នៅស្រុកថើយប៊ិញ ខេត្តកាម៉ាវ ក្រៅពីជនជាតិកិញ មានជនជាតិភាគតិចជាច្រើនដូច៖ ខ្មែរ ចិន ចាម មឿង តាយ ថៃ ស្ទៀង។ល។ ក្នុងនោះ ជនជាតិខ្មែរមានចំនួនច្រើនជាងគេ ដោយមាន១.៦១៧គ្រួសារ មានមនុស្ស៦.៧២៥នាក់ ជនជាតិចិនមាន១០៤គ្រួសារ មានមនុស្ស៣៣៦នាក់; ជនជាតិផ្សេងទៀតមានចំនួនមនុស្សតិច។ ស្រុកមានកម្មាភិបាល អ្នករដ្ឋការ បុគ្គលិក កងកម្លាំងប្រដាប់អាវុធ និងអ្នកជំនួយការនៅតាមឃុំ ភូមិនិងអនុសង្កាត់ ជាជនជាតិភាគតិចចំនួន៧៥នាក់។
![ពង្រីកកម្លាំងមហាសាមគ្គីបណ្តាជនជាតិ](https://baocantho.com.vn/image/fckeditor/upload/2024/20240617/images/khmer/31.jpg)
លោកហ្វិញហាញ់ អនុលេខានៃគណៈកម្មាធិការបក្សស្រុកថើយប៊ិញ ជូនលិខិតសរសើររបស់គណៈកម្មាធិការប្រជាជនស្រុកដល់សមូហភាពដែលមានស្នាដៃឆ្នើមក្នុងការងារ ដំណាក់កាល ២០១៩-២០២៤ នៅមហាសន្និបាតតំណាងជនជាតិភាគតិចស្រុកលើកទី៤ ឆ្នាំ២០២៤។
ចាប់ពីឆ្នាំ២០១៩ រហូតមកដល់ពេលនេះ ស្រុកបានរៀបចំបណ្តុះបណ្តាលវិជ្ជាជីវៈដល់ពលករជាង១០ពាន់នាក់ ក្នុងនោះ មានពលករជនជាតិភាគតិចចំនួន៣០០នាក់; ដោះស្រាយការងារធ្វើជូនពលករជាង១៨.១០០ នាក់ (នៅក្នុងខេត្ត ក្រៅខេត្តនិងទៅពលកម្មនៅក្រៅប្រទេស) ក្នុងនោះ មានពលករជនជាតិភាគតិច៣៦៣នាក់។ ក្នុងអំឡុងពេលនេះ ភូមិភាគអង្គាសទឹកប្រាក់បានជាង២០ពាន់លានដុងសម្រាប់មូលនិធិដើម្បីអ្នកក្រ ឧបត្ថម្ភសាងសង់និងជួសជុលផ្ទះមហាសាមគ្គីបាន៥០ខ្នងជូនគ្រួសារក្រីក្រ (មាន១៥គ្រួសារជនជាតិភាគតិច)។ ទន្ទឹមនឹងនេះ កម្មវិធីទិសដៅជាតិអភិវឌ្ឍសេដ្ឋកិច្ច- សង្គមនៅតំបន់ជនជាតិភាគតិចនិងតំបន់ភ្នំ ស្រុកក៏បានឧបត្ថម្ភសាងសង់ផ្ទះចំនួន៤២ខ្នង បង្វែរមុខរបរជូនប្រជាជន២៩៤គ្រួសារនិងគាំទ្រការផលិតតាមខ្សែសង្វាក់តម្លៃដល់គម្រោងចំនួន១៧ ដែលមាន៧០គ្រួសារចូលរួម។
![ពង្រីកកម្លាំងមហាសាមគ្គីបណ្តាជនជាតិ](https://baocantho.com.vn/image/fckeditor/upload/2024/20240617/images/khmer/32.jpg)
មាមីងប្រមូលផលបង្កងសាវទាវ។ នេះគឺជាទម្រង់សេដ្ឋកិច្ចមួយដែលប្រជាជនជាច្រើនបានអនុវត្ត ក្នុងនោះមានជនជាតិភាគតិចនៅស្រុកថើយប៊ិញផងដែរ។
ជារៀងរាល់ឆ្នាំ គ្រួសារក្រីក្រនៅក្នុងស្រុកមានការថយចុះ។ នៅចុងឆ្នាំ២០១៩ ទូទាំងស្រុក មានគ្រួសារក្រីក្រចំនួន៩២៨គ្រួសារស្មើនឹង២,៧៦%។ គ្រួសារប្រកៀកបន្ទាត់ក្រមានចំនួន៩៥៧ស្មើនឹង២,៨៥% (ក្នុងនោះ គ្រួសារជនជាតិភាគតិចក្រីក្រមាន១៥៤គ្រួសារ និងប្រកៀតបន្ទាត់ក្រមាន១១៦គ្រួសារ)។ មកដល់ពេលនេះ ចំនួនគ្រួសារក្រីក្របានកាត់បន្ថយនៅក្រោម៦០០គ្រួសារ ក្នុងនោះ គ្រួសារជនជាតិភាគតិចក្រីក្រមានប្រមាណ១០០គ្រួសារ។
ស្រុកថើយប៊ិញ បានយកចិត្តទុកដាក់ពិសេសដល់ការពង្រីកកម្លាំងមហាសាមគ្គីបណ្តាជនជាតិ។ លោកស្រីឌាំងគីមអូវ អនុប្រធានគណៈកម្មាធិការរណសិរ្សមាតុភូមិស្រុក មានប្រសាសន៍៖ “ជារៀងរាល់ឆ្នាំ គណៈអចិន្ត្រៃយ៍នៃគណៈកម្មាធិការរណសិរ្សមាតុភូមិស្រុក បានរៀបចំផែនការនិងណែនាំរណសិរ្សមាតុភូមិគ្រប់លំដាប់ថ្នាក់ក្នុងស្រុក អង្គការសមាជិកនានា សហការនិងចុះហត្ថលេខាលើកម្មវិធីសហការជាមួយការិយាល័យជនជាតិស្រុក លើកកម្ពស់ស្មារតីសាមគ្គី លើកទឹកចិត្តកម្មាភិបាលបំពេញការងារជនជាតិ ឱ្យមានការផ្លាស់ប្តូរ ច្នៃប្រតិដ្ឋ ខិតខំសិក្សា; ត្រួតពិនិត្យ ការអនុវត្តនូវគោលនយោបាយជនជាតិ ការងារជនជាតិ ក៏ដូចជាឃោសនា ចលនា រក្សានិងពង្រីកនូវអត្តសញ្ញាណវប្បធម៌ដ៏ល្អប្រសើររបស់ជនជាតិ”។
លោកស្រីឌាំងគីមអូវ ឱ្យដឹងបន្ថែម៖ “ជារៀងរាល់ឆ្នាំ រណសិរ្សមាតុភូមិក៏បានសហការជាមួយស្ថាប័នសមត្ថកិច្ចទៅសួរសុខទុក្ខ ប្រសិទ្ធពរនិងលើកទឹកចិត្តបុគ្គលឆ្នើម អ្នកមានប្រជាប្រិយក្នុងជនជាតិភាគតិច ក្នុងឱកាសថ្ងៃបុណ្យទានចូលឆ្នាំថ្មី ឬពេលឈឺថ្កាត់។ បង្កលក្ខណៈងាយស្រួលសម្រាប់ជនជាតិភាគតិច រៀបចំពិធីបុណ្យប្រពៃណី និងបុណ្យចូលឆ្នាំថ្មីទៅតាមពិធីកិច្ចប្រពៃណី ទំនៀមទម្លាប់ ធានាបាននូវភាពសប្បាយរីករាយ សុវត្ថិភាព ប្រិតសំចៃនិងត្រូវតាមបទប្បញ្ញត្តិនៃច្បាប់៕
យោងតាម៖ កាសែតកាម៉ាវ - បកប្រែ៖ សុផន