គោលនយោបាយ -ការរស់នៅ ការរស់នៅ

03/04/2026 - 08:44

នារីខ្មែរម្ចាស់ការដាំដំណាំផ្លាស់ប្តូរពូជដំណាំសុវត្ថិភាព

សាខាសមាគមនារីភូមិហ្វាហេប ឃុំឡាយហ្វា ទីក្រុងកឹងធើ មានសមាជិកា ១៨៥ រូប ដែលភាគច្រើនជាជនជាតិភាគតិច។ ក្នុងឆ្នាំ ២០២២ សមាគមសហព័ន្ធនារីឃុំឡាយហ្វា បានបង្កើតក្រុមសហការ "នារីដាំដំណាំផ្លាស់ប្តូរពូជដំណាំតាមទិសដៅសុវត្ថិភាព" ដែលមានសមាជិកា ១០ រូប ក្នុងគោលបំណងបង្កលក្ខណៈងាយស្រួលក្នុងការចងសម្ព័ន្ធផលិត ចែករំលែកបទពិសោធន៍ និងលើកកម្ពស់ចំណូល។ មកដល់ពេលនេះ ទម្រង់នេះបាននឹងកំពុងពង្រីកប្រសិទ្ធភាពជាបណ្តើរៗ។

បណ្តាសមាជិកក្រុមសហការប្រមូលផលដំណាំដើម្បីឈ្មួញមកប្រមូលទិញ។

បច្ចុប្បន្ន ក្រុមសហការមានសមាជិកា ១៣ រូប និងទាក់ទាញបានគ្រួសារសមាជិកានារីចំនួន ៥០ គ្រួសារផ្សេងទៀត ចុះឈ្មោះដើម្បីទទួលបានការណែនាំអំពីបច្ចេកទេសដាំដំណាំតាមទិសដៅសុវត្ថិភាព។

តាមលោកស្រី វ៉ាំងធីអាញ់ហុង អនុប្រធានគណៈកម្មាធិការរណសិរ្សមាតុភូមិវៀតណាមឃុំ និងជាប្រធានសមាគមសហព័ន្ធនារីឃុំឡាយហ្វា បានឱ្យដឹងថា ក្រុមសហការត្រូវបានបង្កើតឡើងក្នុងគោលដៅអភិវឌ្ឍសេដ្ឋកិច្ច ទន្ទឹមនឹងការការពារបរិស្ថាន និងសុខភាពសហគមន៍។ ដូច្នេះ សមាជិកាដែលចូលរួមត្រូវធានានូវលក្ខខណ្ឌចាំបាច់ ជាពិសេសគឺមានផ្ទៃដីដាំដុះទូលាយ និងអនុវត្តតាមការណែនាំ។ បងប្អូននារីបានអនុវត្តតាមវិធានដាំដំណាំសុវត្ថិភាព ជ្រើសរើសពូជដែលសមស្របទៅនឹងលក្ខណៈដីធ្លី និងអាកាសធាតុនៅភូមិភាគ។ អាស្រ័យហេតុនេះ ប្រសិទ្ធភាពសេដ្ឋកិច្ចត្រូវបានលើកកម្ពស់យ៉ាងច្បាស់ក្រឡែត ដោយប្រាក់ចំណេញមធ្យមប្រចាំឆ្នាំរបស់សមាជិកាមានស្ថិរភាព ហើយកម្រិតខ្ពស់បំផុតអាចសម្រេចបានប្រហែល ៥០ លានដុង។

ចំណុចលេចធ្លោនៅក្នុងវិធីសាស្ត្រដាំដុះនេះ គឺការដាំផ្លាស់ប្តូរពូជដំណាំ និងដាំឆ្លាស់គ្នានូវបន្លែបង្ការជាច្រើនប្រភេទក្នុងមួយឆ្នាំ។ ជំនួសឱ្យការដាំដំណាំតែមួយប្រភេទលើផ្ទៃដីដដែល បងប្អូននារីបានម្ចាស់ការបង្វែររចនាសម្ព័ន្ធដំណាំតាមរដូវកាល។ ការផ្លាស់ប្តូរមុខដំណាំជួយឱ្យដីស្តារឡើងវិញនូវជាតិបំប៉ន កាត់បន្ថយសត្វល្អិតដង្កូវ បន្ថយការចំណាយលើថ្នាំការពាររុក្ខជាតិ និងបង្កើនទិន្នផល។ មុនពេលចុះពូជ ដីត្រូវបានកែច្នៃដោយប្រើជីសរីរាង្គ និងជីផ្អាប់ដើម្បីបង្កើនភាពជីជាតិ។ ក្នុងដំណើរការថែទាំ បងប្អូននារីផ្តល់អាទិភាពដល់ការប្រើប្រាស់វិធានការជីវសាស្ត្រ ដើម្បីធានាបាននូវបន្លែស្អាត និងសុវត្ថិភាពសម្រាប់អ្នកប្រើប្រាស់។ នៅពេលប្រមូលផល ផលិតផលត្រូវបានបែងចែកប្រភេទ វេចខ្ចប់ និងដឹកជញ្ជូនទៅកាន់ផ្សារបោះដុំ ដែលជួយបង្កើនតម្លៃកសិផល។

បងស្រី ហ្វិញធីម៉ាស៊ី សមាជិកាក្រុមសហការ បានចែករំលែក៖ "តាំងពីចូលរួមក្រុមសហការ និងទទួលបានការហ្វឹកហ្វឺនបច្ចេកទេស ក៏ដូចជាការដោះដូរបទពិសោធន៍ជាមួយបងប្អូននារីផ្សេងទៀត ខ្ញុំបានដាច់ចិត្តដាំផ្លាស់ប្តូរមុខដំណាំជាច្រើនប្រភេទ។ ជាក់ស្តែងដូចជាឆ្នាំនេះ ខ្ញុំដាំផ្លាស់ប្តូររវាងម្រះនិងស្ពៃខៀវ។ លើកប្រមូលផលស្ពៃកន្លង សម្រេចបានទិន្នផល ៤ តោនក្នុងមួយកុង (១.០០០ ម៉ែត្រការ៉េ) ដោយឈ្មួញទិញក្នុងតម្លៃ ១៣.០០០ ដុងក្នុងមួយគីឡូក្រាម។ ក្រៅពីនេះ ខ្ញុំនៅទទួលបានការណែនាំអំពីការកាត់បន្ថយការប្រើប្រាស់ថ្នាំគីមី ការរក្សាប្រភពទឹក និងការចាត់ចែងកាកសំណល់កសិកម្មបានត្រឹមត្រូវ"។

ដោយការទ្រាំលំបាករៀនសូត្របច្ចេកទេសថ្មីរាល់ឆ្នាំគ្រួសារបងម៉ាសី មានចំណូលពី៣០-៥០លានដុង។

បងស្រី ត្រឹងធីសានី ប្រធានក្រុមសហការ បានឱ្យដឹង៖ "យើងខ្ញុំបានកម្មាភិបាលផ្សព្វផ្សាយកសិកម្ម ហ្វឹកហ្វឺននូវចំណេះដឹងអំពីបច្ចេកទេសដាំដំណាំសុវត្ថិភាព វិធីជ្រើសរើសពូជឱ្យសមស្របនឹងអាកាសធាតុ និងការបង្ការសត្វល្អិតចង្រៃប្រកបដោយប្រសិទ្ធភាព។ ចំណុចគួរឱ្យកត់សម្គាល់គឺទម្រង់នេះ បានបង្កើតនូវខ្សែចង្វាក់តភ្ជាប់ការប្រើប្រាស់ផលិតផល។ បន្ទាប់ពីការប្រមូលផលមួយលើកៗ ក្រុមសហការបានចាត់តំណាងឱ្យដើរប្រមូលបន្លែបង្ការរបស់សមាជិកា ដើម្បីបញ្ជូនទៅលក់នៅតាមផ្សារបោះដុំ រួមចំណែកធ្វើឱ្យច្រកចេញមានស្ថិរភាព និងកាត់បន្ថយសភាព "បានផលតែថោកថ្លៃ"។

នៅកណ្តាលតំបន់ជនបទនៃភូមិហ្វាហេប ឃុំឡាយហ្វា វាលស្រែខៀវស្រងាត់ដែលដុះបន្តបន្ទាប់គ្នាតាមរដូវកាល គឺជាសក្ខីភាពរស់រវើកនៃប្រសិទ្ធភាពនៃទម្រង់ "នារីដាំដំណាំផ្លាស់ប្តូរពូជដំណាំតាមទិសដៅសុវត្ថិភាព"។ វាមិនត្រឹមតែនាំមកនូវប្រភពចំណូលមានស្ថិរភាពសម្រាប់គ្រួសារជាច្រើន ជាពិសេសគឺនារីជនជាតិខ្មែរប៉ុណ្ណោះទេ ទម្រង់នេះថែមទាំងរួមចំណែកផ្លាស់ប្តូរផ្នត់គំនិតផលិត ឆ្ពោះទៅរកវិស័យកសិកម្មបៃតង ស្ថេរភាព និងដិតដិតជាមួយបរិស្ថាន៕

អត្ថបទនិងរូប៖ សុងឡេ - ចន្ថា

ចែករំលែកអត្ថបទ

ពាក្យគន្លឹះ