គោលនយោបាយ -ការរស់នៅ គោលនយោបាយ

14/04/2026 - 05:57

ជនរួមជាតិខ្មែររីករាយទទួលអំណរបុណ្យចូលឆ្នាំថ្មីប្រពៃណី ឆ្នាំ២០២៦

ក្នុងបរិយាកាសអឹកធឹកនៃបុណ្យចូលឆ្នាំថ្មីប្រពៃណីខ្មែរ ឆ្នាំ២០២៦ ជីវភាពរបស់ជនរួមជាតិខ្មែរនៅតំបន់វាលរាបទន្លេគឺវឡុងកាន់តែរីកចម្រើន អាស្រ័យអនុវត្តន៍មានប្រសិទ្ធភាពនូវគោលនយោបាយជនជាតិសម្រាប់តំបន់ជនជាតិភាគតិច។

នៅទីក្រុងកឹងធើ ការអនុវត្តមានប្រសិទ្ធភាព កម្មវិធីទិសដៅជាតិ អភិវឌ្ឍន៍សេដ្ឋកិច្ច -សង្គមតំបន់ជនជាតិភាគតិច (ហៅកាត់ថា កម្មវិធី) ដំណាក់កាល ២០២១ - ២០២៥ បានសម្រេចលទ្ធផលវិជ្ជមានជាច្រើន។ តាមរយៈគម្រោង ១ ស្តីពីការដោះស្រាយបញ្ហាខ្វះលំនៅឋាន ដីសង់លំនៅឋាន ដីផលិត និងទឹកស្អាតប្រើប្រាស់ ជាមួយនឹងថវិកាសរុបជាង ៣១ ពាន់លានដុង ទីក្រុងបានផ្ដល់ជូនដីសង់លំនៅឋានដល់ ៣០៦ គ្រួសារ សាងសង់និងជួសជុលលំនៅឋាន ៣.៣៣៤ ខ្នង ឧបត្ថម្ភផ្លាស់ប្ដូរមុខរបរ ៥.៨០២ ករណី និងផ្គត់ផ្គង់ទឹកស្អាតប្រើប្រាស់ដាច់ដោយឡែកដល់គ្រួសារចំនួន ៣.២១៦ គ្រួ។ ផ្ដើមពីនោះ បានរួមចំណែកក្នុងការកែលម្អលក្ខណៈជីវភាព បង្កើតមុខរបរលំនឹងនិងលើកកម្ពស់គុណភាពជីវភាពរបស់ជនរួមជាតិ។

ប្រជាជនទទួលបានការឧបត្ថម្ភសាងសង់ផ្ទះថ្មីតាមរយៈកម្មវិធី។

លោកស៊ើងសិន ជាអ្នកមានប្រិយភាពនៅភូមិទីបញ៉ឹក ឃុំតាយវុាំង ទីក្រុងកឹងធើ ចែករំលែក៖ “អាស្រ័យការយកចិត្តទុកដាក់និងវិនិយោគពីកម្មវិធី ជីវភាពរបស់ជនរួមជាតិខ្មែរកាន់តែលំនឹងពីមួយថ្ងៃទៅមួយថ្ងៃ ផ្លូវថ្នល់ស្អាតបាត ផ្ទះសម្បែងសមរម្យរឹងមាំ។ មាមីងសប្បាយរីករាយទទួលអំណរបុណ្យចូលឆ្នាំថ្មីប្រកបដោយភាពសម្បូរសប្បាយនិងសុភមង្គល”។

នៅខេត្តអាងយ៉ាង ប្រព័ន្ធហេដ្ឋារចនាសម្ព័ន្ធនៅតំបន់ជនរួមជាតិខ្មែរ ក៏បានវិនិយោគព្រមៗគ្នា។ តាមរយៈប្រភពទុនរបស់គម្រោង ៤ កម្មវិធី គួបផ្សំនឹងប្រភពទុនចលនាក្នុងសង្គម ភូមិភាគបានកសាងផ្លូវជនបទប្រវែង ១១៨ គីឡូម៉ែត្រ កសាងថ្មីនិងជួសជុលស្ពាន ២៧ កន្លែង កែលម្អសាលារៀន ២កន្លែង វិនិយោគសំណង់ធារាសាស្ត្រចំនួន ២ និងថែទាំ ជួសជុលសំណង់ផ្លូវគមនាគមន៍ ២១ កន្លែង ដោយសរុបថវិកាជាង ៣០០ ពាន់លានដុង។ ឆ្លងតាមរយៈនោះ ហេដ្ឋារចនាសម្ព័ន្ធកាន់តែសុក្រឹត បង្កលក្ខណៈងាយស្រួលសម្រាប់ការអភិវឌ្ឍផលិតនិងលើកស្ទួយជីវភាពប្រជាជន។

លោកយ័ញភុក នាយកមន្ទីរជនជាតិនិងសាសនាខេត្តអាងយ៉ាង ឱ្យដឹង៖ “ឆ្នាំ ២០២៥ សរុបប្រភពទុនសម្រាប់វិនិយោគអភិវឌ្ឍន៍ដែលអនុវត្តកម្មវិធីសម្រេចដល់ជាង ១២២ ពាន់លានដុង ដោយផ្តល់ផ្ទេរថវិកា ១០០%។ ប្រភពទុននេះ ផ្តោតលើការវិនិយោគហេដ្ឋារចនាសម្ព័ន្ធចាំបាច់ ជំនួយអភិវឌ្ឍការផលិតតាមខ្សែសង្វាក់តម្លៃ បង្កមុខរបរចិញ្ចឹមជីវិតស្ថិរភាព។ អាស្រ័យហេតុនោះ មានទម្រង់ផលិតជាច្រើនបានបង្កើតឡើង រចនាសម្ព័ន្ធកម្លាំងពលកម្មតាមទិសដៅវិជ្ជមាន ប្រាក់ចំណូលរបស់ប្រជាជនបានកែលម្អ”។

ជាមួយនឹងភាពរីកចម្រើននោះ ក្នុងអំឡុងពេលបុណ្យចូលឆ្នាំថ្មីប្រពៃណី ឆ្នាំ ២០២៦ នេះ ភូមិ ស្រុកកាន់តែមានភាពអឹកធឹកជាងពេលណាៗទាំងអស់។ នៅតាមវត្តព្រះពុទ្ធសាសនាខ្មែរ បានជួសជុលនិងតុបតែងលម្អយ៉ាងស្រស់ស្អាត នៅតាមភូមិស្រុកផ្ទះសម្បែងក៏មានភាពរឹងមាំ បានបង្កជាទិដ្ឋភាពថ្មីសម្រាប់តំបន់ជនបទ។ មាមីងជនរួមជាតិខ្មែរមានឱកាសរៀបចំទទួលបុណ្យចូលឆ្នាំថ្មីដោយហ្មត់ចត់ ពិធីបុណ្យប្រពៃណីត្រូវបានរៀបចំយ៉ាងអធិកអធមនិងកក់ក្តៅ រួមចំណែកក្នុងការបង្កើនសាមគ្គីភាពសហគមន៍ និងធ្វើឱ្យសាយភាយតម្លៃវប្បធម៌ប្រពៃណីដ៏ផូរផង់របស់ជនរួមជាតិ៕

ហុងទើ - ពេជ្រសឿន

ចែករំលែកអត្ថបទ

ពាក្យគន្លឹះ