សុខភាព - អប់រំ អប់រំ

06/03/2026 - 19:04

បើកវគ្គបំប៉នភាសាខ្មែរដល់កម្មាភិបាល បុគ្គលិក និងអ្នករដ្ឋការ

នាព្រឹកថ្ងៃទី៦ ខែមីនា នៅសាលាមធ្យមសិក្សាបំពេញវិជ្ជាបាលីណាមបូ បានចាត់តាំងពិធីបើកវគ្គបំប៉នភាសាខ្មែរ ឆ្នាំ២០២៥ ជូនកម្មាភិបាល បុគ្គលិកនិងអ្នករដ្ឋការ ដែលកំពុងបម្រើការងារនៅតាមស្ថាប័ន អង្គភាពលើភូមិឋានទីក្រុងកឹងធើ។

យោងតាមនោះ គណៈចាត់តាំងបានបើកវគ្គបំប៉នភាសាខ្មែរចំនួន ៤ ថ្នាក់ ដោយមានសិក្ខាកាមសរុប ១៧៤ នាក់។ ក្នុងនោះ កម្រិតមូលដ្ឋាន ២ ថ្នាក់ មានសិក្ខាកាម ១០៥ រូប; កម្រិតខ្ពស់ ១ ថ្នាក់ មានសិក្ខាកាម ៥០ នាក់ និងជំនាញបកប្រែ ១ ថ្នាក់ មានសិក្ខាកាម ១៩ រូប។ ថ្នាក់រៀនបានចាត់តាំងឡើងនៅ ៣ កន្លែងគឺ បណ្ណាល័យនៃសាលាមធ្យមសិក្សាបំពេញវិជ្ជាបាលីណាមបូ; សាលាវិទ្យាល័យជនជាតិអន្តេវាសិកហូវយ៉ាង និងកន្លែងទីបីគឺសាលាវិទ្យាល័យជនជាតិអន្ដេវាសិកកឹងធើ។

អ្នកតំណាងអញ្ជើញចូលរួមក្នុងពិធីបើកវគ្គសិក្សា។

ចំពោះកម្មវិធីសិក្សាសម្រាប់កម្រិតមូលដ្ឋាន និងជំនាញបកប្រែ គឺមានរយៈពេលសិក្សាចំនួន ៣០០ ម៉ោង (ប្រមាណ ៤,៥ ខែ)។ ដោយឡែកការសិក្សាកម្រិតខ្ពស់ មានរយៈពេលចំនួន ៤៥០ ម៉ោង (ប្រមាណ ៦,៥ ខែ)។ ក្រោយពេលបញ្ចប់កម្មវិធីសិក្សា សាលានឹងចាត់តាំងការពិនិត្យវាយតម្លៃសមត្ថភាព ដើម្បីប្រគល់លិខិតបញ្ជាក់ និងវិញ្ញាបនបត្រភាសាជនជាតិភាគតិច (ភាសាខ្មែរ) ស្របតាមសេចក្ដីកំណត់។

តាមប្រសាសន៍លោកគ្រូថាច់រឹទ្ធ ចាងហ្វាងរងសាលាមធ្យមសិក្សាបំពេញវិជ្ជាបាលីណាមបូ នេះជាឆ្នាំទី ៧ ដែលសាលាបានអនុវត្តភារកិច្ចបំប៉នភាសាខ្មែរជូនកម្មាភិបាល បុគ្គលិក និងអ្នករដ្ឋការ ដោយផ្អែកលើការបន្តអនុវត្តកម្មវិធី និងឯកសារយោងតាមគម្រោងរបស់ខេត្តសុកត្រាំង (ចាស់) ដែលបច្ចុប្បន្នជាទីក្រុងកឹងធើ។ គិតមកទល់ពេលនេះ សាលាបានបើកការបណ្តុះបណ្តាលចំនួន ៦ វគ្គ រួមមានសិក្ខាកាមសរុប ១.៣៤៧រូប។ ក្នុងនោះមាន៖ កម្រិតមូលដ្ឋាន ២០ ថ្នាក់ (សិក្ខាកាម ១.០០១ នាក់), កម្រិតខ្ពស់ ៦ ថ្នាក់ (សិក្ខាកាម ២៤៦ នាក់) និងជំនាញបកប្រែ ៤ ថ្នាក់ (សិក្ខាកាម ១០០ រូប)។

គម្រោងបំប៉នភាសាខ្មែររៀងរាល់ឆ្នាំ ជូនកម្មាភិបាល បុគ្គលិក និងអ្នករដ្ឋការលើភូមិឋានទីក្រុងកឹងធើ សម្រេចបាននូវលទ្ធផលវិជ្ជមានជាច្រើន រួមចំណែកយ៉ាងសំខាន់ក្នុងការលើកកម្ពស់គុណភាពនិងប្រសិទ្ធភាពការងាររបស់កម្មាភិបាលនៅមូលដ្ឋាន។ ចាប់តាំងពីអនុវត្តសកម្មភាពបំប៉នភាសាខ្មែរមក សិក្ខាកាមទាំងអស់សុទ្ធតែសម្រេចបានលទ្ធផលល្អក្នុងការសិក្សា ការប្រឡងបញ្ចប់វគ្គសិក្សាតែងជាប់ ១០០%៕

យ្វីអាញ - ថាច់ធី

ចែករំលែកអត្ថបទ

ពាក្យគន្លឹះ