មហាសាមគ្គីជនជាតិ ភូមិស្រុកផ្លាស់ថ្មី

24/03/2025 - 10:54

អ្នកមានប្រជាប្រិយសកម្មរួមចំណែកកសាងជនបទថ្មី

អ្នកមានប្រជាប្រិយខេត្តសុកត្រាំង គឺជា “ស្ពានតភ្ជាប់” រវាងរដ្ឋអំណាចនិងប្រជាជន ជាកត្តាសកម្មក្នុងការងារចលនា និងផ្សព្វផ្សាយដល់ជនរួមជាតិភាគតិចអនុវត្តល្អការងារសង្គម ភាវូបនីយកម្មក្នុងការកសាងជនបទថ្មី។

ជាមួយការរួមចំណែកពីអ្នកមានប្រជាប្រិយ ភូមិបឹងទ្រៀកបានក្លាយជាតំបន់ជនបទបៃតង ជ្រះ និងស្រស់ស្អាត។

យោងតាមគណៈកម្មាធិការរណសិរ្សមាតុភូមិវៀតណាមខេត្តសុកត្រាំង អ្នកមានប្រជាប្រិយក្នុងជនរួមជាតិភាគតិច បានរួមចំណែកយ៉ាងសកម្មក្នុងការឃោសនានិងចលនាជនរួមជាតិខ្មែរព្រួតដៃកសាងជនបទថ្មី។ ឆ្នាំ២០២៤ ដោយកិត្យានុភាពរបស់ខ្លួន អ្នកមានប្រជាប្រិយបានចលនាសប្បុរសជននិងប្រជាជនចូលរួមវិភាគទានរាប់រយពាន់លានដុង កសាងស្ពានបេតុងជនបទបាន ២១ ខ្សែ សាងសង់ផ្ទះបាន ៤ ខ្នង ផ្លូវជនបទប្រវែង ៣.៣៣៦ ម៉ែត្រ និងសំណង់សុខុមាលភាពជីវភាពប្រជាជនផ្សេងៗទៀត...។ល។ រួមចំណែកកសាងមុខមាត់ជនបទបៃតង ជ្រះ ស្អាត ប្រជាជនធ្វើដំណើរនិងដឹកជញ្ជូនទំនិញងាយស្រួល រួមចំណែកលើកកម្ពស់ជីវភាពរបស់ប្រជាជននៅតំបន់ជនបទ។

លោកពូឡឹមអង នៅភូមិតាកាន់ B ដើរលើផ្លូវដែលលោកចលនាសប្បុរសជននិងប្រជាជនរួមនឹងរដ្ឋអំណាចកសាង។

លេចធ្លោមានដូចជាលោកពូ ត្រឹងលីវ អ្នកមានប្រជាប្រិយក្នុងជនរួមជាតិខ្មែរ នៅឃុំលីវទូ ស្រុកត្រឹងដេ បានរួមចំណែកយ៉ាងសកម្មក្នុងការកសាងភូមិបឹងទ្រៀក ស្រស់ស្អាត និងស៊ីវិល័យ។ តាំងពី ឆ្នាំ ១៩៩០ មកទល់បច្ចុប្បន្ន លោកពូ បានចលនាសប្បុរសជននិងប្រជាជនចូលរួមវិភាគទានជាង ១ ពាន់លានដុង រួមជាមួយរដ្ឋអំណាចកសាងស្ពានបេតុងជនបទបាន ១៩ ខ្សែ; កសាងផ្លូវជនបទប្រវែង ២.២៣ ២ម; កសាងប្រព័ន្ធលូ ដំឡើងភ្លើងបំភ្លឺផ្លូវ កសាងបង្គោលទង់ ដាំផ្កា...។ល។ រួមចំណែកធ្វើឱ្យជនបទបឹងទ្រៀកភ្លឺ បៃតង ជ្រះ ស្អាត និងសុវត្ថិភាព។ លោកពូត្រឹងលីវ ឱ្យដឹង៖ “កាលពីមុន បឹងទ្រៀកផ្លូវពិបាកធ្វើដំណើរ ដូច្នេះនៅពេលដែលរដ្ឋចលនារួមគ្នាកសាងជនបទថ្មី ខ្ញុំក៏ចលនាមាមីងភ្លាម។ កាលនៅជាសង្ឃ ខ្ញុំធ្លាប់ធ្វើជាព្រះចៅអធិការវត្ត ឥឡូវនេះជាអាចារ្យវត្ត ដូច្នេះអ្វីៗដែលខ្ញុំធ្វើគឺ បើកចំហតម្លាភាព និងឈានមុខក្នុងការចលនាភូមិភាគ ដូច្នេះមាមីងក្នុងភូមិស្រុក ជឿទុកចិត្តនិងគោរពស្រឡាញ់។ ម៉្លោះហើយ នៅពេលចលនាផ្សព្វផ្សាយ និងពន្យល់បង្ហាញពីអត្ថប្រយោជន៍នៃសំណង់ជនបទ ដើម្បីបម្រើប្រជាជនគ្រប់គ្នាយល់ព្រមឯកភាពគាំទ្រ និងរួមដៃគ្នាអនុវត្ត”។

ចំណែកលោកពូឡឹមអង នៅភូមិតាកាន់ B ឃុំធ្វឹងហ្វា ស្រុកចូវថាញ់ បានចលនាសប្បុរសជន និងប្រជាជនរួមចំណែកយ៉ាងសកម្មក្នុងការកសាងជនបទថ្មី។ រយៈពេលជាង ១៣ ឆ្នាំមកនេះ លោកពូឡឹមអង បានចលនាសប្បុរសជន និងប្រជាជន រួមវិភាគទានជាង ៥០០ លានដុង/ឆ្នាំ ដើម្បីកសាងសំណង់ជនបទ។ ជាមួយការរួមចំណែកយ៉ាងសកម្មរបស់លោកពូឡឹមអង មាមីងខ្មែរបានចូលរួមបរិច្ចាគដីដើម្បីកសាងសំណង់ជនបទ ដូច្នេះ ផ្លូវក្នុងភូមិចាក់បេតុងបានជាង ៩០% ដោយមានប្រវែងសរុបជាង ២០ គីឡូម៉ែត្រ កសាងស្ពានជនបទបាន ១៥ ខ្សែ រួមចំណែកជាមួយរដ្ឋអំណាចមូលដ្ឋាន សម្រេចគោលដៅកសាងជនបទថ្មី៕

យ្វីអាញ-មេងលី

ចែករំលែកអត្ថបទ

ពាក្យគន្លឹះ