មហាសាមគ្គីជនជាតិ គំរូក្នុងសហគមន៍

25/12/2023 - 16:37

ចាកផុតពីភាពក្រីក្រ ដោយសារដើមទម្លាប់

ប្រកបរបរបណ្តុះកូនឈើនិងជួញដូរផ្លែទម្លាប់ បងស្រី លីធីថាញស្វឹង នៅភូមិភឿកធ្វឹង ឃុំភូតឹង ស្រុកចូវថាញ់ ខេត្តសុកត្រាំង បានជួយឱ្យគ្រួសារចាកផុតពីភាពក្រីក្រ ឈានឡើងធូរធារ។

ដើមទម្លាប់ត្រូវបានបងស្រីស្វឹង លក់តម្លៃពី ១៥-២០ ពាន់ដុង/ដើម។

ជាង ២០ ឆ្នាំមុន ពេលលក់ផ្លែទម្លាប់នៅក្នុងវត្តព្រះបួនព្រះភ័ក្ត្រ ឃើញភ្ញៀវទេសចរចូលវត្តទស្សនាកម្សាន្ត ដើររើសផ្លែទម្លាប់ហើយសួររកទិញកូនឈើ ឃើញដូច្នេះ បងស្រីស្វឹង ក៏សាកសួរទើបដឹងពីតម្លៃផ្នែកសេដ្ឋកិច្ចនៃដើមទម្លាប់។ ផ្តើមពីនោះ បងស្រីសូមព្រះចៅអធិការវត្តព្រះបួនព្រះភ័ក្ត្រ ចូលរើសផ្លែទម្លាប់លក់និងយកគ្រាប់បណ្តុះពូជ។ បងស្រីស្វឹង ឱ្យដឹង៖ “ក្នុងបរិវេណវត្តព្រះបួនព្រះភ័ក្ត្រដាំដើមទម្លាប់រាប់រយដើម តាមផ្ទះមាមីងខ្មែរនៅឃុំភូតឹង ក៏ដាំដើមនេះសឹងរាល់គ្រួសារ ដើម្បីធ្វើជាម្លប់ត្រជាក់ ព្រោះដើមវាធំមែកសាខា ស្លឹកមិនសូវជ្រុះ តិចមានជំងឺដង្កូវបំផ្លិចបំផ្លាញ ផ្លែក្រអូបឆ្ងាញ់ ប៉ុន្តែពុំសូវមានគេនិយមហូប។ ចាប់តាំងពីខ្ញុំបណ្តុះ ១០០ ដើមដំបូង មានឈ្មួញមកទិញនិងទិញទាំងដើមធំយកទៅធ្វើជាឈើលម្អ មាមីងទើបដឹងដើមទម្លាប់មានតម្លៃផ្នែកខាងសេដ្ឋកិច្ច។ ផ្តើមពីនោះ ខ្ញុំប្រមូលទិញផ្លែយកគ្រាប់បណ្តុះពូជលក់”។ យោងតាមសម្តី បងស្រីស្វឹង គ្រាប់ទម្លាប់ងាយបណ្តុះ គ្រាន់តែយកដីច្របល់អង្កាមនិងកម្ទេចដូង កើបដាក់កែវប្លាស្ទិកដាក់គ្រាប់រួចស្រពទឹកមួយថ្ងៃ ២ លើក (រដូវវស្សាមិនចាំបាច់ស្រពទឹក) ក្រោយពី ១ ខែ កូនឈើចាប់ផ្តើមចេញស្លឹក២។ ធម្មតាបងស្រីបណ្តុះទុកក្នុងរយៈពេលប្រហែល៣ខែ ដើម្បីកូនឈើចេញស្លឹកច្រើន លក់ក្នុងតម្លៃពី ១២.០០០- ២០.០០០ ដុង/ដើម។ ឃើញលក់ដើមទម្លាប់ រកបានប្រាក់ចំណូលបង្គួរ បងស្រីប្រមូលទិញផ្លែទម្លាប់នៅគ្រប់កន្លែងក្នុងភូមិស្រុក ដើម្បីលក់ផ្លែយកគ្រាប់បណ្តុះពូជ។ ជាច្រើនឆ្នាំប្រកបរបរបណ្តុះដើមទម្លាប់ ដូច្នេះ បងស្រីដឹងច្បាស់ផ្លែមានគ្រាប់ច្រើនឬតិច។ ផ្លែមានគ្រាប់តិច ឬគ្មានគ្រាប់គាត់ទុកលក់ ចំណែកមានគ្រាប់ច្រើនគាត់ពុះយកគ្រាប់បណ្តុះពូជ លក់តម្លៃ ៣៥.០០០ ដុង/ដើម។ ចំណែកសាច់យកធ្វើតំណាប់ បបរស្ករ ធ្វើចាហួយលក់ដើម្បីរកប្រាក់ចំណូលបន្ថែម។

ចម្ការបណ្តុះដើមទម្លាប់របស់បងស្រីស្វឹង។

ក្នុងអំឡុង ៦ ឆ្នាំនេះ បងស្រីស្វឹងបានបង្កើត ក្រុមសហការបណ្តុះដើមទម្លាប់ ដោយមានសមាជិក ១០ នាក់ គាត់ធ្វើជាប្រធានបានរួមជាមួយបងប្អូននារីក្នុងក្រុមដើរប្រមូលទិញផ្លែ ទិញដើមនិងបណ្តុះកូនលក់ឱ្យអតិថិជន។ បងស្រីស្វឹង ឱ្យដឹង៖ “ផ្លែទម្លាប់ឈានដល់រដូវប្រមូលផលស្រុះ ចាប់ពីខែមីនាដល់ខែកញ្ញា (សុរិយាគតិ) ផ្លែក្រអូបឆ្ងាញ់ ខ្ញុំលក់តក្នុងម្លៃពី ៣០.០០០- ៥០.០០០ដុង/គីឡូក្រាម។ មធ្យមភាគក្នុងមួយឆ្នាំខ្ញុំប្រមូលទិញផ្លែទម្លាប់ពីបីតោន ដើម្បីលក់និងយកគ្រាប់បណ្តុះពូជ។ ខ្ញុំផ្គត់ផ្គង់ជាង ១០.០០០ ដើម/ឆ្នាំ ដល់អតិថិជននៅក្នុងខេត្តសុកត្រាំង ក្រុងកឹងធើ ហូវយ៉ាង ត្រាវិញ រដ្ឋធានីហាណូយ។ល។ ក្រៅពីនោះ ក៏មានគម្រោងមួយចំនួនបានទិញយកទៅដាំនៅតាមវត្តអារាម មណ្ឌលឧស្សាហកម្ម មណ្ឌលទេសចរណ៍”។

ក្រៅពីនោះ បងស្រីនៅទាំងប្រមូលទិញដើមទម្លាប់ធំលក់ឱ្យអតិថិជនទិញយកទៅដាំជាលម្អ តម្លៃពី១៥-២០លានដុង/ដើម ទៅតាមប្រភេទដើមតូចធំ។ បងស្រីស្វឹង ឱ្យដឹងដោយសេចក្តី រីករាយ៖ “នៅខែវិច្ឆិកា ឆ្នាំ២០២៣ ផ្លែទម្លាប់បានទទួលស្គាល់សម្រេចបទដ្ឋាន OCOP ដូច្នេះ ពេលដល់រដូវប្រមូលផល ខ្ញុំនឹងចុះផ្សាយលក់តាមបណ្តាញសង្គម ពិសេសគឺ Zalo ដើម្បីអតិថិជនបានដឹងស្គាល់ច្រើន។ ឥឡូវនេះ ក្នុងមួយឆ្នាំខ្ញុំរកបានប្រាក់ចំណេញជាង ១០០ លានដុង ពីដើមទម្លាប់ ជួយឱ្យគ្រួសារខ្ញុំចាកផុតពីភាពក្រីក្រ មានជីវភាពធូរធារ”៕

យ្វីអាញ-មុនី

ចែករំលែកអត្ថបទ

ពាក្យគន្លឹះ