កីឡា - ទេសចរណ៍ ទេសចរណ៍

22/01/2024 - 16:02

វត្តបុរាណមានអាយុកាលជាង១.៥០០ឆ្នាំនៅក្រុងហាណូយ

នោះគឺវត្តត្រឹងក្វឹក ស្ថិតនៅលើឧបទ្វីបមួយតូចនៅត្រើយខាងកើតនៃបឹងហូតី ហាណូយ។ ឆ្នាំ ២០១៩ វត្តត្រឹងក្វឹក ឈរលំដាប់ថ្នាក់លេខ៣ ក្នុងចំណោមវត្តស្អាតបំផុតទាំង១០នៅលើពិភពលោក យោងតាមតារាងរៀបចំណាត់ថ្នាក់របស់គេហទំព័រ wanderlust.co.uk។

 ទិដ្ឋភាពខាងក្នុងព្រះវិហារ។

ដងផ្លូវចូលកាន់ខ្លោងទ្វារវត្ត។

ចេតិយជើងទៀនផ្កាឈូកប្រាំមួយជ្រុង បានកសាងនៅឆ្នាំ១៩៩៨ រួមមាន១១ជាន់ កម្ពស់១៥ម៉ែត្រ។ ជាន់នីមួយៗមានទ្វារចំនួន៦ដែលមានសណ្ឋានក្រឡូម។ នៅជាន់នីមួយៗមានតម្កល់បដិមាព្រះពុទ្ធអាមីតាភៈដោយថ្មប្រណីតពណ៌សនៅតាមទ្វារនីមួយៗ។

មានភ្ញៀវបរទេសជាច្រើនមកទស្សនា គោរពបូជានៅវត្តត្រឹងក្វឹក។

វត្តត្រឹងក្វឹក បានកសាងឡើងក្នុងរជ្ជកាលក្សត្រតៀងលី (លីណាមដេ ឆ្នាំ៥៤១ -៥៤៧) នៅភូមិអីហ្វា ក្បែរមាត់ទន្លេហុង ដំបូង វត្តមានឈ្មោះថា ខាយក្វឹក (មានន័យថាបង្កើតប្រទេស)។ ក្រោយមកត្រូវបានប្តូរឈ្មោះថាត្រឹងក្វឹក នៅក្នុងរជ្ជកាលក្សត្រឡេហីតុង (ឆ្នាំ១៦៨១ -១៧០៥) ដោយមានគោលបំណងទីនេះជា កន្លែងជួយប្រជាជនកម្ចាត់នូវគ្រោះធម្មជាតិ នាំមកជីវភាពសុខសាន្តដល់ប្រជាជនគ្រប់រូប។ វត្តត្រឹងក្វឹក ត្រូវបានជួសជុលច្រើនលើកច្រើនសា នៅឆ្នាំ១៦២៤, ១៦២៨ និងឆ្នាំ១៦៣៩។ លុះដល់ឆ្នាំ១៨១៥ ក្នុងរជ្ជកាលក្សត្រយ៉ាឡុង វត្តត្រូវបានជួសជុលជាបន្ត និងស្មិតជួង សូនរូបធំៗដ៏ស្រស់ស្អាត។ នៅឆ្នាំ១៨២១ ក្សត្រមិញម៉ាង បានយាងចេញពីរាជវាំងហ្វេ ទៅភូមិភាគខាងជើងក៏បានចូលទស្សនាវត្ត រួចពិភាក្សាដើម្បីជួសជុល។ នៅឆ្នាំ១៨៤២ ក្សត្រត្រេវទ្រី ក៏បានយាងចូលទស្សនាវត្ត រួចប្រទានមាសប្រាក់ដើម្បីជួសជុលផងដែរ។

កាលពីដើម វត្តត្រឹងក្វឹកជាមជ្ឈមណ្ឌលព្រះពុទ្ធសាសនានៃរាជធានីថាំងឡុង។ ក្នុងរជ្ជកាលក្សត្រលី ក្សត្រត្រឹង ច្រើនយាងមកក្រសាលទេសភាពនិងគោរពបូជាក្នុងឱកាសបុណ្យទាននៅវត្តនេះ ព្រោះហេតុនោះ ទើបមានវិមានជាច្រើន ត្រូវបានកសាងឡើង ដើម្បីព្រះមហាក្សត្រ សម្រាកលំហែព្រះកាយ ដូចជា វាំងធ្វីហ្វា និងវិមានហាមង្វៀន។ មានតម្លៃខាងប្រវត្តិសាស្ត្រ និងស្ថាបត្យកម្មដ៏ប្រណីត វត្តត្រូវបានទទួលស្គាល់ជាកេរដំណែលប្រវត្តិសាស្ត្រវប្បធម៌ថ្នាក់ ជាតិនៅឆ្នាំ១៩៨៩។ វត្តត្រឹងក្វឹក ត្រូវបានជួសជុលក្នុងពេលជិតៗនេះនៅឆ្នាំ២០១០ ដើម្បីអបអរសាទរមហាពិធីបុណ្យ១.០០០ឆ្នាំ ថាំងឡុង - ហាណូយ និងកិច្ចប្រជុំកំពូលព្រះពុទ្ធសាសនា ពិភពលោកលើកទី៦ ដែលបានប្រារព្ធនៅប្រទេសវៀតណាម កាលពីខែវិច្ឆិកា ឆ្នាំ២០១០។

ភ្ញៀវទេសចរដែលមកក្រុងហាណូយភាគច្រើនតែងចង់បានទៅទស្សនាវត្តនេះ ដោយសារតម្លៃប្រវត្តិសាស្ត្រដ៏ធំធេងដែលវត្តបានបន្សល់ទុកមក។ ម្យ៉ាងវិញទៀត វត្តមានសោភណភាពដ៏ស្រស់ស្អាត មានវត្ថុបុរាណជាច្រើន មានអាយុកាលរាប់រយឆ្នាំ ផ្ដល់នូវចំណេះដឹងដល់ភ្ញៀវទេសចរពេលមកទស្សនាអារាមដ៏ចំណាស់មួយនេះ៕

ហាថាញ-វិមាន

ចែករំលែកអត្ថបទ

ពាក្យគន្លឹះ