ព្រឹត្តិការណ៍ - នយោបាយ ព្រឹត្តិការណ៍

15/04/2026 - 18:28

ជីវភាពរីកចម្រើន ជនរួមជាតិខ្មែរទទួលបុណ្យចូលឆ្នាំថ្មីប្រពៃណីកាន់តែសម្បូរសប្បាយ

ព្រឹកថ្ងៃទី ១៥ ខែមេសា គណៈកម្មាធិការបក្ស ក្រុមប្រឹក្សាប្រជាជន គណៈកម្មាធិការប្រជាជន គណៈកម្មាធិការរណសិរ្សមាតុភូមិវៀតណាមទីក្រុងកឹងធើ បានចាត់តាំងពិធីជួបជុំអំណរបុណ្យចូលឆ្នាំថ្មីរបស់ជនរួមជាតិខ្មែរ ឆ្នាំ ២០២៦ យ៉ាងឱឡារិក នៅវត្តជ្រោយទឹមចាស់ សង្កាត់មីស្វៀង។ អញ្ជើញចូលរួមក្នុងពិធីជួបជុំនេះ មានលោក ឡេក្វាងទុង សមាជិកគណៈប្រតិបត្តិការមជ្ឈិមបក្ស លេខាគណៈកម្មាធិការបក្ស ប្រធានគណៈប្រតិភូតំណាងរដ្ឋសភាទីក្រុងកឹងធើ; លោក ដុងវុាំងថាញ សមាជិកគណៈប្រតិបត្តិការមជ្ឈិមបក្ស អនុលេខាប្រចាំការនៃគណៈកម្មាធិការបក្ស ប្រធានក្រុមប្រឹក្សាប្រជាជនទីក្រុងកឹងធើ; លោកស្រី ហូធីកឹមដាវ អនុលេខានៃគណៈកម្មាធិការបក្ស ប្រធានគណៈកម្មាធិការរណសិរ្សមាតុភូមិវៀតណាមទីក្រុងកឹងធើ; ព្រះឧបជ្ឈាយ៍ តាំងណោ ព្រះសុធម្មាធិបតីរង ក្រុមប្រឹក្សាវិន័យធរនៃសមាគមពុទ្ធសាសនាវៀតណាម ប្រធានសមាគមព្រះសង្ឃសាមគ្គីស្នេហាជាតិទីក្រុងកឹងធើ; ព្រះឧបជ្ឈាយ៍ដាវញឺ អនុប្រធានក្រុមប្រឹក្សាភិបាលសមាគមពុទ្ធសាសនាវៀតណាម ប្រធានគណៈអភិបាលសមាគមពុទ្ធសាសនាវៀតណាមទីក្រុងកឹងធើ; រួមជាមួយនឹងសមាជិកក្នុងគណៈអចិន្ត្រៃយ៍នៃគណៈកម្មាធិការបក្ស និងគណៈប្រតិបត្តិការបក្ខភាគទីក្រុង; ថ្នាក់ដឹកនាំមន្ទីរ គណៈ ផ្នែក; អ្នកមុខអ្នកការសាសនា ព្រះសង្ឃ និងជនរួមជាតិខ្មែរនៅភូមិភាគ។

អ្នកតំណាងចូលរួមក្នុងពិធីជួបជុំអំណរបុណ្យចូលឆ្នាំថ្មី ឆ្នាំ២០២៦។

ក្នុងពិធីជួបជុំនេះ លោកស្រី ថាច់ធីកេរិន នាយិការងមន្ទីរជនជាតិនិងសាសនាទីក្រុងកឹងធើ បានអានលិខិតប្រសិទ្ធពរបុណ្យចូលឆ្នាំថ្មីរបស់គណៈកម្មាធិការបក្ស ក្រុមប្រឹក្សាប្រជាជន គណៈកម្មាធិការប្រជាជន និងគណៈកម្មាធិការរណសិរ្សមាតុភូមិវៀតណាមទីក្រុងកឹងធើ ផ្ញើជូនចំពោះជនរួមជាតិ ព្រះសង្ឃកម្មាភិបាល យុទ្ធជន និងអ្នកមានប្រិយភាពជាជនរួមជាតិខ្មែរនៅលើភូមិឋាន។

លោក ដុងវុាំងថាញ សមាជិកគណៈប្រតិបត្តិការមជ្ឈិមបក្សអនុលេខាប្រចាំការនៃគណៈកម្មាធិការបក្ស និងជាប្រធានក្រុមប្រឹក្សាប្រជាជនទីក្រុងកឹងធើ ប្រគេនទេយ្យវត្ថុចំពោះវត្ត។

អាស្រ័យការយកចិត្តទុកដាក់ និងឧបត្ថម្ភយ៉ាងសកម្មរបស់គណៈ ផ្នែកគ្រប់ថ្នាក់ ទើបទិដ្ឋភាពនៅតំបន់ជនជាតិភាគតិចពីមួយថ្ងៃទៅមួយថ្ងៃកាន់តែរីកចម្រើន ជីវភាពសម្ភារៈនិងស្មារតីបានលើកកម្ពស់ អត្រាគ្រួសារក្រីក្រថយចុះរហ័ស គិតដល់ចុងឆ្នាំ ២០២៥ នៅលើភូមិឋានទីក្រុងនៅមានគ្រួសារក្រីក្រចំនួន ៥.៥៨២ គ្រួសារ ស្រូបអត្រា ០,៥៩% ថយចុះ ២.១៦៣ គ្រួសារបើប្រៀបនឹងឆ្នាំ ២០២៤។ អត្តសញ្ញាណវប្បធម៌ប្រពៃណីដ៏ល្អរបស់ជនរួមជាតិខ្មែរបានថែរក្សា និងពង្រីកយ៉ាងខ្លាំងក្លា ពិសេសគឺពិធីបុណ្យប្រពៃណីដូចជា បុណ្យសែនដូនតា បុណ្យអកអំបុក - ប្រណាំងទូក-ងជាដើម។

ថ្លែងសុន្ទរកថាក្នុងពិធីជួបជុំនេះ លោក ង្វៀងវុាំងខើយ អនុប្រធានគណៈកម្មាធិការប្រជាជនទីក្រុងកឹងធើ បញ្ជាក់៖ ឆ្នាំ២០២៥ ទីក្រុងកឹងធើសម្រេចបានលទ្ធផលវិជ្ជមានជាច្រើននៅលើវិស័យសេដ្ឋកិច្ច - សង្គម; ហេដ្ឋារចនាសម្ព័ន្ធបន្តបានវិនិយោគ; កម្មវិធី គោលនយោបាយសម្រាប់តំបន់ជនជាតិភាគតិចបានអនុវត្តព្រមៗគ្នា មានប្រសិទ្ធភាព រួមចំណែកលើកកម្ពស់គុណភាពជីវភាពរបស់ជនរួមជាតិខ្មែរ។ អត្តសញ្ញាណវប្បធម៌ប្រពៃណីបានថែរក្សា និងពង្រីក; ផែនមហាសាមគ្គីទូទាំងជនជាតិបានពង្រឹង និងពង្រីកយ៉ាងខ្លាំងក្លា។

ថ្នាក់ដឹកនាំទីក្រុងកឹងធើ ជូនផ្លាកនិមិត្តរូបផ្ទះមហាសាមគ្គីដល់ជនរួមជាតិខ្មែរដែលមានស្ថានភាពលំបាក។

ជំនួសមុខគណៈកម្មាធិការបក្ស ក្រុមប្រឹក្សាប្រជាជន គណៈកម្មាធិការប្រជាជន គណៈកម្មាធិការរណសិរ្សមាតុភូមិវៀតណាមទីក្រុង លោក ង្វៀងវុាំងខើយ មានបិយវាចាប្រសិទ្ធពរដល់ព្រះសង្ឃ អ្នកមុខអ្នកការសាសនា ពុទ្ធបរិស័ទជាមួយនឹងកម្មាភិបាល យុទ្ធជនដែលជាជនរួមជាតិខ្មែរទាំងអស់នៅលើភូមិឋាន ទទួលបុណ្យចូលឆ្នាំថ្មីប្រកបដោយសេចក្តីសុខ និងសុភមង្គល។ ទន្ទឹមនឹងនោះ សំណូមពរគណៈកម្មាធិការបក្ស រដ្ឋអំណាចបន្តច្បាមនូវភារកិច្ចនយោបាយសំខាន់ៗ អនុវត្តបានល្អនូវគោលនយោបាយជនជាតិ; ពន្លឿនល្បឿនសាងសង់ គម្រោងសំខាន់ៗ; លើកកម្ពស់គុណភាពអប់រំ សុខាភិបាល; គិតគូរជីវភាពសម្ភារៈ និងស្មារតីរបស់ជនរួមជាតិខ្មែរ។ អភិរក្សនិងពង្រីកនូវតម្លៃវប្បធម៌ប្រពៃណីដ៏ល្អរបស់ជនជាតិ; កសាងប្រព័ន្ធនយោបាយរឹងមាំនៅតំបន់ជនរួមជាតិខ្មែរ; សកម្មពង្រីកតួនាទីអ្នកមានប្រិយភាព អ្នកមុខអ្នកការសាសនាក្នុងការពង្រឹងផែនមហាសាមគ្គីទូទាំងជនជាតិ។

ថ្នាក់ដឹកនាំទីក្រុងកឹងធើ ជូនអំណោយដល់គ្រួសារខ្មែរដែលមានស្ថានភាពលំបាកនៅលើភូមិឋាន។

ស្របក្នុងឱកាសនេះ ថ្នាក់ដឹកនាំទីក្រុង បានប្រគល់ផ្ទះមហាសាមគ្គីចំនួន ១០ ខ្នង និងអំណោយ ២០ ចំណែកដល់គ្រួសារខ្មែរដែលមានស្ថានភាពលំបាក; ជូនកង់ចំនួន ១.៣០០ គ្រឿងដល់សិស្សក្រីក្រជម្នះលំបាករៀនពូកែ; ជូនអាហារូបករណ៍ចំនួន ២៥ ចំណែកដល់សិស្សក្រីក្រជម្នះលំបាករៀនពូកែរបស់សមាគមជំរុញការសិក្សាទីក្រុងកឹងធើ និងអាហារូបករណ៍ជំនួយកម្លាំងដល់ប្អូនៗដែលមានស្ថានភាពលំបាកចំនួន ១០ ចំណែក ដែលសម្រេចបានស្នាដៃល្អក្នុងការរៀនសូត្ររបស់ Viettel ទីក្រុងកឹងធើ៕

ថាញវ៉ាង - វិមាន

ចែករំលែកអត្ថបទ

ពាក្យគន្លឹះ