គោលនយោបាយ -ការរស់នៅ ច្បាប់

18/04/2026 - 05:53

អ្នកប្រើប្រាស់ទូរស័ព្ទចល័តអាចបញ្ជាក់ជាម្ចាស់ស៊ីមដោយខ្លួនឯងតាមរយៈ VNeID

អ្នកប្រើប្រាស់ទូរស័ព្ទចល័តអាចធ្វើការបញ្ជាក់ជាម្ចាស់ស៊ីម ដោយខ្លួនឯងតាមរយៈកម្មវិធី VNeID យោងតាមបទប្បញ្ញត្តិថ្មីដែលមានសុពលភាពចាប់ពីថ្ងៃទី ១៥ ខែមេសា តទៅ។

អ្នកប្រើប្រាស់ម្នាក់កំពុងកាន់កាតស៊ីមទូរស័ព្ទចល័តជាច្រើននៅក្នុងដៃ។ រូប៖ ទ្រុងដាក

ចាប់ពីពេលនេះតទៅ ប្រជាពលរដ្ឋបានផ្តល់សិទ្ធិម្ចាស់ការក្នុងការបញ្ជាក់ឡើងវិញនូវរាល់លេខទូរស័ព្ទដែលកំពុងប្រើប្រាស់តាមរយៈកម្មវិធី VNeID ជំនួសឱ្យការរង់ចាំលើក្រុមហ៊ុនបណ្តាញទូរស័ព្ទដូចមុន។

បទប្បញ្ញត្តិថ្មីនេះមានចែងក្នុងសារាចរលេខ ០៨/២០២៦ ដោយក្រសួងវិទ្យាសាស្ត្រនិងបច្ចេកវិទ្យា ដាក់ឱ្យប្រើកាលពីថ្ងៃទី ៣១ ខែមីនា ក្នុងគោលបំណងរឹតបន្តឹងស្ថានភាពស៊ីមមិនមានម្ចាស់ច្បាស់លាស់ ដែលជាមូលហេតុនាំឱ្យមានសាររំខាន ការទូរស័ព្ទរំខាន និងសកម្មភាពបោកប្រាស់ជាច្រើនក្នុងពេលកន្លង។

តាមការជាក់ស្តែង ស៊ីមជាច្រើនបានចុះឈ្មោះ តាំងពីដំណាក់កាលមុន អាចត្រូវបានឱ្យខ្ចី ឬផ្ទេរសិទ្ធិបន្ត ប៉ុន្តែមិនទាន់បានបំពេញព័ត៌មានម្ចាស់ពិតប្រាកដនៅឡើយ។ លេខទូរស័ព្ទទាំងនេះបង្កប់នូវហានិភ័យ ដែលអាចត្រូវយកទៅប្រើប្រាស់ក្នុងសកម្មភាពល្មើសច្បាប់ ដែលម្ចាស់ឈ្មោះដើមមិនបានដឹងខ្លួន។

គោលនយោបាយថ្មីអនុញ្ញាតឱ្យប្រជាពលរដ្ឋអាចស្វែងរករាល់លេខទូរស័ព្ទទាំងអស់ដែលខ្លួនឈរឈ្មោះ។ ផ្តើមពីនោះ ពួកគាត់អាចបញ្ជាក់លេខដែលកំពុងប្រើប្រាស់ និងលុបចោលលេខដែលមិនមែនខ្លួនជាអ្នកចុះឈ្មោះ ឬមិនប្រើប្រាស់ទៀត ដោយការរាយការណ៍តាមរយៈ VNeID។

ក្រោយពេលទទួលបានព័ត៌មាន ក្រុមហ៊ុនទូរគមនាគមន៍នឹងទាក់ទងទៅលេខទូរស័ព្ទដែលបានរាយការណ៍ ដើម្បីសំណូមពរឱ្យបញ្ជាក់អត្តសញ្ញាណ និងបំពេញនីតិវិធីចុះឈ្មោះឡើងវិញក្នុងរយៈពេល ៥ ថ្ងៃ។ ប្រសិនបើមិនអនុវត្តតាមទេ លេខនោះនឹងត្រូវបិទសេវាមួយទិសជាបន្ទាន់។ ក្នុងករណីនៅតែមិនព្រមដោះស្រាយ សេវានឹងត្រូវបិទទាំងពីរទិស និងធ្វើការផាត់ទាត់កិច្ចសន្យា។

ទោះជាយ៉ាងណាក៏ដោយ មិនមែនអ្នកប្រើប្រាស់ទាំងអស់សុទ្ធតែត្រូវបញ្ជាក់លេខទូរស័ព្ទឡើងវិញនោះទេ។ ចំពោះលេខទូរស័ព្ទដែលបានប្រើដើម្បីចុះឈ្មោះគណនី VNeID កម្រិត ២ ឬប្រើសម្រាប់ចុះឈ្មោះកាតអត្តសញ្ញាណប័ណ្ណ ឬអត្តសញ្ញណប័ណ្ណដែលភ្ជាប់ឈីប នឹងត្រូវលើកលែង វៀរលែងតែមានការផ្លាស់ប្តូរទូរស័ព្ទ ក្រោយថ្ងៃទី ១៥ ខែមិថុនា។

ចំណុចគួរឱ្យកត់សម្គាល់មួយទៀតគឺបទប្បញ្ញត្តិ ពាក់ព័ន្ធនឹងការផ្លាស់ប្តូរទូរស័ព្ទ។ ចាប់ពីថ្ងៃទី ១៥ ខែមិថុនា នៅពេលអ្នកប្រើប្រាស់ប្តូរទៅប្រើទូរស័ព្ទថ្មី ពួកគាត់ត្រូវតែធ្វើការបញ្ជាក់អត្តសញ្ញាណឡើងវិញតាមរយៈជីវមាត្រ។ ប្រសិនបើមិនទាន់បានបំពេញទេ លេខទូរស័ព្ទនឹងត្រូវផ្អាកការទូរស័ព្ទនិងការផ្ញើសារជាបណ្តោះអាសន្ន។

បទប្បញ្ញត្តិនេះដើម្បីដោះស្រាយស្ថានភាពដែលអ្នកប្រើប្រាស់ធ្វើឱ្យបាត់ ឬជ្រុះបាត់ស៊ីម ប៉ុន្តែមិនបានបិទលេខទាន់ពេលវេលា ដែលបង្កចន្លោះឱ្យជនទុច្ចរិតកេងចំណេញ។ នេះក៏ជាដំណោះស្រាយបច្ចេកទេសដើម្បីប្រឆាំងនឹងការទិញលក់ស៊ីម ដែលបានបើកដំណើរការស្រាប់។ ការបន្ថែមទម្រង់បញ្ជាក់អត្តសញ្ញាណតាមជីវមាត្រគឺ ជាដំណោះស្រាយចាំបាច់ ដូចទៅនឹងវិធីសាស្ត្រដែលបណ្តាធនាគារកំពុងអនុវត្ត ដើម្បីពង្រឹងសុវត្ថិភាព។

មុននោះ ដើម្បីដោះស្រាយស្ថានភាពស៊ីមគ្មានម្ចាស់ ស្ថាប័នគ្រប់គ្រងបានដាក់ចេញនូវដំណោះស្រាយជាច្រើនដូចជា ច្បាប់ទូរគមនាគមន៍ឆ្នាំ ២០២៣ និងអនុក្រឹត្យលេខ ១៦៣/២០២៤ ដែលតម្រូវឱ្យព័ត៌មានអ្នកប្រើប្រាស់ត្រូវតែស្របគ្នាជាមួយទិន្នន័យប្រជាជន ព្រមទាំងកំណត់ច្បាស់នូវការទទួលខុសត្រូវរបស់អាជីវកម្មនិងអ្នកប្រើប្រាស់។

សារាចរលេខ ០៨/២០២៦ គឺជាជំហានបន្ទាប់សំដៅទៅរកទិសដៅដែលលេខទូរស័ព្ទនីមួយៗ ត្រូវភ្ជាប់ជាមួយអត្តសញ្ញាណដែលបានបញ្ជាក់ច្បាស់លាស់។ ជាមួយនឹងគោលនយោបាយថ្មីនេះ ប្រជាពលរដ្ឋមានឧបករណ៍បន្ថែមដើម្បីការពារខ្លួនឯង ដោយមិនចាំបាច់អនុវត្តប្រតិបត្តិការច្រើន។ ភាគច្រើនដំណើរការបញ្ជាក់អត្តសញ្ញាណ ការត្រួតពិនិត្យនិងការវិនិច្ឆ័យទិន្នន័យគឺអាស្រ័យក្រុមហ៊ុន ទូរគមនគមន៍សហការជាមួយស្ថាប័នមានសមត្ថកិច្ចអនុវត្ត៕

ប្រភព៖ vnexpress.net - សុផន

ចែករំលែកអត្ថបទ

ពាក្យគន្លឹះ