មហាសាមគ្គីជនជាតិ ភូមិស្រុកផ្លាស់ថ្មី

23/04/2026 - 06:52

ភាពវិវឌ្ឍន៍នៅតំបន់ជនរួមជាតិខ្មែរទីក្រុងកឹងធើ

ជនរួមជាតិខ្មែររស់នៅលើភូមិឋានទីក្រុងកឹងធើ នាបច្ចុប្បន្នមានជាង ៥៤៣.០០០ នាក់ ស្រូបអត្រាជាង ១៤% នៃចំនួនប្រជាជនទូទាំងទីក្រុង។ រយៈពេលកន្លង អាស្រ័យអនុវត្តកម្មវិធីទិសដៅជាតិនៅតំបន់ជនជាតិភាគតិចមានប្រសិទ្ធភាព រួមជាមួយនឹងគោលនយោបាយពិសេសដោយឡែករបស់ភូមិភាគ ទីក្រុងកឹងធើ បានលើកកម្ពស់គុណភាពរស់នៅជូនប្រជាជនជាសន្សឹមៗ បំផុតគឺជនជាតិភាគតិច។

ដងផ្លូវនៅតំបន់ជនជាតិភាគតិចបានវិនិយោគកសាងរឹងមាំ។

អាស្រ័យអនុវត្តកម្មវិធីទិសដៅជាតិនៅតំបន់ជនជាតិភាគតិច ទើបបង្កបានភាពវិវឌ្ឍន៍នៅតំបន់ជនរួមជាតិខ្មែរជាបណ្តើរៗ។ បំផុតគឺដោះស្រាយការលំបាកអំពីបញ្ហាដីសង់ផ្ទះ លំនៅឋាន ដីផលិត និងទឹកស្អាតប្រើប្រាស់។ល។ ផ្តើមពីនោះ ជីវភាពស្មារតីរបស់ជនរួមជាតិខ្មែរពីមួយថ្ងៃទៅមួយថ្ងៃកាន់តែបានលើកកម្ពស់ និងអត្រាគ្រួសារក្រីក្របានថយចុះ; ឃុំ សង្កាត់ទាំងអស់មានបណ្តាញអគ្គិសនីជាតិ; គ្រួសារជនរួមជាតិ មានអគ្គិសនីប្រើប្រាស់ជាង ៩៩%។ល។ អ្នកមីង ហ្វិញធីស៊ីម នៅភូមិទឹកប្រៃ ២ ឃុំឡុងភូ ជាគ្រួសារបានទទួលផលពីគោលនយោបាយ ឱ្យដឹង៖ “គ្រួសារក្រ គ្មានដីដាំដុះ រៀងរាល់ថ្ងៃតែងដើរធ្វើការឈ្នួលដើម្បីចិញ្ចឹមជីវិត។ ពីមុន ប្តីប្រពន្ធខ្ញុំទៅធ្វើការទាំង២នាក់ ប៉ុន្តែប៉ុន្មានឆ្នាំមកនេះ ប្តីខ្ញុំមានជំងឺ និងមិនអាចធ្វើការបានទៀត ហេតុនោះការចាយវាយប្រចាំថ្ងៃ និងប្រាក់ថ្នាំសង្កូវខ្ញុំរ៉ាប់រងទាំងអស់។ ផ្ទះកំពុងស្នាក់នៅសព្វថ្ងៃមានភាពទ្រុឌទ្រោម ហើយពេលភ្លៀងម្តងៗតែងស្រក់លេចទឹក។ ការលំបាក តែងកើតមានជាបន្តបន្ទាប់ អាស្រ័យបានរដ្ឋឧបត្ថម្ភសង់ផ្ទះ ទើបឥឡូវប្តីប្រពន្ធខ្ញុំមានផ្ទះជ្រកភ្លៀងជ្រកក្តៅ”។

ទន្ទឹមនឹងអនុវត្តនូវគោលនយោបាយពិសេសដោយឡែក ភូមិភាគថែមទាំងយកចិត្តទុកដាក់វិនិយោគលើហេដ្ឋារចនាសម្ព័ន្ធជនបទបម្រើអភិវឌ្ឍសេដ្ឋកិច្ច - សង្គមតំបន់មានជនជាតិរស់នៅកុះករ ធានាបម្រើការធ្វើដំណើរទៅមក និងជួញដូរទំនិញ មានភាពងាយស្រួលទៀតផង។ ទន្ទឹមនឹងនោះ លក្ខឋានអភិវឌ្ឍន៍ហេដ្ឋារចនាសម្ព័ន្ធ ដូចជា៖ អគ្គិសនី សាលារៀន ដំណាក់សុខាភិបាលបានវិនិយោគកសាងរឹងមាំ ជីវភាពមាមីងនៅតំបន់ជនជាតិបានលើកកម្ពស់ដោយឥតឈប់ឈរ។ លោកត្រឹងវុាំងឌឹក ប្រជាជនរស់នៅភូមិបូលៀង ៣ ឃុំមីហឿង ឱ្យដឹង៖ “ពីមុន ជីវភាពមាមីងជួបការលំបាកខ្លាំងណាស់ ហេដ្ឋារចនាសម្ព័ន្ធជនបទនៅមានកម្រិត។ ប៉ុន្តែប៉ុន្មានឆ្នាំមកនេះ ដោយបានរដ្ឋយកចិត្តទុកដាក់វិនិយោគកសាងហេដ្ឋារចនាសម្ព័ន្ធ ហេតុនោះ ការធ្វើដំណើរទៅមករបស់មាមីងមានភាពងាយស្រួល ហើយទិដ្ឋភាពតំបន់ជនបទក៏បានផ្លាស់ថ្មីយ៉ាងប្រចក្សទៀតផង”។

តាមប្រសាសន៍លោក ឡឹមហ្វាងម៉ូវ នាយកមន្ទីរជនជាតិនិងសាសនាទីក្រុងកឹងធើ ដំណាក់កាល ២០២១ - ២០២៥ ទីក្រុងកឹងធើ បានអនុវត្តគម្រោងចំនួន ៤ ដោយវិនិយោគលើហេដ្ឋារចនាសម្ព័ន្ធសំខាន់ៗ ដើម្បីបម្រើជីវភាព ការផលិតនៅតំបន់ជនជាតិ ដោយមានប្រភពទុនសរុប ១៤៣.១២៦ លានដុង។ សមិទ្ធផលទាំងនេះ បានមកពីការអនុវត្តគោលការណ៍ គោលនយោបាយរបស់បក្ស រដ្ឋ នឹងជាកម្លាំងជំរុញដើម្បីប្រជាជនបន្តពង្រីកឆន្ទៈឈានឡើងដោយខ្លួនឯង រវៀសរវៃច្នៃប្រតិដ្ឋក្នុងការពលកម្មផលិត រួមចំណែកជាមួយរដ្ឋអំណាចកសាងភូមិស្រុកកាន់តែរីកចម្រើនពីមួយថ្ងៃទៅមួយថ្ងៃ៕

ថាញវ៉ាង-វិមាន

ចែករំលែកអត្ថបទ

ពាក្យគន្លឹះ