កីឡា - ទេសចរណ៍ កីឡា

02/01/2024 - 17:17

អភិរក្សវិញ្ញាសាកីឡាប្រពៃណីរបស់ជនរួមជាតិខ្មែរ

បុណ្យអកអំបុក-ប្រណាំងទូក-ងប្រពៃណីរបស់ជនរួមជាតិខ្មែរនៅខេត្តសុកត្រាំង បានក្លាយជាផលិតផលវប្បធម៌ ទេសចរណ៍ដ៏ពិសេស កំពុងបានខេត្តសុកត្រាំងអភិរក្សនិងលើកតម្កើង។

 ពិធីដាក់ទូក-ងនៅវត្តដៃតាសួស ឃុំភូមី។

ឆ្នាំ២០២១ ពិធីប្រណាំងទូក-ងរបស់ជនរួមជាតិខ្មែរខេត្តសុកត្រាំង បានទទួលស្គាល់ជាបេតិកភ័ណ្ឌវប្បធម៌អរូបី។ ឆ្នាំ២០២២ ពិធីបុណ្យអកអំបុក-ប្រណាំងទូក-ងខេត្តសុកត្រាំង បានបង្កើតកំណត់ត្រាហ្គីណេសវៀតណាម ដោយមានចំនួនទូក-ងនិងកីឡាករចូលរួមច្រើនបំផុត ចាប់ពីឆ្នាំ២០០៥ មកទល់បច្ចុប្បន្ន”។ ឆ្នាំ២០២៣ ខេត្តសុកត្រាំងបានផ្សព្វផ្សាយអនុវត្តគម្រោងអភិរក្សនិងលើកតម្កើងតម្លៃបេតិកភ័ណ្ឌវប្បធម៌អរូបីថ្នាក់ជាតិ ក្នុងនោះ មានពិធីប្រណាំងទូក-ងរបស់ជនរួមជាតិខ្មែរខេត្តសុកត្រាំង។ យោងតាមនោះ ខេត្តបានជំនួយថវិកាបោះទូក-ងថ្មី៤ទូក (ក្នុងមួយទូកតម្លៃជិត៤០០លានដុង) ប្រគេនដល់វត្តខ្មែរនៅស្រុកថាញ់ទ្រី ចូវថាញ់ ត្រឹងដេនិងទីរួមខេត្តវិញចូវ។ នេះជាក្ដីរីករាយ ជាកិត្តិយស ហើយក៏ជាកម្លាំងចលករសម្រាប់ជនរួមជាតិខ្មែរប្ដេជ្ញាចិត្តថែមទៀតក្នុងការថែរក្សាវិញ្ញសាកីឡាប្រពៃណីជនជាតិ។

ទិដ្ឋភាពទូក-ងមកចូលរួមក្នុងពិធីអុំប្រណាំងនៅខេត្តសុកត្រាំងឆ្នាំ២០២៣។

ព្រះឧបជ្ឈាយ៍ឡឹមសឿង ព្រះចៅអធិការវត្តសិរីនគរជុំ (អំពូយារ) ឃុំថាញ់ភូ ស្រុកមីស្វៀង មានថេរដីកា៖ “ជាច្រើនឆ្នាំមកនេះ រដ្ឋអំណាចគ្រប់លំដាប់ថ្នាក់បានយកចិត្តទុកដាក់ជំនួយថវិកា ដើម្បីវត្តបោះទូក-ងថ្មី គិតគូរដល់ការហាត់សមនិងអុំប្រណាំង។ នៅពេលពិធីប្រណាំងទូក-ងត្រូវបានទទួលស្គាល់ជាបេតិកភ័ណ្ឌវប្បធម៌អរូបីថ្នាក់ជាតិ វត្តនិងពុទ្ធបរិស័ទកាន់តែប្ដេជ្ញាចិត្តថែមទៀតក្នុងការអភិរក្សតម្លៃវប្បធម៌ ប្រពៃណីល្អប្រសើររបស់ជនជាតិ”។ ចាប់ពីឆ្នាំ ២០២០ មកទល់បច្ចុប្បន្ន អ្នកមីងត្រឹងធីមី នៅភូមិសាឡាង ឃុំអាងនិញ ស្រុកចូវថាញ់ តែងចំណាយថវិការាប់រយលានដុង/ឆ្នាំ ដើម្បីគិតគូរឱ្យក្រុមកីឡាករ-ការិនីទូក-ងបុរសនិងនារី វត្តទំនប់។ អ្នកមីងនៅទាំងវិនិយោគទឹកប្រាក់ជាង៣០០លានដុង ដើម្បីបោះទូក-ងថ្មីប្រគេនដល់វត្តទំនប់។ អ្នកមីងត្រឹងធីមី ចែករំលែក៖ “ការបោះទូក-ងថ្មី និងចំណាយគិតគូរដល់កីឡាករ-ការិនី២ក្រុមរបស់វត្តទំនប់ គឺកើតចេញពីការស្រឡាញ់ពេញចិត្ត និងចង់ជួយវត្តទំនប់រក្សាខ្ជាប់កីឡាប្រណាំងទូក-ងប្រពៃណី ដែលដូនតាបន្សល់ទុកមក”។

ទន្ទឹមនឹងការគិតគូររបស់បក្សនិងរដ្ឋ គឺជនរួមជាតិខ្មែរនៅខេត្តសុកត្រាំង កំពុងតែព្រួតដៃគ្នា អភិរក្ស និងលើកតម្កើងវិញ្ញាសាកីឡាប្រណាំងទូក-ងប្រពៃណីរបស់ជនជាតិពីមួយថ្ងៃទៅមួយថ្ងៃ។ តាមប្រសាសន៍លោកលីរដ្ឋា ប្រធានគណៈជនជាតិខេត្តសុកត្រាំង ឆ្នាំ២០២៣ ខេត្តបានជំនួយថវិកាបោះទូក-ង៤ទូកប្រគេនដល់វត្តខ្មែរនានាលើភូមិសាស្រ្តខេត្ត។ បច្ចុប្បន្ន ភូមិភាគនានាកំពុងតែពិនិត្យ ដើម្បីបន្តការជំនួយដល់វត្តដទៃទៀតដែលជួបការលំបាកខាងថវិកាបោះទូក-ងថ្មី ដើម្បីបោះឱ្យទាន់ចូលរួមអុំប្រណាំងថ្នាក់តំបន់នៅឆ្នាំ២០២៤ខាងមុខ៕

លីធាន- ថាច់ធី

ចែករំលែកអត្ថបទ

ពាក្យគន្លឹះ