មហាសាមគ្គីជនជាតិ គំរូក្នុងសហគមន៍

23/04/2026 - 06:52

លោកគ្រូសឺនសៅរ៍ – គំរូល្អក្នុងសហគមន៍ជនរួមជាតិខ្មែរ

កំព្រាឪពុកតាំងពីអាយុ ១៣ ឆ្នាំ ប៉ុន្តែដោយឆន្ទៈនិងបំណងប្រាថ្នាក្នុងការសិក្សារៀនសូត្រ លោកគ្រូសឺនសៅរ៍ បានខិតខំប្រឹងប្រែងឈានឡើងតាមវិស័យសិក្សា។ អស់រយៈពេលជិត ២០ ឆ្នាំ ផ្សារភ្ជាប់នឹងការបង្ហាត់បង្រៀននៅវត្តសំរោងឯក លោកគ្រូមិនត្រឹមតែបង្រៀនអក្សរខ្មែរដល់ព្រះសង្ឃនិងកូនចៅជនរួមជាតិខ្មែរប៉ុណ្ណោះទេ ថែមទាំងបានចូលរួមយ៉ាងសកម្មក្នុងការនិពន្ធអក្សរសិល្ប៍ រួមចំណែកអភិរក្សនិងលើកកម្ពស់អត្តសញ្ញាណវប្បធម៌ជនជាតិ។

កើតនិងធំដឹងក្ដីក្នុងគ្រួសារកសិករនៅភូមិសំរោង សង្កាត់ង្វៀកហ្វា ខេត្តវិញឡុង ជីវភាពរបស់លោកគ្រូសឺនសៅរ៍ លំបាកតាំងពីក្មេង។ អាយុ ១៣ ឆ្នាំ បន្ទាប់ពីឪពុកស្លាប់ សឺនសៅរ៍ សម្រេចចិត្តបួសសងគុណ។ ក្នុងរយៈពេលបួសរៀនធម៌វិន័យនិងអក្សរសាស្រ្តខ្មែរ សឺនសៅរ៍ បានយល់ពីតម្លៃនៃចំណេះដឹងមានសារៈសំខាន់។ ផ្ដើមពីនោះ គាត់បានប្ដេជ្ញាថា នឹងខិតខំរៀនសូត្រដើម្បីក្លាយជាគ្រូបង្រៀន ហើយផ្ដល់ចំណេះដឹងដែលខ្លួនបានរៀនដល់កូនចៅជនរួមជាតិខ្មែរនៅភូមិស្រុក។

លោកគ្រូសឺនសៅរ៍ ជាគំរូល្អក្នុងវិស័យអប់រំជនរួមជាតិខ្មែរ។

ឆ្នាំ ១៩៩៥ បន្ទាប់ពីបញ្ចប់ការសិក្សាថ្នាក់ពុទ្ធិកសិក្សាបឋមភូមិបាលី-ខ្មែរនៅខេត្តត្រាវិញ (ចាស់) លោកគ្រូបានចុះឈ្មោះចូលរៀននៅសាលាមធ្យមសិក្សាបំពេញវិជ្ជាបាលីណាមបូ (ទីក្រុងកឹងធើ)។ រំលឹកឡើងវិញរយៈពេលនោះ លោកគ្រូសឺនសៅរ៍ ឱ្យដឹង៖ “នៅពេលនោះ គ្រួសារខ្ញុំលំបាកណាស់ ហើយមិនអាចគិតគូរថវិការៀនសូត្រ ដូច្នេះខ្ញុំត្រូវខិតខំអស់ពីសមត្ថ ភាព។ សំណាងល្អ ខណៈពេលកំពុងសិក្សានៅសាលានេះ តាំងពីការរស់នៅរហូតដល់ថ្លៃសិក្សាគឺសាលាឧបត្ថម្ភទាំងស្រុង ម៉្លោះហើយខ្ញុំស្ងប់អារម្មណ៍សិក្សារៀនសូត្រ។ ក្រៅពីសិក្សានៅសាលាបាលី ខ្ញុំឆ្លៀតឱកាសរៀនភាសាអង់គ្លេសបន្ថែមដើម្បីលើកកម្ពស់ចំណេះដឹង”។ បន្ទាប់ពីសិក្សា អស់រយៈពេល ៤ ឆ្នាំ ឆ្នាំ២០០០ លោកគ្រូបានបញ្ចប់វគ្គសិក្សា ហើយត្រឡប់មកវត្តដើម្បីជួយកិច្ចការក្នុងវត្ត ទន្ទឹមនឹងនោះ បង្ហាត់បង្រៀនអក្សរខ្មែរដល់ព្រះសង្ឃបួសថ្មីនិងកូនចៅជនរួមជាតិខ្មែរ។ មិនផ្អាកត្រឹមនេះ លោកគ្រូបន្តសិក្សាពុទ្ធិកមធ្យមសិក្សាទុតិយភូមិនៅត្រាវិញ ៣ ឆ្នាំទៀត ដើម្បីលើកកម្ពស់ចំណេះដឹង។

ចាប់ពីឆ្នាំ ២០០៤ លោកគ្រូសឺនសៅរ៍ បានវត្តសំរោងឯកចាត់ឱ្យបង្រៀនថ្នាក់ពុទ្ធិកមធ្យមសិក្សាទុតិយភូមិនៅក្នុងវត្ត។ ក្នុងរយៈពេលបង្រៀន លោកគ្រូតែងអស់ពីចិត្តពីថ្លើម ឡើងគ្រោងមេរៀនយ៉ាងហ្មត់ចត់ អនុវត្តវិធីសាស្រ្តបង្រៀនងាយយល់ សមស្របនឹងសិស្សម្នាក់ៗ។ ព្រះតេជគុណ ថាច់ថាយហ៊ុង សមណសិស្សសាលាពុទ្ធិកមធ្យមសិក្សាវត្តសំរោងឯក មានថេរដីកា៖ “លោកគ្រូសឺនសៅរ៍ គឺជាគ្រូបង្រៀនដែលមានសមត្ថភាពនិងមានបទពិសោធន៍ច្រើន ពិសេសផ្នែកអត្ថបទនិងកំណាព្យ។ លោកគ្រូពន្យល់មេរៀនបានច្បាស់លាស់ ងាយយល់ជួយដល់សមណសិស្សក្រេបជញ្ជក់មេរៀនបានយ៉ាងល្អ”។

មិនត្រឹមតែយកអស់ពីកម្លាំងកាយចិត្តក្នុងការបង្ហាត់បង្រៀនប៉ុណ្ណោះទេ លោកគ្រូសឺនសៅរ៍ នៅទាំងចំណាយពេលនិងប្ដេជ្ញាចិត្តក្នុងការតែង និពន្ធកំណាព្យនិងអក្សរសិល្ប៍។ ឆ្នាំ ២០០៨ លោកគ្រូបានអញ្ជើញចូលរួមជាសមាជិកសមាគមអក្សរសិល្ប៍វិញឡុង។ ដោយមានចំណង់ចំណូលចិត្តនិងស្រឡាញ់វប្បធម៌ជនរួមជាតិ លោកគ្រូ បាននិពន្ធកំណាព្យនិងបទចម្រៀងជាច្រើនពោរពេញដោយអត្តសញ្ញាណខ្មែរ។ ស្នាដៃរបស់លោកគ្រូភាគច្រើនអប់រំយុវជនជំនាន់ក្រោយឱ្យមានស្មារតីអភិរក្សភាសា អក្សរសាស្រ្តជាតិ ទន្ទឹមនឹងនោះ ជំរុញទឹកចិត្តយុវជនឱ្យចេះស្រឡាញ់ភូមិកំណើត ប្រទេសជាតិ។ ស្នាដៃមួយចំនួនរបស់លោកគ្រូបានបោះពុម្ពផ្សាយលើទំព័រកាសែតនិងវិទ្យុ ទូរទស្សន៍ និងបានក្រុមសិល្បៈយកទៅសម្តែងទៀតផង រួមចំណែកផ្សព្វផ្សាយតម្លៃវប្បធម៌ជនរួមជាតិខ្មែរនៅក្នុងជីវភាពសហគមន៍។

ដោយមិនបង្អង់ក្នុងការសិក្សារៀនសូត្រ លោកគ្រូសឺនសៅរ៍ បានប្រឡងជាប់ចូលរៀនគរុកោសល្យអក្សរសាស្ត្រនៅសាកលវិទ្យាល័យត្រាវិញ។ បន្ទាប់ពីបញ្ចប់ការសិក្សា លោកគ្រូបានជ្រើសរើសចូលក្របខណ្ឌរបស់សាលាមធ្យមសិក្សាបាលី-ខ្មែរវិញឡុង។ បច្ចុប្បន្ន លោកគ្រូបង្រៀនមុខវិជ្ជាកំណាព្យនៅវត្តសំរោងឯកនិងនៅសាលាមធ្យមសិក្សាបាលី-ខ្មែរវិញឡុង។ ព្រះតេជគុណ គឹមសេនវិចិត្រ សមណសិស្សថ្នាក់ទី ១១ B សាលាមធ្យមសិក្សាបាលី-ខ្មែរវិញឡុង ឱ្យដឹង៖ “អាស្រ័យការបង្ហាត់បង្រៀនដោយអស់ពីចិត្តពីថ្លើមរបស់លោកគ្រូសឺនសៅរ៍ ទើបអាត្មាងាយយល់។ លោកគ្រូពន្យល់យ៉ាងលម្អិត កន្លែងណាសិស្សមិនទាន់ច្បាស់ លោកគ្រូពន្យល់សាឡើងវិញរហូតដល់យល់”។

លោកលឹមសុរន្តរ៍ ចាងហ្វាងរងសាលាមធ្យមសិក្សាបាលី-ខ្មែរវិញឡុង ឱ្យដឹង៖ “លោកគ្រូ សឺនសៅរ៍ គឺជាគំរូល្អដោយមានស្មារតីរៀនសូត្រ និងស្រាវជ្រាវជ្រៅជ្រះក្នុងវិស័យអប់រំ។ លោកគ្រូតែងម្ចាស់ការនិងសកម្មក្នុងការអនុវត្តភារកិច្ច; សម្រេចការងារបង្ហាត់បង្រៀនបានល្អ ស្រាវជ្រាវ និងបម្រើសហគមន៍។ ដោយមានជំនាញខាងអក្សរសាស្ត្រនិងកំណាព្យ លោកគ្រូរួមចំណែកយ៉ាងច្រើនក្នុងការអភិរក្ស និងលើកកម្ពស់អត្តសញ្ញាណវប្បធម៌ជនរួមជាតិខ្មែរ”។

លោកគ្រូសឺនសៅរ៍ (ខាងឆ្វេង)។

ព្រះតេជគុណ គឹមថាញហៀង ព្រះពហុស្សូតឆ្វេងវត្តសំរោងឯក មានថេរដីកា៖ “អស់រយៈពេលជិត ២០ ឆ្នាំ លោកគ្រូសឺនសៅរ៍ ជួយបង្ហាត់ បង្រៀននៅវត្តសំរោងឯក គាត់មានបទពិសោធន៍ច្រើន ស្រឡាញ់អាជីពនិងអស់ពីចិត្តពីថ្លើមជាមួយការងារ។ មិនត្រឹមតែជាគ្រូបង្រៀនប៉ុណ្ណោះទេ លោកគ្រូជាគណៈអភិបាលវត្ត ហើយចូលរួមយ៉ាងសកម្មក្នុងសកម្មភាពជាច្រើនបម្រើសហគមន៍។ ថ្មីៗនេះ លោកគ្រូចូលរួមគម្រោងឌីជីថលសាស្ត្រាស្លឹករឹតនៅវត្តសំរោងឯក អាស្រ័យសាកលវិទ្យាល័យត្រាវិញសហការអនុវត្ត ក្រោមការឧបត្ថម្ភពីមូលនិធិគំនិតច្នៃប្រតិដ្ឋភូមិភាគរបស់ស្ថានទូតកាណាដា ប្រចាំការនៅវៀតណាម។ ពិសេស លោកគ្រូបង្ហាត់បង្រៀននៅក្នុងវត្ត ដោយគ្មានប្រាក់ខែអ្វីទាំងអស់។ គាត់ជាគំរូល្អក្នុងសហគមន៍ជនរួមជាតិខ្មែរ”។

ដោយការព្យាយាមនិងអស់ពីចិត្តពីថ្លើមជា មួយអាជីព លោកគ្រូសឺនសៅរ៍ បានរួមចំណែក ណ្តុះបណ្តាលព្រះសង្ឃនិងសិស្សានុសិស្សខ្មែរជាច្រើនជំនាន់ ទន្ទឹមនឹងនោះ សកម្មអភិរក្ស និងពង្រីកអត្តសញ្ញាណវប្បធម៌ជនរួមជាតិខ្មែរ។ ការរួមចំណែករបស់លោកគ្រូបានទទួលស្គាល់ តាមរយៈលិខិតសរសើរ ប័ណ្ណសរសើរជាច្រើន ពីគ្រប់ថ្នាក់ គ្រប់ផ្នែក។ គំរូរបស់លោកគ្រូសឺនសៅរ៍ គឺជាសក្ខីភាពបញ្ជាក់ពីស្មារតីនៃការសិក្សារៀនសូត្រ ឆន្ទៈឈានឡើងនិងអស់ពីចិត្តពីថ្លើម ដើម្បីសហគមន៍៕

អត្ថបទ៖ទីទុយ

ចែករំលែកអត្ថបទ

ពាក្យគន្លឹះ