សន្តិសុខ - ការពារប្រទេស ការពារប្រទេស

25/11/2024 - 15:20

កសាងកងកម្លាំងប្រជាស្វ័យត្រាណរឹងមាំស័ក្តិសមនឹងទំនុកចិត្តរបស់ប្រជាជន

គណៈបញ្ជាការយោធាឃុំថាញមី ស្រុកចូវថាញ់ ខេត្តត្រាវិញ បានដឹកនាំ ចង្អុលការដល់កងកម្លាំងប្រជាស្វ័យត្រាណអនុវត្តល្អភារកិច្ច ជួយប្រជាជនរក្សាខ្ជាប់ទំនុកចិត្តលើបក្សនិងរដ្ឋ ស្ងប់អារម្មណ៍ក្នុងការអភិវឌ្ឍសេដ្ឋកិច្ច-សង្គម។

កម្មាភិបាល យុទ្ធជនចូលរួមការហ្វឹកហ្វាត់។

កងកម្លាំងប្រជាស្វ័យត្រាណ បានពង្រីកល្អតួនាទីស្នូលក្នុងការអនុវត្តកិច្ចការយោធា ការពារប្រទេសនៅភូមិភាគ ចូលរួមរក្សាលំនឹងសន្តិសុខនយោបាយសណ្តាប់ធ្នាប់ សុវត្ថិភាពសង្គម បង្ការទប់ស្កាត់ ជម្នះផលវិបត្តិគ្រោះធម្មជាតិ លុបបំបាត់ភាពក្រីក្រ។ល។ តាមរយៈនោះ រួមចំណែកកសាងគោលជំហរការពារប្រទេសទូទាំងប្រជាជន ផ្សារខ្ជាប់នឹងគោលជំហរសន្តិសុខប្រជាជនរឹងមាំ បង្កជាបរិស្ថានងាយស្រួលដើម្បីអភិវឌ្ឍសេដ្ឋកិច្ច-សង្គម ត្រូវបានថ្នាក់ដឹកនាំភូមិភាគនិងប្រជាជនទំនុកចិត្ត។

លោកង្វៀងវ៉ាន់ភឿក មេបញ្ជាការរងនៃគណៈបញ្ជាការយោធាឃុំថាញមី ឱ្យដឹង៖ “ដើម្បីកសាងកងកម្លាំងប្រជាស្វ័យត្រាណរឹងមាំ គណៈបញ្ជាការយោធាឃុំ បានធ្វើសេនាធិការជូនគណៈកម្មាធិការបក្ស គណៈបញ្ជាការយោធាឃុំ ផ្សព្វផ្សាយព្រមៗគ្នានូវបទបញ្ជាសេចក្តីសម្រេចចិត្ត ពិសេស គឺច្បាប់ស្តីពីកងកម្លាំងប្រជាស្វ័យត្រាណ បង្កើតការឯកភាពក្នុងការគ្រប់គ្រង បញ្ជាការចំណាត់ការកសាងកងកម្លាំងប្រជាស្វ័យត្រាណ។ ជាមួយគោលលំនាំ “រឹងមាំទូលំទូលាយ” កងកម្លាំងប្រជាស្វ័យត្រាណឃុំ បានយកចិត្តទុកដាក់កសាងតាមទិសដៅរឹងមាំគ្រប់ផ្នែក ក្នុងនោះ ប្រកាន់យកការកសាងនយោបាយជាចំណុចសំខាន់ ការហ្វឹកហាត់ជាគន្លឹះស្នូល”។

ក្រៅពីនោះ ក្នុងការងារហ្វឹកហាត់ គណៈបញ្ជាការយោធាឃុំ ក៏បានខ្នះខ្នែងធ្វើសេនាធិការលើកសំណើដល់ថ្នាក់ដឹកនាំគណៈកម្មាធិការបក្សគ្រប់លំដាប់ថ្នាក់ រដ្ឋអំណាច គណៈបញ្ជាការយោធាស្រុក ផ្លាស់ថ្មីជាប្រចាំខ្លឹមសារនិងវិធីសាស្ត្រហ្វឹកហាត់។ ចំណុចថ្មីក្នុងប៉ុន្មានឆ្នាំនេះ គឺការត្រៀមបម្រុងយ៉ាងហ្មត់ចត់ និងត្រួតពិនិត្យយ៉ាងម៉ឺងម៉ាត់នូវលក្ខខ័ណ្ឌមុននឹងឈានដល់វគ្គហ្វឹកហាត់កងកម្លាំងប្រជាស្វ័យត្រាណ។ ជាមួយនឹងការផ្លាស់ថ្មីជាប្រចាំខ្លឹមសាររៀបចំនិងវិធីសាស្ត្រហ្វឹកហាត់សម្រាប់កងកម្លាំងប្រជាស្វ័យត្រាណជាច្រើនឆ្នាំមកនេះ គុណភាពសរុបកម្រិតវិជ្ជានិងលទ្ធភាពត្រៀមប្រយុទ្ធរបស់កងកម្លាំងប្រជាស្វ័យត្រាណឃុំ បង្កើតបាននូវភាពទម្លុះទម្លាយសម្រេចបានលទ្ធផលល្អ ពូកែក្នុងការហ្វឹកហាត់កើនឡើងខ្ពស់ពីមួយថ្ងៃទៅមួយថ្ងៃ។ ចាប់ពីដើមឆ្នាំមក គណៈបញ្ជាការយោធាឃុំបានហ្វឹកហាត់កងជីវពលចល័ត ៨៤/៨៤ កងជីវពលនៅនឹងកន្លែង ១១៤/១១៤ កងជីវពលឆ្នាំទី១ គឺ៧២/៧២សម្រេចតាមផែនការដាក់ចេញ ១០០%។

យុទ្ធជនថាច់ថាញតុង កងជីវពលចល័តភូមិអាងចាយ ឱ្យដឹង៖ “កងប្រជាស្វ័យត្រាណ គឺជាកងកម្លាំងប្រដាប់អាវុធមហាជនជាសមាសភាពរបស់កងកម្លាំងប្រដាប់អាវុធប្រជាជន ជាកងកម្លាំងការពារបក្ស ការពាររដ្ឋអំណាច ការពារអាយុជីវិតនិងទ្រព្យសម្បត្តិរបស់ប្រជាជន ទ្រព្យសម្បត្តិរបស់រដ្ឋ ដូច្នេះ ក្នុងនាមជាយុទ្ធជនកងកម្លាំងប្រជាស្វ័យត្រាណឃុំ ខ្ញុំតែងខិតខំបញ្ចេញកម្លាំងក្នុងការរៀនសូត្រនិងលត់ដំដើម្បីអនុវត្តល្អភារកិច្ច។ ដើម្បីធានាសន្តិសុខសណ្តាប់ធ្នាប់លើភូមិសាស្ត្រឃុំ ពិសេសគឺនៅថ្ងៃបុណ្យទានផ្សេងៗ កងកម្លាំងប្រជាស្វ័យត្រាណឃុំ អនុវត្តល្អតាមផែនការរបស់គណៈបញ្ជាការយោធាឃុំអំពីការដើរល្បាត រួមចំណែកក្នុងការបង្ការទប់ស្កាត់ ប្រទះឃើញនិងចាត់វិធានការបានទាន់ពេលរាល់បទល្មើសអំពីសន្តិសុខសណ្តាប់ធ្នាប់”៕

សើុងម៉ាល័យ-ប្រែសម្រួល៖ មុនី

ចែករំលែកអត្ថបទ

ពាក្យគន្លឹះ