គោលនយោបាយ -ការរស់នៅ គោលនយោបាយ

26/05/2025 - 12:53

ជីវភាពជនរួមជាតិខ្មែរត្រូវបានលើកស្ទួយ

ខេត្តសុកត្រាំង ផ្សព្វផ្សាយអនុវត្តល្អនូវកម្មវិធីទិសដៅជាតិអភិវឌ្ឍសេដ្ឋកិច្ច-សង្គមតំបន់ជនរួមជាតិភាគតិច ដំណាក់កាល I ឆ្នាំ ២០២១-២០២៥ (ហៅកាត់ថា កម្មវិធី) រួមចំណែកលើកស្ទួយជីវភាពរបស់ជនរួមជាតិខ្មែរ។

ប្រគល់ជូនផ្ទះដល់គ្រួសារក្រីក្រនៅស្រុកត្រឹងដេ។

តាមប្រសាសន៍លោក ឡឹមហ្វាងម៉ូវ នាយកមន្ទីរជនជាតិនិងសាសនាខេត្តសុកត្រាំង នៅដំណាក់កាល I ខេត្តសុកត្រាំង បានវិនិយោគអនុវត្តគម្រោងចំនួន ១០ សរុបថវិកាជាង ៧៩០ ពាន់លានដុង។ ដោយមានកិច្ចចង្អុលការយ៉ាងប្តូរផ្តាច់របស់គណៈកម្មាធិការបក្ស ខេត្តគណៈកម្មាធិការប្រជាជនខេត្ត និងបណ្តាស្រុក ទីរួមខេត្ត ក្រុង ម្ល៉ោះហើយកម្មវិធីពង្រីកបានប្រសិទ្ធភាព។ ក្នុងនោះ សំណង់គមនាគមន៍ជនបទ ធារាសាស្ត្រ អគារសិក្សា ដំណាក់សុខាភិបាល៘ ត្រូវបានផ្តុំកម្លាំងវិនិយោគជាសារវន្ដឆ្លើយតបតម្រូវការផលិតកម្មរបស់ប្រជាជន។ គម្រោងឧបត្ថម្ភលំនៅឋាន ដីសង់លំនៅឋាន បុលទុនផ្លាស់ប្តូរមុខរបរ៘ បានផ្សព្វផ្សាយអនុវត្តព្រមៗគ្នានិងមានប្រសិទ្ធភាព ទើបជីវភាពរបស់ជនរួមជាតិខ្មែរបានល្អប្រសើរឡើង តំបន់ជនបទប្ដូរផ្លាស់ពីមួយថ្ងៃទៅមួយថ្ងៃ។

ផ្លូវគមនាគមន៍តំបន់ជនបទត្រូវបានកសាងរឹងមាំ។

ពូថាច់សយ នៅភូមិហោយទ្រុង ទីប្រជុំជនលិតហោយថឿង ស្រុកត្រឹងដេ ឱ្យដឹង៖ “បក្សនិងរដ្ឋតែងយកចិត្តទុកដាក់វិនិយោគដល់តំបន់ជនរួមជាតិខ្មែរ ពិសេសគឺកម្មវិធីបានវិនិយោគអភិវឌ្ឍគ្រប់ផ្នែក ញុំាងឱ្យតំបន់ជនបទមានការប្ដូរផ្លាស់ ជីវភាពជនរួមជាតិខ្មែរបានកើនឡើងជាលំដាប់។ ជាក់ស្តែងបំផុត គឺដងផ្លូវជាច្រើននៅជនបទកាលពីមុនមានទទឹងប្រមាណ ២ ម៉ែត្រប៉ុណ្ណោះ សព្វថ្ងៃបានបើកទូលាយដល់ទៅ ៣- ៣,៥ ម៉ែត្រ។ អាស្រ័យហេតុនេះ ការធ្វើដំណើរទៅមក លក់ដូរនិងដោះដូរពាណិជ្ជកម្មមុខទំនិញមានភាពងាយស្រួល ហេតុនោះ នាំឱ្យសេដ្ឋកិច្ចតំបន់ជនបទរីកចម្រើនទៅតាមនោះដែរ”។

តាមប្រសាសន៍លោកត្រឹងទ្រីវ៉ឹង អនុប្រធានគណៈកម្មាធិការប្រជាជនទីរួមខេត្តវិញចូវ ទីរួមខេត្តផ្តុំកម្លាំងផ្សព្វផ្សាយទឹកប្រាក់ជាង ១២៤ ពាន់លានដុង ដើម្បីឧបត្ថម្ភសាងសង់ផ្ទះជូនអ្នកក្របាន ៦៩៣ខ្នង ឱ្យប្រជាជន ៣០៩ គ្រួសារបុលទុនអភិវឌ្ឍសេដ្ឋកិច្ច ឧបត្ថម្ភដីសង់ផ្ទះជូនប្រជាជន ៨៤ គ្រួសារ; ប្តូរមុខរបរជូន ១.០៥៣គ្រួសារ; ឧបត្ថម្ភទឹកស្អាតប្រើប្រាស់ជូនប្រជាជនរស់នៅរាត់រាយ ៥០៣គ្រួសារ; អភិវឌ្ឍផលិតកម្មដោយមាន១៧ទម្រង់ចិញ្ចឹមសត្វ ដាំដុះ ៘ ឆ្លងតាមរយៈនោះ ជនរួមជាតិខ្មែរមានលក្ខណសម្បត្តិអភិវឌ្ឍសេដ្ឋកិច្ច លំនឹងជីវភាព។ អ្នកមីងត្រឹងធីសាល នៅអនុសង្កាត់សែវមែ សង្កាត់វិញភឿក ឱ្យដឹង៖ “ខ្ញុំបានរដ្ឋឧបត្ថម្ភសង់ផ្ទះឥដ្ឋយ៉ាងសមរម្យ ម្ល៉ោះហើយត្រេកអរណាស់។ សព្វថ្ងៃមានលំនៅឋានលំនឹង ខ្ញុំមិនបារម្ភពីផ្ទះរលំពេលមានភ្លៀងខ្យល់ម្តងៗហើយស្ងប់ចិត្តធ្វើការរកស៊ី ដើម្បីគិតគូរជីវភាពបានចាកផុតពីភាពក្រីក្រ”។

តាមប្រសាសន៍លោកឡឹមហ្វាងម៉ូវ ប្រសិទ្ធភាពនៃកម្មវិធីបានធ្វើឱ្យផ្លាស់ប្តូរទាំងស្រុងមុខមាត់នៅតំបន់ជនបទជនរួមជាតិខ្មែរក្នុងខេត្ត។ ផ្តើមពីនោះ ពង្រឹងទំនុកចិត្តរបស់ជនរួមជាតិខ្មែរទៅលើការដឹកនាំរបស់បក្សនិងការគ្រប់គ្រងរបស់រដ្ឋ ព្រួតដៃជាមួយរដ្ឋអំណាចកសាងភូមិស្រុក រីកចម្រើនកាន់តែរហ័សលើគ្រប់វិស័យពីមួយថ្ងៃទៅមួយថ្ងៃ៕

យ្វីអាញ- លីសៀ

ចែករំលែកអត្ថបទ

ពាក្យគន្លឹះ