សន្តិសុខ - ការពារប្រទេស ការពារប្រទេស

19/09/2025 - 19:03

បុណ្យសែនដូនតា កក់ក្តៅមនោសញ្ចេតនាកងទ័ពនិងប្រជាជន

ជារៀងរាល់ឆ្នាំឱ្យតែដល់បុណ្យសែនដូនតារបស់ជនរួមជាតិខ្មែរ គណៈមេបញ្ជាការកងទ័ពការពារព្រំដែនទីក្រុងកឹងធើបានម្ចាស់ការធ្វើសេនាធិការ សហការជាមួយគណៈកម្មាធិការបក្ស និងរដ្ឋអំណាចភូមិភាគ ចាត់តាំងសកម្មភាពជាច្រើនគិតអានដល់ជនរួមជាតិខ្មែរក្រីក្រ ដើម្បីជួយឱ្យជនរួមជាតិបានទទួលពិធីបុណ្យប្រកបដោយភាពរីករាយ កក់ក្តៅនិងសុភមង្គល។

ដើម្បីអបអរពិធីបុណ្យសែនដូនតាឆ្នាំ២០២៥ នៅប៉ុស្តិ៍ការពារព្រំដែនវិញហាយ គណៈមេបញ្ជាការកងទ័ពការពារព្រំដែនទីក្រុងកឹងធើ បានសហការជាមួយឃុំវិញហាយចាត់តាំងនូវសកម្មភាពដ៏សម្បូរបែប ដូច៖ ចាត់តាំងការប្រឡងវេចនំប្រពៃណីដើម្បីជូនគ្រួសារដែលមានជីវភាពលំបាកនៅលើភូមិឋាន; ដោះដូរសិល្បៈ កីឡាប្រពៃណីរបស់ជនរួមជាតិខ្មែរ; ចាត់តាំងទម្រង់ “ផ្សារណាត់ពិសេស” ជូននំអន្សមជ្រូកចំនួន៥០០នំ និងអំណោយចំនួន១០០ ចំណែក (មានគ្រឿងឧបភោគ បរិភោគ និងសម្ភារៈប្រើប្រាស់ចាំបាច់) ដល់អ្នកក្រីក្រ; ចាត់តាំងពិនិត្យជំងឺ ផ្តល់ថ្នាំពេទ្យដោយឥតគិតថ្លៃជូនប្រជាជនដែលមានជីវភាពលំបាកខ្លាំង។ល។ ក្រៅពីនោះ គណៈបញ្ជាការដ្ឋានកងទ័ពការពារព្រំដែនទីក្រុងកឹងធើក៏បានចាត់តាំងក្រុមប្រតិភូ អញ្ជើញទៅសួរសុខទុក្ខ និងជូនអំណោយចំពោះព្រះសង្ឃ អ្នកមុខអ្នកការសាសនា អ្នកមានប្រិយភាពក្នុងជនរួមជាតិខ្មែរនៅតំបន់ព្រំដែនសមុទ្រ។

ថ្លែងក្នុងពិធីជូនអំណោយ វរសេនីយ៍ឯក ហ្វិញថាញហុង អគ្គស្នងការនយោបាយគណៈមេបញ្ជាការកងទ័ពការពារព្រំដែនទីក្រុងកឹងធើ មានប្រសាសន៍៖ ពិធីបុណ្យសែនដូនតាមានអត្ថន័យយ៉ាងសំខាន់ណាស់ចំពោះជនរួមជាតិខ្មែរ នេះជាឱកាសបង្ហាញពីការគោរពដឹងគុណរបស់កូនចៅចំពោះលោកតាលោកយាយ ឪពុកម្តាយ នឹករលឹកដល់គុណូបការៈរបស់ដូនតា និងអ្នកដែលបានចែកឋានទៅ។ សកម្មភាពគិតអានក្នុងឱកាសពិធីបុណ្យនេះ មិនត្រឹមតែមានអត្ថន័យមនុស្សធម៌ដ៏ជ្រាលជ្រៅប៉ុណ្ណោះទេ ថែមទាំងបង្ហាញពីការទទួលខុសត្រូវ និងទឹកចិត្តដ៏ខ្ពង់ខ្ពស់របស់យោធិនពាក់ស័ក្តិខៀវចំពោះប្រជាជនស្របតាមស្មារតី “កងទ័ពការពារព្រំដែនរួមកម្លាំងដើម្បីអ្នកក្រ មិនទុកឱ្យនរណាម្នាក់នៅក្រោយគេឡើយ”។ ទន្ទឹមនឹងនោះ សកម្មភាពនេះបានជួយឱ្យមាមីងខ្មែរក្រីក្រនៅតំបន់ព្រំដែនសមុទ្របានទទួលពិធីបុណ្យប្រកបដោយភាពកក់ក្តៅ សុភមង្គល រួមចំណែកក្នុងការពង្រឹងបន្ថែមទៀតនូវសាមគ្គីភាពដ៏ជ្រាលជ្រៅរវាងកងទ័ពនិងប្រជាជន ព្រមទាំងបង្ហាញពីរូបភាពដ៏ល្អប្រពៃនៃ “កងទ័ពអ៊ំហូ” ក្នុងស្ថានភាពថ្មី។

ខាងក្រោមនេះជារូបភាពមួយចំនួននៃសកម្មភាពគិតអានក្នុងពិធីបុណ្យសែនដូនតាជូនជនរួមជាតិខ្មែរនៅប៉ុស្តិ៍ការពារព្រំដែនវិញហាយ គណៈមេបញ្ជាការកងទ័ពការពារព្រំដែនទីក្រុងកឹងធើ៕

លីធាន - សុផន