គោលនយោបាយ -ការរស់នៅ គោលនយោបាយ

25/12/2023 - 16:37

តំបន់ជនរួមជាតិខ្មែរនៅកឹងធើវិវឌ្ឍន៍ឥតឈប់ឈរ

គណៈកម្មាធិការបក្ស រដ្ឋអំណាច រណសិរ្សមាតុភូមិ និងអង្គការនយោបាយ-សង្គមក្រុងកឹងធើគ្រប់លំដាប់ថ្នាក់ តែងយកចិត្តទុកដាក់អនុវត្តល្អនូវការងារជនជាតិ និងគោលនយោបាយជនជាតិ។ ព្រោះហេតុនោះ ទន្ទឹមនឹងការអភិវឌ្ឍរួមរបស់ក្រុង តំបន់ជនរួមជាតិខ្មែរនៅលើភូមិសាស្រ្តកឹងធើក៏វិវឌ្ឍន៍ឥតឈប់ឈរដែរ។

ហេដ្ឋារចនាសម្ព័ន្ធផ្លូវគមនាគមន៍តំបន់ជនរួមជាតិកាន់តែសុក្រឹតពីមួយថ្ងៃទៅមួយថ្ងៃ ឆ្លើយតបនឹងតម្រូវការធ្វើដំណើរទៅមកនិងជួញដូរ។

តាមប្រសាសន៍លោក លីវត្វឹងខឿង អនុប្រធានការិយាល័យជនជាតិ ស្រុកថើយឡាយ ក្នុងអំឡុង២០ឆ្នាំកន្លង តំបន់ជនរួមជាតិខ្មែរនៅស្រុកថើយឡាយ មានភាពប្ដូរផ្លាស់ដោយឥតឈប់ឈរ។ ហេដ្ឋារចនាសម្ព័ន្ធមានភាពសុក្រឹត ជាមូលដ្ឋានគ្រឹះសម្រាប់ប្រជាជននិយាយរួម ជនរួមជាតិខ្មែរនិយាយដោយឡែក អភិវឌ្ឍសេដ្ឋកិច្ច ឈានឡើងធូរធារ។ ផ្តើមពីប្រភពទុននានា ភូមិភាគបានជួសជុលនិងសាងសង់ផ្ទះជូនគ្រួសារក្រីក្របានជាង ២៨០ខ្នង។ ទន្ទឹមនឹងនោះ សហការជាមួយអង្គភាពនានា ជួយជនរួមជាតិបានកៀកជិតគោលនយោបាយអភិវឌ្ឍសេដ្ឋកិច្ច- សង្គមកាន់តែច្រើនជាងទៀត។ មកទល់ពេលនេះ ស្រុកឧបត្ថម្ភគ្រួសារជនរួមជាតិភាគតិច១.៨៣៤គ្រួសារ បុលទុនអនុគ្រោះ សរុបទឹកប្រាក់ជាង ២៥.៤៨៧ពាន់លានដុង ដើម្បីវិនិយោគផលិតកម្ម ចិញ្ចឹមសត្វ ដោយមានទម្រង់ប្រកបការងាររកស៊ីជាច្រើនមានប្រសិទ្ធភាព រួមចំណែក ជួយជនរួមជាតិបង្កើនប្រាក់ចំណូល លំនឹងជីវភាព។ ផ្តើមពីនោះ អត្រាគ្រួសារធូរធារ គ្រួសារគ្រាន់បើកាន់តែកើនឡើងពីមួយថ្ងៃទៅមួយថ្ងៃ (ស្រូបអត្រាជាង៧៥%) រីឯអត្រាគ្រួសារក្រីក្រក្នុងជនរួមជាតិ ថយចុះពី២% ទៅ៣% ជារៀងរាល់ឆ្នាំ។

ទន្ទឹមនឹងកម្មវិធី គម្រោងពិសេសដោយឡែករបស់រដ្ឋសម្រាប់តំបន់ជនរួមជាតិខ្មែរ ក្រុងនៅទាំងផ្សព្វផ្សាយផ្គួបបញ្ចូលនូវកម្មវិធី គម្រោងផ្សេងៗទៀត ម្ល៉ោះហើយ តំបន់ជនរួមជាតិខ្មែរនៅក្រុងកឹងធើមានភាពវិវឌ្ឍន៍។ លេចធ្លោគឺហេដ្ឋារចនាសម្ព័ន្ធបានវិនិយោគព្រមៗគ្នា អគ្គិសនី ផ្លូវថ្នល់ សាលារៀន ដំណាក់សុខាភិបាល មានភាពសុក្រឹត។ ផ្តើមពីនោះ ការជួញដូរទំនិញមានភាពងាយស្រួល ប្រជាបញ្ញារីកចម្រើន វប្បធម៌ត្រូវបានយកចិត្តទុកដាក់អភិរក្ស ការងារថែទាំសុខភាពប្រជាជនត្រូវបានអនុវត្តយ៉ាងត្រឹមត្រូវ។ល។ ក្រុងបាននិងកំពុងអនុវត្តមានប្រសិទ្ធភាពនូវកម្មវិធីទិសដៅជាតិអភិវឌ្ឍសេដ្ឋកិច្ច - សង្គមតំបន់ជនរួមជាតិភាគតិចនិងតំបន់ភ្នំ ដំណាក់កាល ២០២១-២០៣០។ ក្នុងឆ្នាំ ២០២៣ សរុបប្រភពទុនអនុវត្តជាង៣២ពាន់លានដុង។ ផ្តើមពីប្រភពទុននេះ ក្រុងកំពុងបង្កើនកម្រិតជួសជុលនិងកសាងបន្ទប់រៀនថ្មីនៃសាលាជនជាតិអន្តេវាសិក; ពន្យាពេលនិងទិញប័ណ្ណធានារ៉ាប់រងសុខាភិបាលចំនួន ២២២ ឧបត្ថម្ភនិងសាងសង់ផ្ទះមហាសាមគ្គី ព្រមទាំងអនុវត្តការអភិរក្សវប្បធម៌ជាដើម។

តាមប្រសាសន៍លោក ឡេទ្រុងកៀង ប្រធានគណៈជនជាតិក្រុងកឹងធើ ផ្អែកលើមូលដ្ឋានសម្រេចបានក្នុងការងារជនជាតិរយៈពេលកន្លង គណៈជនជាតិធ្វើសេនាធិការជូនគណៈកម្មាធិការប្រជាជនក្រុង បន្តផ្សព្វផ្សាយមានប្រសិទ្ធភាពនូវកម្មវិធីទិសដៅជាតិអភិវឌ្ឍសេដ្ឋកិច្ច - សង្គមតំបន់ជនរួមជាតិភាគតិចនិងតំបន់ភ្នំ ដំណាក់កាល២០២១ - ២០៣០។ ជាក់ស្តែងក្នុងឆ្នាំ២០២៤ ក្រុងនឹងបន្តរៀបចំទុនផ្គួបបញ្ចូលផ្សព្វផ្សាយអនុវត្តភារកិច្ចតាមផែនការលេខ ២១៣/ KH-UBND ចុះថ្ងៃទី២០ ខែតុលា ឆ្នាំ ២០២២ របស់គណៈកម្មាធិការប្រជាជនក្រុង សមស្របជាមួយនឹងស្ថានភាពជាក់ស្តែង ដើម្បីសម្រេចបានទិសដៅកាត់បន្ថយអត្រាគ្រួសារជនរួមជាតិភាគតិចក្រីក្រលើសពី០,៣% ជនរួមជាតិជាង៩៧% បានចូលរួមធានារ៉ាប់រងសុខាភិបាល និងបានកៀកជិតសេវាថែទាំសុខភាពទំនើប និងរៀបចំសកម្មភាពវប្បធម៌ កីឡាក្នុងឱកាសបុណ្យទានផ្សេងៗ រួមចំណែកអភិរក្សវប្បធម៌ប្រពៃណីរបស់ជនរួមជាតិភាគតិចជាដើម៕

លីយ៉ាង - វិមាន

ចែករំលែកអត្ថបទ

ពាក្យគន្លឹះ