ព្រឹត្តិការណ៍ - នយោបាយ ព្រឹត្តិការណ៍

24/02/2025 - 14:23

សម្ពោធនិងបញ្ចុះខណ្ឌសីមាព្រះវិហារវិទ្យាស្ថានពុទ្ធសាសនាទក្ខិណនិកាយខ្មែរ

(CT) - ក្រុមប្រឹក្សាអភិបាលវិទ្យាស្ថានពុទ្ធសាសនាទក្ខិណនិកាយខ្មែរ បានរៀបចំពិធីសម្ពោធនិងបញ្ចុះខណ្ឌសីមាព្រះវិហារវិទ្យាស្ថានពុទ្ធសាសនាទក្ខិណនិកាយខ្មែរ ដែលស្ថិតនៅមណ្ឌល ១២ សង្កាត់ចូវវ៉ាន់លីម ខណ្ឌអូរម៉ូង។

ពិធីកាត់ខ្សែបូសម្ពោធព្រះវិហារវិទ្យាស្ថានពុទ្ធសាសនាទក្ខិណនិកាយខ្មែរ។

ព្រះវិហារ គឺជាសំណង់មួយក្នុងចំណោមសំណង់ទាំងឡាយដែលមានអត្ថន័យដ៏ពិសិដ្ឋបំផុត។ នេះគឺជាឧបោសថាគារសម្រាប់ព្រះសង្ឃធ្វើសង្ឃកម្ម ទីដែលសាសនិកជន ពុទ្ធបរិស័ទ ធ្វើសក្ការគោរពបូជាជំនឿសាសនា។ ព្រះវិហារនេះ បានចាប់ផ្តើមកសាងនៅថ្ងៃទី ២០ ខែឧសភា ឆ្នាំ២០២០ មកទល់ពេលនេះសម្រេចជាស្ថាពរ ហើយត្រូវបានសម្ពោធនិងបញ្ចុះខណ្ឌសីមាតាមប្រពៃណីនៃពុទ្ធសាសនាទក្ខិណនិកាយខ្មែរ។ សរុបតម្លៃកសាងព្រះវិហារនិងសមិទ្ធផលផ្សេងៗគិតជាទឹកប្រាក់ជាង ៣០ ពាន់លានដុង។

ថ្លែងក្នុងពិធីសម្ពោធ លោក ង្វៀងធឹកហៀង អនុប្រធានគណៈកម្មាធិការប្រជាជនក្រុង ជំនួសមុខថ្នាក់ដឹកនាំក្រុងកឹងធើ អបអរសាទរចំពោះសមិទ្ធផលដែលសម្រេចបាននៃវិទ្យាស្ថានពុទ្ធសាសនាទក្ខិណនិកាយខ្មែរ ក្នុងរយៈពេលកន្លង។ ទន្ទឹមនឹងនោះ សង្ឃឹមថាក្រោយពីពិធីសម្ពោធសមាគមពុទ្ធសាសនាវៀតណាម គណៈអភិបាលសមាគមពុទ្ធសាសនាវៀតណាមក្រុងកឹងធើ ព្រះសង្ឃពុទ្ធសាសនាទក្ខិណនិកាយខ្មែរ ពុទ្ធបរិស័ទជិតឆ្ងាយបន្តការយកចិត្តទុកដាក់ ឧបត្ថម្ភផ្នែកសម្ភារៈទាំងស្មារតីដើម្បីសកម្មភាពនៃវិទ្យាស្ថានកាន់តែមានប្រសិទ្ធភាពពីមួយថ្ងៃទៅមួយថ្ងៃ សម្រេចគុណភាពខ្ពស់ បណ្តុះបណ្តាលបានបញ្ញវន្តសង្ឃ និងពលរដ្ឋដ៏ល្អសម្រាប់ប្រទេសជាតិ។

ស្របក្នុងឱកាសនេះ មានសមូហភាព និងបុគ្គលជាច្រើនដែលបានរួមវិភាគទានក្នុងដំណាក់កាលកសាងព្រះវិហារ ទទួលប័ណ្ណស្ងើចសរសើរទឹកចិត្តជ្រះថ្លារបស់មជ្ឈិមសមាគមពុទ្ធសាសនាវៀតណាម គណៈអភិបាលសមាគមពុទ្ធសាសនាវៀតណាមក្រុងកឹងធើ និងប័ណ្ណសរសើររបស់ប្រធានគណៈកម្មាធិការប្រជាជនក្រុងកឹងធើ។

គម្រោងវិទ្យាស្ថានពុទ្ធសាសនាទក្ខិណនិកាយខ្មែរ ត្រូវបានរចនាប្លង់កសាងដោយមានសំណង់ ១៩ មុខ។ មកទល់ពេលនេះ វិទ្យាស្ថានបានកសាងនិងសម្រេចជាស្ថាពរសំណង់សំខាន់ៗនោះគឺ៖ អគារគណៈអធិការបតី សម្ពោធនៅថ្ងៃទី ៩ ខែមករា ឆ្នាំ២០១៩; ឧបដ្ឋានសាលាសម្ពោធនៅថ្ងៃទី ២៦ ខែមេសាឆ្នាំ២០២៣៕

តឹមខ្វា- លីសៀ

ចែករំលែកអត្ថបទ

ពាក្យគន្លឹះ