សន្តិសុខ - ការពារប្រទេស សន្តិសុខ

13/01/2025 - 16:02

ក្រើនរំលឹកសិស្សទិញតុក្កតា Kumanthong យកមកគោរពបូជា “ថ្វាយតង្វាយ” បន់ស្រន់លាភសំណាងរៀនពូកែ

មានសិស្សមួយចំនួននៅខេត្តក្វាងណាម បានឡើងបណ្ដាញសង្គមទិញតុក្កតា Kumanthong យកមកគោរពបូជា ទិញនំ ស្ករគ្រាប់ ទឹកដោះ “ថ្វាយ” ដើម្បីបន់ស្រន់សុំលាភសំណាង និងរៀនពូកែ។ យោងតាមនគរបាល នេះជាសកម្មភាពអបិយជំនឿដ៏គ្រោះថ្នាក់បំផុត។ មន្ទីរអប់រំនិងបណ្ដុះបណ្ដាលខេត្តក្វាងណាម បានផ្ញើសារលិខិតដល់គ្រប់ការិយាល័យអប់រំនិងបណ្ដុះបណ្ដាលនិងសាលារៀន អំពីការពង្រឹងសន្ដិសុខក្នុងសាលារៀន។

តុក្កតានេះត្រូវបានសង្ស័យថាជា Kumanthong។ រូបថតជាឧទាហរណ៍
ដែលផ្ដល់ជូនដោយនគរបាល

យោងតាមមន្ទីរអប់រំនិងបណ្តុះបណ្តាល ឆ្លងតាមរយៈការក្ដាប់ស្ថានភាពរបស់នគរបាលខេត្តក្វាងណាម បច្ចុប្បន្ន លើភូមិសាស្រ្តខេត្តបានកើតមានស្ថានភាពសិស្សមួយចំនួនឡើងបណ្ដាញសង្គមទិញតុក្កតា Kumanthong យកមកគោរពបូជា ទិញនំ ស្ករគ្រាប់ ទឹកដោះនិងភេសជ្ជៈផ្សេងៗ”ថ្វាយ” ដើម្បីបន់ស្រន់លាភសំណាងនិងរៀនពូកែ។

ពួកជនអាក្រក់បានឆ្លៀតឱកាសលើស្មារតី ងាយជឿការចង់ដឹងចង់ឃើញ និងខ្វះការយល់ដឹងរបស់សិស្សដើម្បីបញ្ចុះបញ្ចូលអូសទាញប្អូនៗឱ្យជឿនិងទិញតុក្កតា។

នេះជាសកម្មភាពអបិយជំនឿដ៏គ្រោះថ្នាក់បំផុត ដែលបង្កភាពជ្រួលច្របល់ ភ័យខ្លាច បង្កើតផលអវិជ្ជមានដល់សិស្ស ក្រុមគ្រួសារនិងសង្គម។ មន្ទីរសំណូមពរដល់ប្រធានអង្គភាពនានា ពង្រឹងការងារផ្សព្វផ្សាយអប់រំ ដើម្បីលើកកម្ពស់ស្មារតីភ្ញាក់រលឹកដល់សិស្សានុសិស្ស។ មិនទុកឱ្យមុខសញ្ញាអាក្រក់ឆ្លៀតឱកាសអូសទាញចូលរួម សកម្មភាពល្មើសច្បាប់។ ប្តេជ្ញាមិនទុកឱ្យកើតមានស្ថានភាពសិស្សចូលរួមសកម្មភាពអបិយជំនឿនិងសកម្មភាពសាសនាខុសច្បាប់។ ក្រៅពីនោះ ក្ដាប់ស្ថានភាពសិស្សឱ្យបានទាន់ពេល សហការផ្ដល់ព័ត៌មានដល់កម្លាំងនគរបាលខណៈពេលប្រទះឃើញករណីផ្សេងៗដែលពាក់ព័ន្ធ។

កន្លងមក នគរបាលខេត្តក្វាងណាម បានផ្ញើសារលិខិតដល់មន្ទីរអប់រំនិងបណ្ដុះបណ្ដាលខេត្តនេះ សំណូមពរសហការធានាសន្ដិសុខនៅតាមមូលដ្ឋានអប់រំ។

នគរបាលប្រទះឃើញលើភូមិសាស្រ្តកើតមានស្ថានភាពសិស្សមួយចំនួនចូលបណ្ដាញសង្គម រកទិញតុក្កតា Kumanthong។ តុក្កតានេះគឺជាទម្រង់អបិយជំនឿមានប្រភពពីប្រទេសថៃ ដោយមានពាក្យចចាមអារ៉ាមថា មានអានុភាពផ្នែកជំនឿជាច្រើន នាំមកលាភសំណាងដល់អ្នកថ្វាយតង្វាយ បានរីករាលដាលមកដល់ប្រទេសវៀតណាម៕

យោងតាមtuoitre.vn - ប្រែសម្រួល៖ ថាច់ធី

ចែករំលែកអត្ថបទ

ពាក្យគន្លឹះ