គោលនយោបាយ -ការរស់នៅ ការរស់នៅ

08/04/2026 - 06:17

រីករាយទទួលអំណរបុណ្យចូលឆ្នាំថ្មីក្នុងផ្ទះថ្មី

នៅឃុំលិចហូយធឿង មានផ្ទះរឹងមាំជាច្រើនខ្នងបានសាងសង់ឡើងជំនួសផ្ទះចាស់ទ្រុឌទ្រោម ដែលបញ្ជាក់ពីការយកចិត្តទុកដាក់គិតគូររបស់បក្ស រដ្ឋ និងរដ្ឋអំណាចភូមិភាគចំពោះជនរួមជាតិ។

ប្តីប្រពន្ធបងត្រឹងវ៉ូវដា នៅភូមិហូយទ្រុង មានក្ដីរំភើបរីករាយក្នុងផ្ទះថ្មី។

លោកឡេវុាំងថាំង ជាគ្រួសារជនជាតិខ្មែរនៅភូមិយ៉ុងយឿ បានរ៉ាយរ៉ាប់ទាំងក្តីរំភើប៖ “ក្រោយពីបំពេញភារកិច្ចនៅសមរភូមិកម្ពុជា ឆ្នាំ ១៩៨៦ ខ្ញុំបានមកស្រុកកំណើត។ គ្រានោះ ជីវភាពគ្រួសារជួបការលំបាកខ្លាំងនិងគ្មានដីផលិត។ ប្តីប្រពន្ធខ្ញុំធ្វើការឈ្នួលជុំឆ្នាំ តាំងពីការដកស្មៅ ឆ្លូកស្រូវជាដើម ប៉ុន្តែចំណូលមិនទៀងទាត់។ ផ្ទះទ្រុឌទ្រោម គ្មានលទ្ធភាពជួសជុលឬសាងសង់ថ្មី។ អាស្រ័យបានរដ្ឋឧបត្ថម្ភសាងសង់ផ្ទះថ្មី ក្នុងឱកាសចូលឆ្នាំថ្មីឆ្នាំនេះ គ្រួសារខ្ញុំបានទទួលអំណរឆ្នាំថ្មីក្នុងផ្ទះថ្មីយ៉ាងសមរម្យ និងមានភាពកក់ក្ដៅជាងមុន”។

ដោយឡែកចំពោះគ្រួសារបង ត្រឹងវ៉ូវដា នៅភូមិហូយទ្រុង ជាគ្រួសារមួយក្នុងចំណោមគ្រួសារ ដែលទទួលបានការឧបត្ថម្ភផ្ទះពីកម្មវិធីបំបាត់ផ្ទះបណ្ដោះអាសន្ន ផ្ទះទ្រុឌទ្រោម។ បងដា ឱ្យដឹង៖ “គ្រួសារខ្ញុំជាគ្រួសារក្រីក្រ និងគ្មានដីបង្កបង្កើនផល។ អាស្រ័យដោយរដ្ឋឧបត្ថម្ភថវិកាចំនួន ៦០ លានដុង រួមជាមួយប្រាក់សន្សំរបស់គ្រួសារ ទើបខ្ញុំសាងសង់បានផ្ទះថ្មីរឹងមាំ។ គ្រួសារខ្ញុំសប្បាយចិត្តណាស់ ព្រោះមានកន្លែងរស់នៅលំនឹង មិនបារម្ភភ្លៀងស្រក់ទៀត។ មានផ្ទះថ្មី ខ្ញុំកាន់តែមានកម្លាំងចិត្តខិតខំរកស៊ី។ ក្រៅពីនោះ រដ្ឋអំណាចភូមិភាគថែមទាំងបានឧបត្ថម្ភម៉ូតូមួយគ្រឿង ដើម្បីប្រើជាមធ្យោបាយទៅធ្វើការងារ ដោះស្រាយជីវភាពគ្រួសារផងដែរ”។

លោកផាងម៉ាញលៀក ប្រធានការិយាល័យវប្បធម៌ - សង្គម ឃុំលិចហូយធឿង ឱ្យដឹង៖ “ក្នុង ឆ្នាំ ២០២៥ ភូមិភាគបានជំរុញការសាងសង់ផ្ទះជូនគ្រួសារដែលកំពុងរស់នៅក្នុងផ្ទះបណ្ដោះអាសន្ន ផ្ទះទ្រុឌទ្រោម ពិសេសគឺគ្រួសារក្រីក្រ គ្រួសារក្បែរក្រ គ្រួសារគោលនយោបាយ និងគ្រួសារដែលមានជីវភាពលំបាក។ ដំណើរការអនុវត្តតែងធ្វើឡើងដោយបើកចំហ តម្លាភាព ចំមុខសញ្ញា ជៀសវាងការផ្ទួនឬឆ្លកមុខសញ្ញា។ តាមរយៈនោះ ឃុំបានជួយឧបត្ថម្ភសាងសង់ថ្មីនិងជួសជុលផ្ទះបាន ១១៧ ខ្នង សរុបទឹកប្រាក់ជាង ៨ ពាន់លានដុង ដើម្បីជួយមាមីងមានកន្លែងនៅលំនឹង និងឈានឡើងក្នុងជីវភាព”។

មាមីងខ្មែរនៅឃុំលិចហូយធឿង ទទួលអំណរបុណ្យចូលឆ្នាំថ្មីក្នុងផ្ទះថ្មីដ៏កក់ក្តៅ ដែលនេះមិនត្រឹមតែជាក្តីសប្បាយរីករាយក្នុងឱកាសបុណ្យទានប៉ុណ្ណោះទេ ថែមទាំងបញ្ជាក់ឱ្យឃើញនូវការផ្លាស់ប្តូរយ៉ាងច្បាស់ក្រឡែតក្នុងជីវភាពរស់នៅរបស់មាមីងជនជាតិខ្មែរផងដែរ។ ការរស់នៅក្នុងផ្ទះរឹងមាំនិងមានសុវត្ថិភាព បានជួយឱ្យមីងកាន់តែមានទំនុកចិត្តនិងកម្លាំងជំរុញ ដើម្បីខិតខំឈានឡើងកសាងជីវភាពឱ្យកាន់តែស្ថិរភាពនិងធូរធារជាងមុន។ នេះក៏ជាលទ្ធផលនៃការយកចិត្តទុកដាក់ និងការរួមដំណើររបស់គ្រប់ថ្នាក់ គ្រប់ផ្នែក ក្នុងការគិតគូរដល់ជីវភាពរស់នៅជូនជនជាតិភាគតិចផងដែរ៕

ដាលីន - ថាច់ធី

ចែករំលែកអត្ថបទ

ពាក្យគន្លឹះ