សន្តិសុខ - ការពារប្រទេស ការពារប្រទេស

12/03/2024 - 16:30

រក្សាលំនឹងសន្តិសុខនយោបាយនៅតំបន់ព្រំដែនសមុទ្រស្រុកត្រឹងដេ

កម្មាភិបាល យុទ្ធជននៃប៉ុស្តិ៍ការពារព្រំដែនទ្រុងប៊ិញនិងកងទ័ពការពារព្រំដែនខេត្តសុកត្រាំង តែងកាន់ជាប់កាំភ្លើង សហការជាមួយគណៈកម្មាធិការបក្ស រដ្ឋអំណាចភូមិភាគនិងកងកម្លាំងទាំងក្នុងនិងក្រៅភូមិភាគ ដើម្បីក្តាប់ស្ថានភាពនិងធានាសន្តិសុខសណ្តាប់ធ្នាប់នៅតំបន់ព្រំដែនសមុទ្រ ស្រុកត្រឹងដេ។

កម្មាភិបាល យុទ្ធជនកងទ័ពការពារព្រំដែន ផ្សព្វផ្សាយពីការបង្ការ ប្រឆាំងការរត់គយគៃបន្លំពាណិជ្ជកម្មតាមកប៉ាល់។

លោកអនុសេនីយ៍ឯក ហ្វិញលីតឿង ស្នងការនយោបាយប៉ុស្តិ៍ការពារព្រំដែនទ្រុងប៊ិញ បានឱ្យដឹង៖ ស្រុកត្រឹងដេ មានផ្លូវអន្តរខេត្តនិងស្រុកជាច្រើន រួមជាមួយនឹងទន្លេធំៗ ដូច្នេះស្ថានភាពនៃសកម្មភាពរបស់ឧក្រិដ្ឋជនមានភាពស្មុគស្មាញ ដោយកលល្បិចជាច្រើនដើម្បីទប់ទល់ជាមួយនឹងកម្លាំងសមត្ថកិច្ច។ ម៉្យាងលើភូមិសាស្រ្តមានជនរួមជាតិខ្មែររស់នៅកុះករ ជីវភាពរបស់ប្រជាជនមួយចំនួននៅជួបការលំបាក ដូច្នេះងាយនឹងរងការអូសទាញធ្វើឱ្យបាត់សន្តិសុខ សណ្តាប់ធ្នាប់ និងប្រព្រឹត្តបំពានច្បាប់នៅតំបន់ព្រំដែនសមុទ្រ។ ដោយកំណត់ច្បាស់ការងារប្រយុទ្ធ នឹងការប្រព្រឹត្តបទល្មើស គឺជាការងារលំបាកស្មុគស្មាញ និងជាប្រចាំ ម្ល៉ោះហើយអង្គភាពបានជំរុញការឃោសនា គួបផ្សំនឹងការប្រយុទ្ធ បង្ក្រាបបទល្មើស។ ទន្ទឹមនឹងនោះ ពង្រឹងការរៀបចំហ្វឹកហ្វឺនវិជ្ជាជីវៈ និងលត់ដំកាយសម្បទាដល់កម្មាភិបាល យុទ្ធជន ឱ្យមានចំណេះដឹងផ្នែកច្បាប់និងមានសុខភាពល្អ ដើម្បីអនុវត្តសម្រេចបានល្អនូវភារកិច្ចដែលបានប្រគល់ឱ្យ។

ឆ្នាំ២០២៣ អង្គភាពបានចាប់ឃាត់ខ្លួននិងធ្វើបណ្ដឹងពីបទឧក្រិដ្ឋ៥ករណី ដល់មុខសញ្ញា ៥ នាក់ ដែលរក្សាទុកនិងប្រើប្រាស់គ្រឿងញៀនខុសច្បាប់និងវត្ថុតាងគឺ Methamphetamine ១១,៤៧៥៤ក្រាម។ ចាប់២៥ករណីដោយមានមុខសញ្ញា៧៤នាក់ ចេញសេចក្តីសម្រេចពិន័យរដ្ឋបាល២០ករណីចំពោះមុខសញ្ញា៦៩នាក់ពីបទរត់គយ និងលេងល្បែងស៊ីសង គិតជាទឹកប្រាក់ជាង១៥០លានដុង; រឹបអូសបារីបរទេសគ្រប់ប្រភេទ៧១០កញ្ចប់; ធ្វើសេនាធិការជូនគណៈកម្មាធិការប្រជាជនស្រុកត្រឹងដេ ចេញសេចក្តីសម្រេចពិន័យរដ្ឋបាល៤ករណីចំពោះមុខសញ្ញា៤នាក់ ដែលរំលោភបំពានលើវិស័យធារាសាស្ត្រនិងទំនប់ដោយពិន័យជាប្រាក់ ១០០ លានដុង។ល។ កំពង់ផែត្រឹងដេ មានកប៉ាល់ចេញចូលច្រើនបង្កប់ហានិភ័យនៃការរត់គយ និងក្លែងបន្លំពាណិជ្ជកម្ម។ ដូច្នេះ អង្គភាពបានបង្កើនចំនួនទ័ពសម្រាប់ដំណាក់ត្រួតពិនិត្យការពារព្រំដែនទាំងពីរសហការរៀបចំ ដើរល្បាត និងត្រួតពិនិត្យយ៉ាងតឹងរ៉ឹងជាញឹកញាប់ចំពោះមនុស្ស មធ្យោបាយដែលចេញចូលប្រកបមុខរបរអាជីវកម្មតាមផ្លូវសមុទ្រ ធានាត្រូវតាមនីតិវិធីនិងបែបបទ។ ឆ្នាំ២០២៣ រៀបចំដើរល្បាតឯករាជ្យបានចំនួន១០២លើក មានសមមិត្តចូលរួមជាង៨៧២នាក់ មានចម្ងាយផ្លូវ ១.១១២គីឡូម៉ែត្រ។ ត្រួតពិនិត្យកប៉ាល់នេសាទចំនួន៥.៣០០គ្រឿង មនុស្ស២៨៤.៤១០នាក់។ល។ អាស្រ័យហេតុនេះ ស្ថានភាពសន្តិសុខនយោបាយ សណ្តាប់ធ្នាប់ សុវត្ថិភាពសង្គមតំបន់ព្រំដែនសមុទ្រត្រូវបានរក្សាលំនឹងនិងមានស្ថិរភាព។

លោកវរសេនីយ៍ឯក ង្វៀងថាញផុង ប្រធានប៉ុស្តិ៍ការពារព្រំដែនទ្រុងប៊ិញ ឱ្យដឹង៖ “អង្គភាពបានម្ចាស់ការផ្លាស់ថ្មីវិធីសាស្ត្រប្រយុទ្ធ ផ្សព្វផ្សាយអនុវត្តនូវវិធានការវិជ្ជាជីវៈជាច្រើន និងកសាងផែនការវិជ្ជាជីវៈ ដើម្បីប្រយុទ្ធប្រឆាំងនិងទប់ស្កាត់ឧក្រិដ្ឋកម្មគ្រឿងញៀន រត់គយ ក្លែងបន្លំពាណិជ្ជកម្ម និងបទល្មើសផ្សេងៗទៀត។ ប្តេជ្ញាមិនឱ្យកើតមានចំណុចក្តៅ ហេតុការណ៍ស្មុគស្មាញ រក្សាលំនឹងសន្តិសុខនយោបាយ សណ្តាប់ធ្នាប់ សុវត្ថិភាពសង្គម សក្តិសមជាទីបង្អែកដ៏រឹងមាំរបស់ប្រជាជននៅតំបន់ព្រំដែនសមុទ្រនៃស្រុកត្រឹងដេ៕

យ៉ីអាញ - បកប្រែ៖ សុផន

ចែករំលែកអត្ថបទ

ពាក្យគន្លឹះ