ព្រឹត្តិការណ៍ - នយោបាយ ព្រឹត្តិការណ៍

25/03/2026 - 06:10

ប្រគល់ជូនផែនទីប្រទេសវៀតណាមនៅទីក្រុងកឹងធើ

កាសែតសៃហ្កងយ៉ាយផុង បានសហការជាមួយធនាគារកសិកម្មនិងអភិវឌ្ឍន៍ជនបទវៀតណាម អនុវត្តកម្មវិធី "ប្រគល់ជូនផែនទីប្រទេសជាតិ - មោទនភាពមាតុភូមិ" ជាមួយនឹងទិសស្លោក "ផែនទីក្នុងដៃ - មាតុភូមិក្នុងបេះដូង" សំដៅបើកទូលាយការប្រគល់ជូនដល់ ៣៤ ខេត្ត ក្រុងនិងមិត្តអ្នកអានទូទាំងប្រទេស។

គណៈប្រតិភូនៃកាសែតសៃហ្កងយ៉ាយផុង បានចាត់តាំងពិធីប្រគល់ជូនផែនទីប្រទេសវៀតណាមជូនទីក្រុងកឹងធើ។ អញ្ជើញចូលរួមនិងទទួលផែនទី មានលោកស្រី ង្វៀងធីង៉ុកដេប អនុប្រធានគណៈកម្មាធិការប្រជាជនទីក្រុងកឹងធើ រួមជាមួយថ្នាក់ដឹកនាំនៃមន្ទីរ គណៈ និងផ្នែកនានារបស់ទីក្រុង។

លោកស្រី ង្វៀងធីង៉ុកដេប ថ្លែងការណ៍ក្នុងកម្មវិធី។

លោកស្រី ប៉ូយធីហុងសឿង អគ្គនិពន្ធនាយិការងនៃកាសែត សៃហ្កងយ៉ាយផុង បានផ្តល់ព័ត៌មាន៖ ក្រោយពីរដ្ឋសភាអនុម័តសេចក្តីសម្រេចលេខ ២០២/២០២៥/QH១៥ ស្តីពីការរៀបចំអង្គភាពរដ្ឋបាលថ្នាក់ខេត្តឆ្នាំ ២០២៥ កាសែតសៃហ្កងយ៉ាយផុង បានសហការជាមួយមជ្ឈមណ្ឌលហេដ្ឋារចនាសម្ព័ន្ធទិន្នន័យលំហភូមិសាស្ត្រ (នាយកដ្ឋានវាស់វែង ផែនទីនិងព័ត៌មានភូមិសាស្ត្រវៀតណាម ក្រសួងកសិកម្មនិងបរិស្ថាន) រៀបរៀងនិងបោះពុម្ពផ្សាយផែនទីប្រទេសវៀតណាម - អង្គភាពរដ្ឋបាលថ្នាក់ខេត្ត ដោយប្រើទិន្នន័យភូមិសាស្ត្រជាតិក្នុងខ្នាត ១/៤.៥០០.០០០។

ផែនទីមានទំហំ ៧០x១០០ សង់ទីម៉ែត្រ បោះពុម្ពគុណភាពខ្ពស់ ស្រោបឈើ និងមានស៊ុមអ៊ីណុកយ៉ាងរឹងមាំ ងាយស្រួលសម្រាប់ការដាក់តាំង និងមានភាពរស់រវើក។ ចាប់តាំងពីពាក់កណ្តាលឆ្នាំ ២០២៥ មកទល់ពេលនេះ កាសែតសៃហ្កងយ៉ាយផុង បានសហការជាមួយអ្នកឧបត្ថម្ភបោះពុម្ពនិងចែកចាយផែនទីចំនួន ១០០.០០០ ច្បាប់ ដើម្បីប្រគល់ជូនមិត្តអ្នកអាន; ផ្តល់ជូនបណ្តាសង្កាត់ ឃុំ និងតំបន់រដ្ឋបាលពិសេសនៃទីក្រុងហូជីមិញ។

លោកស្រី ប៉ូយធីហុងសឿង ផ្តល់ព័ត៌មានអំពីកម្មវិធី។

ដើម្បីបន្តកម្មវិធីនេះ កាសែតសៃហ្កងយ៉ាយផុង បានសហការជាមួយធនាគារកសិកម្ម និងអភិវឌ្ឍន៍ជនបទវៀតណាម (Agribank) អនុវត្តកម្មវិធី "ប្រគល់ជូនផែនទីប្រទេសជាតិ - មោទនភាពមាតុភូមិ" ជាមួយទិសស្លោក "ផែនទីក្នុងដៃ - មាតុភូមិក្នុងបេះដូង" សំដៅបើកទូលាយការប្រគល់ជូនដល់ ៣៤ ខេត្ត ក្រុងនិងមិត្តអ្នកអានទូទាំងប្រទេស។ នេះគឺជាសកម្មភាពជាក់ស្តែង រួមចំណែកក្នុងការឃោសនា អប់រំប្រពៃណីស្នេហាជាតិ លើកកម្ពស់ការយល់ដឹងអំពីអធិបតេយ្យភាពទឹកដីប្រទេសជាតិ;ព្រមទាំងបណ្តុះស្មារតីទទួលខុសត្រូវនៃគណៈកម្មាធិការគ្រប់ថ្នាក់ គ្រប់ផ្នែក និងប្រជាជនក្នុងបុព្វហេតុកសាងនិងការពារមាតុភូមិ។

លោកស្រី ប៉ូយធីហុងសឿង ប្រគល់ផែនទីប្រទេសវៀតណាមជូនលោកស្រី ង្វៀងធីង៉ុកដេប ។

លោកស្រី ង្វៀងធីង៉ុកដេប បានថ្លែងអំណរគុណចំពោះកាសែតសៃហ្កងយ៉ាយផុង ជាមួយនឹងកម្មវិធីដ៏មានអត្ថន័យនេះ។ ថ្នាក់ដឹកនាំទីក្រុងក៏បានផ្តល់ព័ត៌មានអំពីស្ថានភាពសេដ្ឋកិច្ច-សង្គមរបស់ទីក្រុង ហើយសង្ឃឹមថានឹងបន្តទទួលបានការគាំទ្រពីកាសែតសៃហ្កងយ៉ាយផុង ក៏ដូចជាអង្គភាពឧបត្ថម្ភ ដើម្បីមានបន្ថែមផែនទីជាច្រើនទៀតបានទៅដល់ដៃប្រជាជននៅទីក្រុង៕