មហាសាមគ្គីជនជាតិ គំរូក្នុងសហគមន៍

05/12/2023 - 15:26

យុវជន"ច្នៃ"ស្លឹកពោធិ៍ទៅជាផ្ទាំងគំនូរ

ផ្តើមពីការស្រឡាញ់ជក់ចិត្ត បងឌាំងយ្វីខាញ់ នៅឃុំវិញហ៊ីប ទីរួមខេត្តវិញចូវ បានច្នៃ “ស្លឹកពោធិ៍” ទៅជាផ្ទាំងគំនូរលក់ក្នុងតម្លៃរាប់សិបលានដុង។ ឆ្នាំ ២០២៣ យ្វីខាញ់ ជាយុវជនមួយរូបមកពីខេត្តសុកត្រាំង ទទួលបានរង្វាន់លឿងឌិញកួរ ពីមជ្ឈិមសម្ព័ន្ធយុវជន។

ឌាំងយ្វីខាញ់ ឧទ្ទេសនាមផ្ទាំងគំនូរច្នៃពីស្លឹកពោធិ៍ លក់ក្នុងតម្លៃ ១០ លានដុង។

កើតនិងធំដឹងក្តីនៅតំបន់ជនបទឃុំវិញហ៊ីប កាលនៅតូច យ្វីខាញ់តែងទៅវត្តជាមួយឪពុកម្តាយ និងបានព្រះចៅអធិការជូនរូបថតមានរូបព្រះពុទ្ធក្នុងស្លឹកពោធិ៍ ដូច្នេះ គាត់ពេញចិត្តខ្លាំងណាស់។ កាលនោះ យ្វីខាញ់ តែងទៅរើសស្លឹកពោធិ៍មកគាបក្នុងសៀវភៅ ទុកធ្វើជាវត្ថុអនុស្សាវរីយ៍ ម្ល៉ោះហើយគាត់ក៏ចាប់ចិត្តបន្តិចម្តងៗ។ បងយ្វីខាញ់ រៀបរាប់៖ “ពេលបញ្ចប់ការសិក្សាមហាវិទ្យាល័យផ្នែកគ្រប់គ្រងសង្គម ខ្ញុំមិនទៅដាក់ពាក្យសុំការងារទេ ប៉ុន្តែ អនុវត្តគំនិតច្នៃប្រតិដ្ឋយកស្លឹកពោធិ៍ច្នៃជាផ្ទាំងគំនូរវត្ថុអនុស្សាវរីយ៍សម្រាប់ភ្ញៀវទេសចរពេលមកកាន់ខេត្តសុកត្រាំង។ ពីព្រោះដើមពោធិ៍ត្រូវបានដាំនៅច្រើនកន្លែង ស្លឹកជ្រុះច្រើនលើកក្នុងមួយឆ្នាំ ដូច្នេះសម្បូរប្រភពវត្ថុធាតុដើម។ គិតគឺ ធ្វើខ្ញុំចាប់ផ្តើមកែច្នៃស្លឹកពោធិ៍ទៅជាផ្ទាំងគំនូរ”។

ឌាំងយ្វីខាញ់ ទទួលរង្វាន់លឿងឌិញកួរ ពីមជ្ឈិមសម្ព័ន្ធយុវជន។

ដើម្បីបានជោគជ័យដូចសព្វថ្ងៃនេះ យ្វីខាញ់ ធ្លាប់ឆ្លងកាត់ភាពបរាជ័យច្រើនលើក ប៉ុន្តែគាត់ក៏បានលើកទឹកចិត្តខ្លួនឯងថា “បរាជ័យគឺជាប្រភពនៃភាពជោគជ័យ” ដូច្នេះ គាត់ខិតខំព្យាយាមសិក្សាស្រាវជ្រាវតាមប្រព័ន្ធអ៊ីនធឺណែត ដើម្បីសាងបាននូវវណ្ណកម្មដ៏ប្រណីតនេះ។ បងយ្វីខាញ់ ចែករំលែក៖ “ដើម្បីធ្វើបានគំនូរដែលច្នៃពីស្លឹកពោធិ៍មួយផ្ទាំងខ្ញុំចំណាយពេលជិត២ខែ។ ស្លឹកពោធិ៍ត្រូវជ្រើសយកស្លឹកចាស់ ព្រោះឆ្អឹងវារឹង មិនងាយបាក់ កម្រិតជាប់បានយូរ។ បន្ទាប់មក យកស្លឹកទៅត្រាំទឹកដោយមានលាយជាតិគីមីបន្តិច ដើម្បីបន្ទន់ស្លឹកស្រង់ឡើងយកច្រាស់ដុសធ្មេញដុសថ្នមៗលើផ្ទៃស្លឹក រួចយកទៅហាលក្តៅឱ្យស្ងួត។ ឆ្អឹងស្លឹកមានពណ៌ធម្មជាតិ ដូច្នេះ ខ្ញុំត្រូវកែច្នៃជាពណ៌លឿង ពណ៌សឱ្យសមស្របទៅតាមប្រភេទគំនូរនីមួយៗ”។ ដើម្បីរចនាបានផ្ទាំងគំនូរស្រស់ស្អាត យ្វីខាញ់នៅទាំងគួបផ្សំនឹងគ្រាប់អង្កាំប្លាស្ទិកល្មួត សូត្រក្រហម បច្ចេកទេសពុម្ពស្បៃសូត្រ។ល។ ផ្ទាំងគំនូរច្រើនតែរចនារូបផ្កាឈូក ដើមពោធិ៍ មេអំបៅ កងចក្រនិងទំពក់សោផ្តិតរូបព្រះអក្សរ ក្បាច់រាប់ម៉ឺនផ្ទាំង ត្រូវបានខេត្តក្រុងជាច្រើនក្នុងប្រទេស និងទីផ្សារអាមេរិក កាណាដា ដឹងស្គាល់ច្រើន។ គំនូរដែលច្នៃពីស្លឹកពោធិ៍មួយផ្ទាំងៗ ត្រូវបានលក់ក្នុងតម្លៃពី ១៥០ ពាន់ដុងដល់ ១០ លានដុង និង ៣៥ ពាន់ដុងសម្រាប់គំនូរទំពក់សោ។

ឆ្នាំ ២០២០ យ្វីខាញ់ បានគណៈកម្មាធិការរណសិរ្សមាតុភូមិវៀតណាមខេត្តសុកត្រាំង លើកសរសើរពីគំនិតច្នៃប្រតិដ្ឋគំរូឆ្នើមថ្នាក់ខេត្ត។ នោះក៏បានផ្តល់កម្លាំងចិត្តឱ្យតាមអាជីពដែលគាត់ស្រឡាញ់ចូលចិត្ត។ កាលនោះ យ្វីខាញ់ ផ្តើមអាជីពមានដើមទុនមិនដល់ ១០ លានដុង ឥឡូវការប្រកបអាជីពធ្វើផ្ទាំងគំនូរពីស្លឹកពោធិ៍ គាត់រកបានប្រាក់ចំណូលប្រមាណជាង ៣៥០ លានដុង/ឆ្នាំ ព្រមទាំងបង្កើតការងារធ្វើជូនពលករជិត ២០ នាក់នៅភូមិភាគ។ ពិសេស ផលិតផលគំនូរច្នៃពីស្លឹកពោធិ៍របស់យ្វីខាញ់ ត្រូវបានទទួលស្គាល់សម្រេចបទដ្ឋាន OCOP និងចូលរួមដាក់តាំងនៅសិក្ខាសាលា ផ្សារណាត់តាំងពិព័រណ៍នៅគ្រប់ខេត្តក្រុងទូទាំងប្រទេស។ “ទទួលបានរង្វាន់លឿងឌិញកួរ ពីមជ្ឈិមសម្ព័ន្ធយុវជន ខ្ញុំពិតជាមានកិត្តិយសនិងសប្បាយចិត្តណាស់ ផ្តើមពីនោះ ធ្វើឱ្យខ្ញុំកាន់តែស្រឡាញ់អាជីព។ ឥឡូវនេះ បើយុវវ័យណាស្រឡាញ់ចូលចិត្តចង់រៀនគំនូរច្នៃពីស្លឹកពោធិ៍ ខ្ញុំនឹងត្រៀមជានិច្ចក្នុងការជួយចែករំលែកបទសោធន៍” - បងយ្វីខាញ់ បានឱ្យដឹងដូច្នេះ៕

យ្វីអាញ-មុនី

ចែករំលែកអត្ថបទ

ពាក្យគន្លឹះ