គោលនយោបាយ -ការរស់នៅ ការរស់នៅ

28/07/2025 - 10:02

កម្មវិធីធ្វើឱ្យផ្លាស់ប្តូរតំបន់ជនបទ

កម្មវិធីទិសដៅជាតិអភិវឌ្ឍសេដ្ឋកិច្ច-សង្គមតំបន់ជនជាតិភាគតិច ដំណាក់កាល ២០២១ - ២០២៥ (ហៅកាត់ថា កម្មវិធី) ត្រូវបានអនុវត្តប្រកបដោយប្រសិទ្ធភាពនៅក្រុងកឹងធើ។ កម្មវិធីនេះ បានជួយជនរួមជាតិខ្មែររាប់ពាន់គ្រួសារមានលំនៅឋាន លំនឹងជីវភាព និងតំបន់ជនបទត្រូវបានវិនិយោគអភិវឌ្ឍន៍លើគ្រប់វិស័យ។

ផ្លូវជនបទភូមិសុកបឹង ត្រូវបានកសាងឆ្លើយតបតម្រូវការធ្វើដំណើរទៅមក
និងជួញដូររបស់ប្រជាជន។

តាមប្រសាសន៍លោក សើុងសារ៉ាញ ប្រធានគណៈកម្មាធិការរណសិរ្សមាតុភូមិវៀតណាមឃុំមីហឿង កម្មវិធីបានជំរុញការអភិវឌ្ឍគ្រប់ជ្រុងជ្រោយនៅតំបន់ជនបទដែលមានជនរួមជាតិខ្មែររស់នៅកុះករ។ យោងតាមនោះ ផ្លូវជនបទ សាលារៀន និងដំណាក់សុខាភិបាល ត្រូវបានវិនិយោគកសាងរួចរាល់។ គ្រួសារក្រីក្រត្រូវបានឧបត្ថម្ភសង់លំនៅឋាន អគ្គិសនី ទឹកស្អាតប្រើប្រាស់។ ជួយឧបត្ថម្ភពូជដំណាំ សត្វចិញ្ចឹម ឧបករណ៍ផលិត មធ្យោបាយធ្វើដំណើរទៅមក បុលទុនអនុគ្រោះសម្រាប់អភិវឌ្ឍន៍សេដ្ឋកិច្ចជាដើម។ អាស្រ័យហេតុនេះ តំបន់ជនបទកាន់តែរីកចម្រើន ការជួញដូរទំនិញកាន់តែងាយស្រួល និងគ្រួសារក្រីក្រមានលក្ខណៈអភិវឌ្ឍន៍សេដ្ឋកិច្ច លំនឹងជីវភាព រួមចំណែកអភិវឌ្ឍន៍សេដ្ឋកិច្ច-សង្គម។

កម្មវិធីបានជំនួយគោដល់គ្រួសារក្រីក្រអភិវឌ្ឍសេដ្ឋកិច្ចគ្រួសារ លំនឹងជីវភាព។

បងយឿងឡាញ នៅឃុំមីហឿង បានកម្មវិធីឧបត្ថម្ភថវិកាសាងសង់លំនៅឋាននិងបុលដើមទុនអភិវឌ្ឍន៍សេដ្ឋកិច្ច ដូច្នេះ គាត់បានជួលដីធ្វើស្រែនិងដាំដំណាំរួមផ្សំដើម្បីរកប្រាក់ចំណូល ជីវភាពកាន់តែប្រសើរឡើង។ បងឡាញ ឱ្យដឹង៖ “ចាប់តាំងពីថ្ងៃមានកម្មវិធីវិនិយោគ ផ្លូវថ្នល់ត្រូវបានកសាង រថយន្តអាចបើកចូលដល់កន្លែងដើម្បីទិញបន្លែ ស្រូវ លែងមានការត្រូវឈ្មួញសង្កត់ថ្លៃដូចមុនទៀត។ គ្រួសារក្រត្រូវបានរដ្ឋសង់ផ្ទះឱ្យនិងឱ្យបុលទុន ៦០ លានដុង ដូច្នេះខ្ញុំបានកែប្រែដី ១ កុងដាំដំណាំរួមផ្សំរកបានប្រាក់ចំណូលខួបឆ្នាំ ព្រមទាំងជួលដី ៥ កុងធ្វើស្រែ ដើម្បីបង្កើនប្រាក់ចំណូល។ រដ្ឋសង់ផ្ទះឱ្យ ហើយតបណ្តាញអគ្គិសនី ទឹកស្អាតដោយឥតគិតថ្លៃ ដូច្នេះប្តីប្រពន្ធខ្ញុំខិតខំផ្ដុំកម្លាំងធ្វើការរកស៊ីដើម្បីសន្សែសន្សំ ហើយឥឡូវនេះជីវភាពបានប្រសើរឡើង លែងទៅធ្វើការស៊ីឈ្នួលនៅឆ្ងាយទៀត”។

ឃុំញ៉ូយា បានផ្សព្វផ្សាយអនុវត្តរួមបញ្ចូលកម្មវិធីនេះជាមួយនឹងកម្មវិធីទិសដៅជាតិកាត់បន្ថយភាពក្រីក្រដោយចីរភាពនិងកសាងជនបទថ្មី ដូច្នេះ តំបន់ជនបទកាន់តែរីកចម្រើន។ លោកកាវដូរ៉ា អ្នកមានប្រជាប្រិយក្នុងជនរួមជាតិខ្មែរ នៅភូមិសុកបឹង ឱ្យដឹង៖ “សុកបឹង ជាភូមិលំបាកខ្លាំង ចាប់តាំងពីមានកម្មវិធីវិនិយោគមកតំបន់ជនបទក្រីក្រមានការវិវឌ្ឍយ៉ាងខ្លាំង។ បច្ចុប្បន្ន ផ្លូវជនបទ ស្ពានបេតុងត្រូវបានកសាងធំទូលាយ រថយន្តអាចបើកបរដល់ផ្ទះ។ នៅពេលយប់ ភ្លើងនៅសងខាងផ្លូវភ្លឺចិញ្ចាច ដូច្នេះបងប្អូនខ្មែរមានភាពងាយស្រួលក្នុងការជួញដូរទំនិញ រកបានប្រាក់ចំណូលលំនឹង។ គ្រួសារក្រីក្រ ប្រកៀកបន្ទាត់ក្រ គ្រួសារទើបចាកផុតពីភាពក្រីក្រ តែងបានរដ្ឋឧបត្ថម្ភសង់ផ្ទះ ផ្តល់គោចិញ្ចឹម ឱ្យបុលដើមទុន ផ្តល់មធ្យោបាយធ្វើដំណើរ ម៉ាស៊ីនគាបទឹកអំពៅសម្រាប់លក់ដូរជាដើម ម្ល៉ោះហើយមានលក្ខណៈអភិវឌ្ឍន៍សេដ្ឋកិច្ច ជីវភាពបានប្រសើរឡើងឆាប់រហ័ស។ ឥឡូវនេះ មិនត្រឹមតែនៅសុកបឹងទេ តំបន់ជនបទញ៉ូយាទាំងមូលក៏លែងមានផ្ទះស្លឹកទៀត ហើយជំនួសវិញដោយផ្ទះឥដ្ឋយ៉ាងសមរម្យ”។

គម្រោងនិងអនុគម្រោងនានារបស់កម្មវិធី ត្រូវបានផ្សព្វផ្សាយអនុវត្តចំគោលដៅ ស្របទឹកចិត្តប្រជាជន ដូច្នេះពង្រីកបានប្រសិទ្ធភាពខ្ពស់។ កម្មវិធីនេះ មិនត្រឹមតែបន្តកែលម្អហេដ្ឋារចនាសម្ព័ន្ធជនបទប៉ុណ្ណោះទេ ថែមទាំងអភិវឌ្ឍន៍សេដ្ឋកិច្ច-សង្គមប្រកបដោយចីរភាព លើកកម្ពស់ជីវភាពប្រជាជន កាត់បន្ថយគម្លាតជីវភាពរវាងទីក្រុងនិងជនបទទៀតផង៕

យ្វីអាញ - ថាច់ធី

ចែករំលែកអត្ថបទ

ពាក្យគន្លឹះ