្រុមហ៊ុនផលិតម៉ូតូដូចជា Honda, Yamaha, Piaggio បានបញ្ជាក់ថា ភាគច្រើនម៉ូតូស៊េរីថ្មី គឺអាចប្រើសមប្រកបជាមួយសាំង E១០។ ទោះជាយ៉ាងណាក៏ដោយ សម្រាប់ម៉ូតូស៊េរីចាស់ៗមួយចំនួន ចាំបាច់មានការប្រុងប្រយ័ត្នមុនពេលផ្លាស់ប្តូរមកប្រើប្រាស់សាំងប្រភេទនេះ។
សាំងជីវសាស្ត្រ E១០ ត្រូវបានដាក់ឱ្យប្រើប្រាស់ជាផ្លូវការនៅទូទាំងប្រទេស ចាប់ពីថ្ងៃទី១ ខែមិថុនា ឆ្នាំ២០២៦ ដែលបង្កឱ្យមានការព្រួយបារម្ភជាច្រើនពីសំណាក់អ្នកប្រើប្រាស់ម៉ូតូ អំពីលទ្ធភាពនៃការប្រើសមប្រកបជាមួយនឹងម៉ាស៊ីន។ ក្នុងពេលដែលក្រុមហ៊ុនធំៗដូចជា Honda និង Yamaha សុទ្ធតែបានបញ្ជាក់ថា ភាគច្រើនផលិតផលបច្ចុប្បន្នអាចប្រើប្រាស់សាំង E១០ បាន ប៉ុន្តែម៉ូតូស៊េរីចាស់ៗមួយចំនួន គប្បីយកចិត្តទុកដាក់និងប្រុងប្រយ័ត្នមុនពេលផ្លាស់ប្តូរ។
ម៉ូតូស៊េរីថ្មីទាំងអស់សុទ្ធតែអាចប្រើប្រាស់សាំង E១០ បាន
យោងតាមបទដ្ឋានបច្ចេកទេសបច្ចុប្បន្ន សាំង E១០ គឺជាល្បាយផ្សំឡើងពីសាំងរ៉ែដែលគ្មានសារធាតុសំណ និងអេតាណុលឥន្ធនៈ (ethanol) ដែលក្នុងនោះ កម្រិតសារធាតុអេតាណុលមានពី ៩-១០% ហើយផ្នែកដែលនៅសល់គឺជាសាំងរ៉ែ។ ប្រភេទឥន្ធនៈនេះ មានសន្ទស្សន៍អុកតាន (Octane) មិនទាបជាង ៩២ ឡើយ។
ក្រុមហ៊ុន Honda វៀតណាម បានឱ្យដឹងថា អតិថិជនអាចមានទំនុកចិត្តក្នុងការប្រើប្រាស់សាំង E១០ សម្រាប់ផលិតផលនានាដែលចែកចាយជាផ្លូវការដោយក្រុមហ៊ុននៅប្រទេសវៀតណាម។ យោងតាមក្រុមហ៊ុនផលិត ម៉ូតូ Honda ស៊េរីនានាត្រូវបានរចនាឡើងដើម្បីប្រើប្រាស់ឥន្ធនៈដែលមានកម្រិតអេតាណុលមិនលើសពី ១០% ដែលវាសមស្របទាំងស្រុងទៅនឹងបទដ្ឋានបច្ចេកទេសនៃសាំង E១០ ដែលកំពុងចរាចរនៅលើទីផ្សារ។
នៅក្នុងសៀវភៅណែនាំប្រើប្រាស់ ក្រុមហ៊ុន Honda បានផ្តល់អនុសាសន៍ដល់អ្នកប្រើប្រាស់ឱ្យប្រើប្រាស់ឥន្ធនៈដែលមានសន្ទស្សន៍អុកតានចាប់ពី ៩១ ឡើងទៅ។ ហេតុដូច្នេះហើយ សាំង E១០ អាចឆ្លើយតបបានយ៉ាងពេញលេញនូវរាល់តម្រូវការបច្ចេកទេស និងមិនបង្កផលប៉ះពាល់ដល់ម៉ាស៊ីន ឬប្រព័ន្ធឥន្ធនៈរបស់ម៉ូតូឡើយ។
យោងតាមដេប៉ូចែកចាយមួយចំនួនរបស់ Honda បានឱ្យដឹងថា ម៉ូតូ Honda ដែលផលិតនៅប្រទេសវៀតណាមចាប់ពីក្រោយឆ្នាំ២០០៩ និងម៉ូតូនាំចូលពីអឺរ៉ុបដែលផលិតក្រោយឆ្នាំ១៩៩៣ សុទ្ធតែអាចប្រើប្រាស់សាំង E១០ បាន ដោយមិនបាច់ផ្លាស់ប្តូរទម្រង់រចនាសម្ព័ន្ធបច្ចេកទេសឡើយ។
ជាក់ស្តែងគឺ ម៉ូតូដៃហ្គា និងម៉ូតូលេខ ភាគច្រើនដែលកំពុងដាក់លក់នៅប្រទេសវៀតណាម ដូចជា Honda Vision, Air Blade, SH, SH Mode, PCX, Future, Wave RSX ឬ Winner X សុទ្ធតែបានបំពាក់នូវប្រព័ន្ធបាញ់សាំងអេឡិចត្រូនិក PGM-FI។ បច្ចេកវិទ្យានេះ អនុញ្ញាតឱ្យម៉ាស៊ីនធ្វើការកែសម្រួលយ៉ាងបត់បែននូវសមាមាត្ររវាងឥន្ធនៈ និងខ្យល់ ដើម្បីបង្កើនប្រសិទ្ធភាពនៃដំណើរការចំហេះ ជួយឱ្យម៉ូតូដំណើរការទៅដោយរលូន និងមានលំនឹងជាមួយនឹងប្រភេទសាំងដែលមានកម្រិតអេតាណុលខុសៗគ្នា រួមទាំងសាំង E១០ ផងដែរ។
ចំពោះក្រុមហ៊ុន Yamaha វិញ ក៏បានបញ្ជាក់ដែរថា ភាគច្រើនផលិតផលបច្ចុប្បន្នគឺសមប្រកបជាមួយនឹងឥន្ធនៈ E១០។ រាល់ម៉ូតូទាំងអស់ដែលប្រើប្រាស់ប្រព័ន្ធបាញ់សាំងអេឡិចត្រូនិក FI សុទ្ធតែត្រូវបានរចនាឡើងដើម្បីដំណើរការជាមួយនឹងប្រភេទឥន្ធនៈនេះ។
អ្នកប្រើប្រាស់អាចកំណត់ដឹង តើម៉ូតូរបស់ខ្លួនស្ថិតក្នុងក្រុមដែលអាចប្រើសមប្រកបជាមួយសាំង E១០ ឬទេ តាមរយៈសញ្ញាសម្គាល់ "FI" នៅលើតែមម៉ូតូ ឬនៅលើកុងទ័រ។ ក្រៅពីនេះ នៅពេលបើកសោអគ្គិសនី ម៉ូតូប្រភេទ FI ជាទូទៅតែងតែបញ្ចេញសំឡេងស្នប់បូមសាំងដំណើរការក្នុងរយៈពេលប្រហែលពីរបីវិនាទីមុនពេលបញ្ឆេះម៉ាស៊ីន និងមានភ្លើងសញ្ញាប្រាប់ទៅម៉ាស៊ីនបង្ហាញនៅលើកុងទ័រ។
យោងតាមក្រុមហ៊ុន Yamaha Motor វៀតណាម បានឱ្យដឹងថា ភាគច្រើនម៉ូតូរបស់ក្រុមហ៊ុនចាប់ពីទសវត្សរ៍ឆ្នាំ១៩៩០ រហូតមកដល់បច្ចុប្បន្ន សុទ្ធតែអាចប្រើប្រាស់សាំង E១០ បាន។
ដោយឡែកសម្រាប់ម៉ូតូដែលប្រើប៊ិកសាំង (កាប៊ុយរ៉ាទ័រ) ដែលផលិតចាប់ពីឆ្នាំ២០១៧ មកទល់បច្ចុប្បន្ន ក៏អាចប្រើប្រាស់សាំង E១០ និង RON៩៥ បានដែរ។
ក្រុមហ៊ុន Piaggio វៀតណាម ក៏បានបញ្ជាក់អះអាងផងដែរថា រាល់ម៉ូតូ Piaggio និង Vespa ទាំងអស់ដែលបានចែកចាយជាផ្លូវការនៅលើទីផ្សារវៀតណាម សុទ្ធតែសមប្រកបជាមួយនឹងសាំងជីវសាស្ត្រ E១០។
ក្រុមហ៊ុននៅទាំងអះអាងថា ប្រព័ន្ធម៉ាស៊ីនផ្តាច់មុខទាំងពីរគឺ i-Get និង HPE តែងដំណើរការដោយរលូន ធន់មាំ និងមិនរងផលប៉ះពាល់អវិជ្ជមានណាមួយពីជាតិអាកុលជីវសាស្ត្រឡើយ។
ម៉ូតូស៊េរីចាស់គប្បីមានការប្រុងប្រយ័ត្នខ្ពស់នៅពេលប្តូរមកប្រើប្រាស់សាំង E១០
ទោះបីជាភាគច្រើនម៉ូតូស៊េរីថ្មីៗត្រូវបានរចនាឡើងសមប្រកបជាមួយនឹងឥន្ធនៈជីវសាស្ត្រក៏ដោយ ប៉ុន្តែបណ្តាអ្នកជំនាញបានផ្តល់មតិថា អ្នកប្រើប្រាស់ម៉ូតូស៊េរីចាស់ៗគួរតែមានការប្រុងប្រយ័ត្ននៅពេលផ្លាស់ប្តូរ។
យោងតាមការណែនាំរបស់សមាគមប្រេងសាំងវៀតណាម ម៉ូតូដែលផលិតមុនឆ្នាំ២០០០ ដែលប្រើប្រាស់ប៊ិកសាំង (កាប៊ុយរ៉ាទ័រ) អាចនឹងជួបប្រទះនូវបញ្ហាមួយចំនួន ប្រសិនបើប្រព័ន្ធឥន្ធនៈបានចុះទ្រុឌទ្រោមក្រោយពីប្រើប្រាស់អស់រយៈពេលយូរ។ សារធាតុអេតាណុលមានសមត្ថភាពបឺតសំណើម និងសម្អាតកម្ទេចកម្ទីកាកសំណល់នៅក្នុងធុងសាំង ដែលធ្វើឱ្យសារធាតុកាកសំណល់ដែលកកកុញជាច្រើនឆ្នាំមកនោះ ហូរតាមចរន្តសាំង និងបង្កឱ្យមានការស្ទះផ្លូវលំហូរសាំង។
ក្រៅពីនេះ គ្រឿងបន្លាស់មួយចំនួនដែលធ្វើពីកៅស៊ូ រ៉ងបិទជិត ឬទុយោនាំសាំងនៅលើម៉ូតូដែលចាស់ពេក អាចនឹងឆាប់ខូចគុណភាព ឬរេចរឹលលឿនជាងមុន នៅពេលប៉ះជាមួយឥន្ធនៈដែលមានផ្ទុកសារធាតុអេតាណុល។
ក្រុមហ៊ុន Yamaha Motor វៀតណាម ក៏បានផ្តល់អនុសាសន៍ផងដែរថា ម៉ូតូដែលប្រើប្រាស់ប៊ិកសាំងផលិតមុនឆ្នាំ២០១៧ គួរតែបន្តប្រើប្រាស់សាំង E៥ និង RON៩២ ជំនួសឱ្យការផ្លាស់ប្តូរមកប្រើប្រាស់សាំង E១០។ អ្នកប្រើប្រាស់អាចពិនិត្យមើលឆ្នាំផលិតតាមរយៈស្លាកព័ត៌មានដែលបានបិទនៅលើម៉ូតូ។
ដើម្បីធានាបាននូវសុវត្ថិភាពជាអតិបរមានៅពេលដំណើរការក្រុមហ៊ុន Piaggio វៀតណាម ក៏បានណែនាំដល់អ្នកប្រើប្រាស់ឱ្យទិញសាំងនៅតាមបណ្តាស្ថានីយប្រេងសាំងដែលមានទំនុកចិត្ត ដើម្បីធានាបាននូវគុណភាព និងមិនត្រូវប្រើប្រាស់សារធាតុបន្ថែម (សារធាតុល្បាយ) សម្រាប់ម៉ូតូឡើយ ប្រសិនបើគ្មានការណែនាំពីក្រុមហ៊ុនផលិត។
ជាពិសេស ចំពោះម៉ូតូ Vespa ស៊េរីចាស់ៗដែលប្រើប្រាស់កាប៊ុយរ៉ាទ័រ ឬធុងសាំងតូច អ្នកប្រើប្រាស់ត្រូវបានណែនាំឱ្យយកម៉ូតូទៅកាន់ដេប៉ូចែកចាយដែលបានប្រគល់សិទ្ធិពី Piaggio ដើម្បីធ្វើការថែទាំជាមូលដ្ឋាន មុនពេលផ្លាស់ប្តូរទៅប្រើប្រាស់សាំង E១០។
នៅក្នុងដំណាក់កាលអន្តរកាលនេះ ក្រសួងឧស្សាហពាណិជ្ជកម្ម បានឱ្យដឹងថា សាំង E៥ និង RON៩២ នៅតែបានប្រើប្រាស់ជាបន្តរហូតដល់ដាច់ថ្ងៃទី៣១ ខែធ្នូ ឆ្នាំ២០៣០ ដើម្បីធានានូវប្រភពឥន្ធនៈដែលសមស្របសម្រាប់យានយន្តស៊េរីចាស់ៗ ឬយានយន្តដែលមិនទាន់ត្រៀមខ្លួនរួចរាល់ក្នុងការផ្លាស់ប្តូរទៅប្រើប្រាស់សាំង E១០។
អ្នកជំនាញទាំងឡាយបានផ្តល់អនុសាសន៍ថា អ្នកប្រើប្រាស់គួរតែពិនិត្យមើលសៀវភៅណែនាំប្រើប្រាស់ ធ្វើការថែទាំប្រព័ន្ធឥន្ធនៈឱ្យបានទៀងទាត់តាមកាលកំណត់ និងជ្រើសរើសប្រភេទសាំងឱ្យបានត្រឹមត្រូវទៅតាមការណែនាំរបស់ក្រុមហ៊ុនផលិត ដើម្បីធានាបាននូវសមត្ថភាពដំណើរការ ជួយសន្សំសំចៃឥន្ធនៈ ក៏ដូចជាជួយពន្យារអាយុកាលរបស់ម៉ាស៊ីនផងដែរ៕
ប្រភព÷ vietnamnet.vn - សុផន
នាយក៖ ហ្វិញហ្វាងម៉េន
លិខិតអនុញាតលេខ ៧៨៩/GP- BTTTTអាស្រ័យក្រសួងព័ត៌មាននិងសារគមនាគមន៍ផ្តល់នូវថ្ងៃទី០២-១២-២០២១។លេខ២៤ ត្រឹងវ៉ាំងហ្វាយ សង្កាត់និញកេវ ក្រុងកឹងធើ - ទូរស័ព្ទ: (០២៩២) ៣៨៣០០៩៨
ទូរសារ: (០២៩២) ៣៨៣០៥៦១។ អ៊ីម៉ែល: toasoan@baocantho.com.vn
ទំនាក់ទំនងផ្សាយពាណិជ្ជកម្ម: quangcao@baocantho.com.vn
សរសេរច្បាស់ប្រភព "សារព័ត៌មានអេឡិចត្រូនិកកឹងធើ" នៅពេលផ្សាយបន្តពី websiteនេះ។
អភិវឌ្ឍន៍ដោយ:
ពាក្យគន្លឹះ