សន្តិសុខ - ការពារប្រទេស ការពារប្រទេស

26/02/2026 - 16:03

ពិធីជួបជុំខួបអនុស្សាវរីយ៍លើកទី ៧១ឆ្នាំ ទិវាគ្រូពេទ្យវៀតណាម

- នារសៀលថ្ងៃទី ២៥ ខែកុម្ភៈ គណៈបញ្ជាការកងទ័ពការពារព្រំដែនទីក្រុងកឹងធើ បានចាត់តាំងជួបជុំខួបអនុស្សាវរីយ៍លើកទី ៧១ឆ្នាំ ទិវាគ្រូពេទ្យវៀតណាម (២៧/០២/១៩៥៥ – ២៧/០២/២០២៦)។ លោកវរៈសេនីយ៍ឯក ផាមឡេស្វឹងប៊ិញ មេបញ្ជាការនៃគណៈបញ្ជាការកងទ័ពការពារព្រំដែនទីក្រុង បានអញ្ជើញចូលរួមជាអធិបតីក្នុងពិធីជួបជុំនេះ។

ទិដ្ឋភាពនៃពិធីជួបជុំ។

ក្នុងឱកាសរំលឹកឡើងវិញនូវប្រពៃណី ៧១ ឆ្នាំ ទិវាគ្រូពេទ្យវៀតណាម ថ្នាក់ដឹកនាំគណៈបញ្ជាការកងទ័ពការពារព្រំដែនទីក្រុងបានសង្កត់ធ្ងន់៖ ថ្ងៃទី ២៧ ខែកុម្ភៈ ជារៀងរាល់ឆ្នាំ គឺជាឱកាសដើម្បីសម្តែងការដឹងគុណចំពោះការរួមចំណែកដ៏ធំធេង ការតស៊ូ និងការលះបង់ដោយស្ងប់ស្ងាត់របស់កងជួរគ្រូពេទ្យពាក់ស័ក្តិខៀវ ដែលជាអ្នកថែទាំសុខភាពផ្ទាល់ដល់កងទ័ព និងប្រជាជនលើភូមិឋាន ជាពិសេសនៅតំបន់ព្រំដែន តំបន់ឆ្ងាយដាច់ស្រយាល ដែលនៅជួបការលំបាកច្រើន។

ក្នុងរយៈពេលកន្លង ប្រព័ន្ធកងទ័ពយោធាចំណុះកងទ័ពការពារព្រំដែនទីក្រុង បានពង្រឹង និងកែលម្អជាបណ្តើរៗ ដើម្បីឆ្លើយតបកាន់តែប្រសើរឡើងនូវតម្រូវការភារកិច្ចក្នុងស្ថានភាពថ្មី។ បណ្តាដំណាក់និងក្រុមពេទ្យយោធានៅតាមស្ថាប័ន និងអង្គភាពមូលដ្ឋាន បានម្ចាស់ការផ្សព្វផ្សាយអនុវត្តប្រកបដោយប្រសិទ្ធភាពនូវការងារពិនិត្យ ព្យាបាលជំងឺ សង្គ្រោះដំបូង និងគ្រប់គ្រងសុខភាពកងទ័ព មានកិច្ចសហការយ៉ាងជិតស្និទ្ធរវាងពេទ្យយោធានិងសុខាភិបាលភូមិភាគលើភូមិឋានបោះទ័ព។

សកម្មភាពថែទាំសុខភាពសហគមន៍ជាច្រើនត្រូវបានចាត់តាំងឡើងជាទៀងទាត់ និងមានលក្ខណៈជាក់ស្តែង។ ក្នុងប៉ុន្មានឆ្នាំមកនេះ កងកម្លាំងពេទ្យយោធាការពារព្រំដែនទីក្រុង បានចាត់តាំងការពិនិត្យជំងឺ ពិគ្រោះសុខភាព និងផ្តល់ថ្នាំពេទ្យដោយឥតគិតថ្លៃរាប់សិបលើកជូនប្រជាជនជាង ៥.០០០ លើកនាក់ ផ្តល់ថ្នាំពេទ្យដល់ប្រជាជនជាង ១.៨០០ លើកនាក់ ដោយឥតគិតថ្លៃ និងអនុវត្តសេវាកម្មវេជ្ជសាស្ត្រដូចជា៖ ឆ្លុះអេកូ វាស់ចង្វាក់បេះដូង និងថតកាំរស្មីអ៊ិច (X-ray) ជូនប្រជាជនជាង ២.៩០០ លើកនាក់។ តាមរយៈនោះ បានរួមចំណែករកឃើញទាន់ពេល និងផ្តល់ការពិគ្រោះព្យាបាលជំងឺជាច្រើន លើកកម្ពស់ស្មារតីថែទាំសុខភាពដល់ប្រជាជននៅតំបន់ព្រំដែនសមុទ្រ និងតំបន់សំខាន់ៗ។

ទន្ទឹមនឹងនោះ កងកម្លាំងពេទ្យយោធាបានសហការយ៉ាងជិតស្និទ្ធជាមួយមជ្ឈមណ្ឌលសុខាភិបាលបណ្តាឃុំ សង្កាត់តំបន់ព្រំដែនសមុទ្រ ចូលរួមឃ្លាំមើល បង្ការ និងទប់ស្កាត់ជំងឺរាតត្បាត អនុវត្តវិធានការសុខាភិបាលបង្ការ អនាម័យបរិស្ថាន និងសុវត្ថិភាពចំណីអាហារ។ ព្រមទាំងសកម្មចូលរួមការងារចំនួនប្រជាជន ផែនការគ្រួសារ ថែទាំសុខភាពមាតានិងទារក ជួយឧបត្ថម្ភគ្រួសារគោលនយោបាយ គ្រួសារក្រីក្រ និងកុមារដែលមានជីវភាពលំបាក...។

ថ្នាក់ដឹកនាំគណៈបញ្ជាការកងទ័ពការពារព្រំដែនទីក្រុងកឹងធើ ជូនបាច់ផ្កាអបអរសាទរកងជួរកម្មាភិបាល បុគ្គលិកពេទ្យយោធា។

ថ្លែងការណ៍ក្នុងពិធីជួបជុំនេះ លោកវរៈសេនីយ៍ឯក ផាមឡេស្វឹងប៊ិញ មេបញ្ជាការនៃគណៈបញ្ជាការកងទ័ពការពារព្រំដែនទីក្រុង បានស្ងើចសរសើរចំពោះកិច្ចខិតខំប្រឹងប្រែង ស្មារតីទទួលខុសត្រូវ និងលទ្ធផលលេចធ្លោដែលកងជួរកម្មាភិបាល បុគ្គលិកពេទ្យយោធាទូទាំងកងកម្លាំងសម្រេចបានក្នុងរយៈពេលកន្លង។ ទន្ទឹមនឹងនោះ លោកក៏បានសំណូមពរក្នុងពេលខាងមុខ គ្រូពេទ្យទាំងអស់ត្រូវផ្តោតលើការលើកកម្ពស់គុណភាពគ្រប់គ្រងសុខភាពកងទ័ព បង្កើនការងារសុខាភិបាលបង្ការ បង្ការនិងទប់ស្កាត់ជំងឺរាតត្បាត ជាពិសេសជំងឺឆ្លងគ្រោះថ្នាក់ដែលមានហានិភ័យឆ្លងចូលភូមិឋានទីក្រុង។ ជំរុញកិច្ចសហការរវាងពេទ្យយោធានិងប្រជាជន លើកកម្ពស់ប្រសិទ្ធភាពនៃកម្មវិធីសហការថែទាំសុខភាពជូនប្រជាជននៅតំបន់ព្រំដែនសមុទ្រ។ ជាមួយគ្នានោះ ត្រូវបន្តយកចិត្តទុកដាក់កសាងកងជួរកម្មាភិបាលពេទ្យយោធាឱ្យមានជំនាញរឹងមាំ មានសីលធម៌វិជ្ជាជីវៈត្រឹមត្រូវ និងធ្វើការបម្រើកងទ័ពនិងប្រជាជនដោយអស់ពីចិត្ត៕

យ្វីអាញ - សុផន

ចែករំលែកអត្ថបទ

ពាក្យគន្លឹះ