ទីតាំងដែលទាក់ទាញភ្ញៀវទេសចរក្នុងប៉ុន្មានឆ្នាំជិតៗនេះរបស់ខេត្តវិញឡុង គឺមណ្ឌលរំលឹកអនុស្សាវរីយ៍អតីតនាយករដ្ឋមន្ត្រី វ៉វ៉ាន់គៀត នៅភូមិផុងថើយ ទីរួមស្រុកវ៉ុងលីម ស្រុកវ៉ុងលីម។ ក្រៅពីអត្ថន័យប្រវត្តិសាស្ត្រ ទីនេះនៅទាំងគួរឱ្យចំណាស់អារម្មណ៍ដោយបរិយាកាសស្រឡះស្រឡំ ស្រស់ស្រាយនិងដិតដាមដោយរចនាបថសួនច្បារណាមបូ។
![មណ្ឌលរំលឹកអនុស្សាវរីយ៍អតីតនាយករដ្ឋមន្ត្រី វ៉វ៉ាន់គៀត](https://baocantho.com.vn/image/fckeditor/upload/2024/20240617/images/khmer/81.jpg)
![មណ្ឌលរំលឹកអនុស្សាវរីយ៍អតីតនាយករដ្ឋមន្ត្រី វ៉វ៉ាន់គៀត](https://baocantho.com.vn/image/fckeditor/upload/2024/20240617/images/khmer/83.jpg)
![មណ្ឌលរំលឹកអនុស្សាវរីយ៍អតីតនាយករដ្ឋមន្ត្រី វ៉វ៉ាន់គៀត](https://baocantho.com.vn/image/fckeditor/upload/2024/20240617/images/khmer/82.jpg)
![មណ្ឌលរំលឹកអនុស្សាវរីយ៍អតីតនាយករដ្ឋមន្ត្រី វ៉វ៉ាន់គៀត](https://baocantho.com.vn/image/fckeditor/upload/2024/20240617/images/khmer/84.jpg)
រូបភាពមួយចំនួនក្នុងមណ្ឌលរំលឹកអនុស្សាវរីយ៍អតីតនាយករដ្ឋមន្ត្រី វ៉វ៉ាន់គៀត
នៅស្រុកវ៉ុងលីម។
មណ្ឌលរំលឹកអនុស្សាវរីយ៍នៅចម្ងាយពីក្រុងវិញឡុងប្រមាណ៤០គីឡូម៉ែត្រ ឆ្ងាយពីផ្លូវជាតិលេខ៥៣ជាង១០០ម៉ែត្រ ស្ថិតនៅផ្លូវណាមគីគើយងៀ គឺជាផ្លូវធំភ្ជាប់ជាមួយផ្លូវជាតិលេខ៥៣ ចូលផ្សារវ៉ុងលីម។ មណ្ឌលរំលឹកអនុស្សាវរីយ៍អតីតនាយករដ្ឋមន្ត្រី វ៉វ៉ាន់គៀត បានបើកការដ្ឋានសាងសង់នៅខែកញ្ញា ឆ្នាំ២០១០ និងសម្រេចរួចរាល់នៅខែវិច្ឆិកា ឆ្នាំ២០១២ នៅលើទំហំផ្ទៃដី១៧.០០០ម៉ែត្រការ៉េ។ សំណង់គឺជាប្រជុំអគារសួនច្បារដែលមានលក្ខណៈស្ថាបត្យកម្មបែបណាមបូ ដោយមានអគារជាច្រើនដំបូលទាប មានបរិយាកាលស្រឡះស្រឡំ មានសួនច្បារស្រះត្រី និងកម្រាលស្មៅជាដើម។
ខាងក្នុងមណ្ឌលសក្ការបូជាអតីតនាយករដ្ឋមន្ត្រី វ៉វ៉ាន់គៀត សំណង់ភាគច្រើនសាងសង់តាមទិសកើត-លិច គួបផ្សំនឹងជួរសំណង់មួយសម្រាប់សកម្មភាពពិធីកិច្ចនៅទិសជើង-ត្បូង។ នៅខាងក្រោយមណ្ឌលសក្ការបូជា គឺស្ពានតភ្ជាប់កន្លែងធ្វើការនិងបន្ទប់សម្រាករបស់អតីតនាយករដ្ឋមន្ត្រី វ៉វ៉ាន់គៀត។ បងស្រីថាច់កឹមធ្វី នៅសង្កាត់ស្វឹងខាញ់ ខណ្ឌនិញកេវ ក្រុងកឹងធើ ឱ្យដឹង៖ “បន្ទប់ធ្វើការរបស់អតីតនាយករដ្ឋមន្ត្រី មានទំហំតូចប្រហែល៣០ម៉ែត្រការ៉េ រួមមានគ្រែមួយ និងតុធ្វើការមួយ។ និយាយតាមត្រង់ ខ្ញុំពិតជាមិនស្មានពេលឃើញបន្ទប់ធ្វើការមានភាពសាមញ្ញយ៉ាងនេះ។ បន្ទាប់ពីភាពភ្ញាក់ផ្អើល គឺការរំភើបអារម្មណ៍ចំពោះបុគ្គលិកលក្ខណៈដ៏ឧត្តម ជាអ្នកដឹកនាំមួយរូប តែងធ្វើការដើម្បីប្រទេសជាតិនិងប្រជាជន”។ ពិសេស នៅក្នុងបន្ទប់នេះ នៅមានក្រដាសប្រតិទិន និងនាឡិកាមួយគ្រឿងឈប់ដើរ ជារៀងរហូតនៅពេលដែលនាយករដ្ឋមន្រ្ដី វ៉វ៉ាន់គៀត បានទទួលអនិច្ចកម្ម។ ក្រៅពីបន្ទប់ នៅមានមណ្ឌលតាំងពិព័រណ៍វត្ថុតាំងរបស់អតីតនាយករដ្ឋមន្ត្រី វ៉វ៉ាន់គៀត ដែលគាត់ធ្លាប់ប្រើប្រាស់កាលនៅមានជីវិត ដូច៖ ស្បែកជើង រ៉ាកែតវាយកូនបាល់ និងពានរង្វាន់វាយកូនបាល់របស់នាយករដ្ឋមន្ត្រីកាលពីឆ្នាំ២០០០។ល។ ជាអ្នកចូលចិត្តថតរូប សម្ភារៈបន្សល់ទុករបស់អតីតនាយករដ្ឋមន្ត្រី មិនអាចខ្វះម៉ាស៊ីនថតរូបនោះទេ។ ជាពិសេស គឺរូបភាពព្រឹត្តិការណ៍ បានបង្ហាញពីស្នាមអនុស្សាវរីយ៍របស់អតីតនាយករដ្ឋមន្ត្រីក្នុងដំណើរការដឹកនាំប្រទេសជាតិ...។
ឆ្នាំ២០២២ មណ្ឌលរំលឹកអនុស្សាវរីយ៍អតីតនាយករដ្ឋមន្ត្រី វ៉វ៉ាន់គៀត បានរៀបចំណាត់ថ្នាក់ ជាកេរដំណែលថ្នាក់ជាតិ។ រៀងរាល់ឆ្នាំ នៅមណ្ឌលកេរដំណែលមានពិធីគោរពបូជារំលឹកគុណអតីតនាយករដ្ឋមន្ត្រីចំនួន២លើក គឺ៖ ពិធីអនុស្សាវរីយ៍ថ្ងៃខួបកំណើតចាត់តាំងឡើងនៅថ្ងៃទី២៣ ខែវិច្ឆិកា (សុរិយាគតិ) និងពិធីអនុស្សាវរីយ៍ទិវាគម្រប់ខួបទទួលមរណភាព រៀបចំឡើងនៅថ្ងៃទី៨ ខែ៥ តាមចន្ទគតិវៀតណាម៕
ហាថាញ-វិមាន