ព្រឹត្តិការណ៍ - នយោបាយ ព្រឹត្តិការណ៍

21/03/2026 - 18:34

នាយករដ្ឋមន្ត្រី ផាមមិញជិញ

ស្នើខ្ចីកញ្ចប់ថវិការដ្ឋសម្រាប់មូលនិធិរក្សាលំនឹងថ្លៃប្រេងសាំង

នាយករដ្ឋមន្ត្រី ផាមមិញជិញ បានអញ្ជើញជាអធិបតីក្នុងកិច្ចប្រជុំគណៈប្រចាំការរដ្ឋាភិបាល អំពីប្រភពថវិកាជំនួយសម្រាប់រក្សាលំនឹងថ្លៃប្រេងសាំង។

យោងតាមរបាយការណ៍ និងមតិយោបល់ក្នុងកិច្ចប្រជុំ ចំពោះមុខការវិវត្តនៃស្ថានភាពនៅមជ្ឈិមបូព៌ា និងការលំបាកនៅលើទីផ្សារប្រេងកាតពិភពលោក ក្នុងរយៈពេលប៉ុន្មានថ្ងៃកន្លងមកនេះ រដ្ឋាភិបាល និងនាយករដ្ឋមន្ត្រីបានចាត់តាំងកិច្ចប្រជុំជាច្រើន និងបានចេញសារលេខសំណូមពរអនុវត្តនូវរាល់វិធានការឆ្លើយតបឱ្យបានទាន់ពេល បត់បែន និងមានប្រសិទ្ធភាព ដើម្បីធានាសន្តិសុខថាមពលក្នុងប្រទេស។ នាយករដ្ឋមន្ត្រីក៏បានពិភាក្សាតាមទូរស័ព្ទ និងផ្ញើលិខិតផ្លូវការទៅកាន់ថ្នាក់ដឹកនាំនៃបណ្តាប្រទេសជាច្រើន ក៏ដូចជាធ្វើការជាមួយឯកអគ្គរដ្ឋទូតបណ្តាប្រទេសប្រចាំនៅវៀតណាម ដើម្បីស្នើសុំការគាំទ្រដល់វៀតណាមក្នុងការធានាសន្តិសុខថាមពល។

នាយករដ្ឋមន្ត្រី ផាមមិញជិញ អញ្ជើញជាអធិបតីក្នុងកិច្ចប្រជុំគណៈប្រចាំការរដ្ឋាភិបាល ដើម្បីផ្តល់មតិយោបល់លើបណ្តាគោលនយោបាយពីផ្ទះសង្គម និងប្រភពថវិកាសម្រាប់រក្សាលំនឹងថ្លៃប្រេងសាំង។ រូបថត៖ យឿងយ៉ាង

អនុវត្តកិច្ចចង្អុលការរបស់នាយករដ្ឋមន្ត្រី បណ្តាក្រសួង ស្ថាប័ន និងអង្គភាពពាក់ព័ន្ធបានដកប្រាក់ពីមូលនិធិរក្សាលំនឹងថ្លៃប្រេងសាំង និងកែសម្រួលពន្ធលើមុខទំនិញប្រេងសាំង ដើម្បីជួយសម្រួលដល់ថ្លៃប្រេងសាំង។ បណ្តាសម្ព័ន្ធក្រុមហ៊ុន អាជីវកម្មនានាបានបង្កើនការផលិត និងផ្គត់ផ្គង់ប្រេងសាំង ធ្យូងថ្ម អគ្គិសនី និងឧស្ម័នសម្រាប់ខឿនសេដ្ឋកិច្ច។ អនុវត្តការផ្លាស់ប្តូរថាមពល ដោយមានផលិតផលថ្មីៗជំនួសឱ្យឥន្ធនៈហ្វូស៊ីលជាបណ្តើរៗ ជំរុញចលនាប្រើប្រាស់ថាមពលដោយសន្សំសំចៃ និងមានប្រសិទ្ធភាព ព្រមទាំងបង្កើនការត្រួតពិនិត្យ និងចាត់វិធានការចំពោះរាល់សកម្មភាពរត់ពន្ធ ការស្តុកទុកទំនិញបង្កើនថ្លៃ និងការកេងចំណេញក្នុងការធ្វើអាជីវកម្មប្រេងសាំង។

ថ្លែងការណ៍បូកសរុប នាយករដ្ឋមន្ត្រី ផាមមិញជិញ បានបញ្ជាក់ច្បាស់ថា ទិសដៅខ្ពស់បំផុតគឺមិនទុកឱ្យខ្វះថាមពល និងប្រេងសាំងក្នុងករណីណាក៏ដោយ កាត់បន្ថយផលប៉ះពាល់អវិជ្ជមានពីស្ថានភាពវិបត្តិថាមពលដល់ការគ្រប់គ្រងម៉ាក្រូសេដ្ឋកិច្ច មិនឱ្យមានការកាត់ផ្តាច់ខ្សែសង្វាក់ផ្គត់ផ្គង់ ដំណើរការផលិត ធ្វើអាជីវកម្ម និងការប្រើប្រាស់របស់ប្រជាជន។

នាយករដ្ឋមន្ត្រី ផាមមិញជិញ អញ្ជើញជាអធិបតីក្នុងកិច្ចប្រជុំគណៈប្រចាំការរដ្ឋាភិបាល ដើម្បីផ្តល់មតិយោបល់លើបណ្តាគោលនយោបាយពីផ្ទះសង្គម និងបញ្ហានានាដែលពាក់ព័ន្ធ។ រូបថត៖ យឿងយ៉ាង

ដើម្បីសម្រេចបាននូវទិសដៅទាំងនេះ យើងបានអនុវត្តគោលនយោបាយមួយចំនួន ក្នុងនោះមានគោលនយោបាយរក្សាលំនឹងថ្លៃប្រេងសាំងតាមបទប្បញ្ញត្តិ។ ទោះជាយ៉ាងណាក៏ដោយ ចំពោះមុខស្ថានភាពវិវត្តយ៉ាងឆាប់រហ័ស ស្មុគស្មាញ និងវិបត្តិដែលអាចអូសបន្លាយពេលយូរ យើងត្រូវត្រៀមទុកជាមុនសម្រាប់ករណីដែលមូលនិធិរក្សាលំនឹងថ្លៃប្រេងសាំង អាចនឹងត្រូវកង្វះខាត។

នាយករដ្ឋមន្ត្រីបានឯកភាពលើគោលការណ៍ចំពោះសំណើរបស់ស្ថាប័ននានា អំពីការខ្ចីកញ្ចប់ថវិការដ្ឋ (ប្រភពចំណូលកើនឡើងក្នុងឆ្នាំ ២០២៥) សម្រាប់មូលនិធិរក្សាលំនឹងថ្លៃប្រេងសាំង។ នៅពេលវិបត្តិបានកន្លងផុតទៅ នឹងយកប្រភពថវិកាពីមូលនិធិដើម្បីសងត្រឡប់ទៅថវិការដ្ឋវិញ។ នាយករដ្ឋមន្ត្រីបានប្រគល់ភារកិច្ចឱ្យក្រសួងហិរញ្ញវត្ថុដឹកនាំ សហការជាមួយការិយាល័យរដ្ឋាភិបាល និងក្រសួងឧស្សាហកម្មនិងពាណិជ្ជកម្ម ដើម្បីប្រញាប់កសាង និងបង្ហើយសេចក្តីព្រាងរបាយការណ៍ សុំគោលការណ៍ពីថ្នាក់មានសមត្ថកិច្ច ដើម្បីឱ្យរដ្ឋាភិបាលអនុវត្តតាមសមត្ថកិច្ច។ ពេលវេលារំពឹងទុកនឹងអនុវត្តរហូតដល់ផុតថ្ងៃទី ១៥ ខែមេសា ក្នុងករណីអូសបន្លាយពេល រដ្ឋាភិបាលនឹងផ្អែកលើស្ថានភាពជាក់ស្តែងដើម្បីបន្តអនុវត្ត និងរាយការណ៍ឡើងវិញ។

នាយករដ្ឋមន្ត្រីបានសង្កត់ធ្ងន់លើតម្រូវការនៃការគ្រប់គ្រង គឺត្រូវតាមដាន និងក្តាប់ឱ្យជាប់នូវស្ថានភាព ឆ្លើយតបឱ្យបានទាន់ពេលវេលា កសាងគោលនយោបាយផ្អែកលើមូលដ្ឋានទិន្នន័យ និងស្ថានភាពជាក់ស្តែង ស្របតាមខឿនសេដ្ឋកិច្ចទីផ្សារតាមទិសដៅសង្គមនិយម និងលក្ខខណ្ឌរបស់ប្រទេសជាតិ ត្រូវមានផែនការ និងជំហានសមស្រប មិនឱ្យមានភាពរអាក់រអួល ឬបង្កការភ្ញាក់ផ្អើលឡើយ។ ការគ្រប់គ្រងទីផ្សារប្រេងសាំងត្រូវតែមានការត្រួតពិនិត្យ និងរក្សាលំនឹងថ្លៃ ប៉ុន្តែទន្ទឹមនឹងនោះត្រូវពិចារណា និងគិតគូរដល់កត្តាថ្លៃប្រេងសាំងនៅបណ្តាប្រទេសជុំវិញ ដើម្បីជួយដល់ជីវភាពរបស់ប្រជាជន និងការផលិត ធ្វើអាជីវកម្មរបស់អាជីវកម្ម ព្រមទាំងបង្ការ ទប់ស្កាត់ការរត់ពន្ធឆ្លងដែន។

នាយករដ្ឋមន្ត្រីបានប្រគល់ភារកិច្ចឱ្យឧបនាយករដ្ឋមន្ត្រី ហូដឹកភើក បន្តដឹកនាំដោយផ្ទាល់នូវរាល់ខ្លឹមសារពាក់ព័ន្ធនឹងថវិកាពន្ធ កម្រៃ។ ឧបនាយករដ្ឋមន្ត្រី ប៊ូយថាញស៊ើង ដឹកនាំដោយផ្ទាល់នូវរាល់ខ្លឹមសារពាក់ព័ន្ធនឹងការគ្រប់គ្រង រក្សាលំនឹងទីផ្សារ និងវិស័យគ្រប់គ្រងរដ្ឋរបស់ក្រសួងឧស្សាហកម្មនិងពាណិជ្ជកម្ម ដោះស្រាយការងារតាមសមត្ថកិច្ច ប្រសិនបើហួសពីសមត្ថកិច្ចត្រូវរាយការណ៍ជូននាយករដ្ឋមន្ត្រី៕

ប្រភព÷ TTXVN - សុផន

ចែករំលែកអត្ថបទ

ពាក្យគន្លឹះ