មហាសាមគ្គីជនជាតិ គំរូក្នុងសហគមន៍

09/10/2023 - 16:06

ព្រះតេជព្រះគុណ ថាច់សុង អស់ពីព្រះទ័យដើម្បីសាសនានិងសង្គម

រយៈពេល ៣៥ ព្រះវស្សាសាងផ្នួសបួសរៀន ព្រះតេជព្រះគុណថាច់សុង ព្រះចៅអធិការវត្តខ្សាច់កណ្ដាល ឃុំហ្វាធ្វឹង ស្រុកចូវថាញ់ ខេត្តត្រាវិញ ព្រះអង្គតែងយកអស់ពីព្រះទ័យដើម្បីសាសនានិងសង្គម។ ព្រះតេជព្រះគុណ តែងគិតគូរការងាររៀនសូត្ររបស់ព្រះសង្ឃ កូនចៅ ពុទ្ធបរិស័ទខ្មែរ និងជួយដល់គ្រួសារក្រីក្រជម្នះការលំបាកក្នុងជីវភាព។

ព្រះតេជព្រះគុណ ថាច់សុង ព្រះចៅអធិការវត្តខ្សាច់កណ្ដាល។

នៅឆ្នាំ ១៩៨៨ យុវជនថាច់សុង បានចូលសាងផ្នួសបួសរៀននៅវត្តខ្សាច់កណ្ដាល ដើម្បីតបស្នងសងគុណឪពុកម្ដាយ។ ក្នុងរយៈពេលបួសរៀន ព្រះតេជព្រះគុណ ថាច់សុង ព្យាយាមសិក្សារៀនសូត្រធម៌វិន័យ អក្សរសាស្រ្ត ក៏ដូចជារួមចំណែកជាមួយនឹងព្រះសង្ឃ គណៈកម្មការវត្តកសាងវត្តអារាម កៀរគរពុទ្ធបរិស័ទអនុវត្តល្អនូវគោលការណ៍ គោលនយោបាយរបស់បក្ស ច្បាប់របស់រដ្ឋ។ ឆ្នាំ២០១១ ព្រះតេជព្រះគុណថាច់សុង បានគណៈកម្មការវត្ត និងមាមីងពុទ្ធបរិស័ទទំនុកចិត្ត តែងតាំងជាព្រះចៅអធិការវត្តខ្សាច់កណ្ដាលរហូតទល់សព្វថ្ងៃ។

ពេលទទួលតួនាទីជាព្រះចៅអធិការវត្ត ព្រះតេជព្រះគុណ ថាច់សុង បានកសាងសាលាទាន ខ្លោងទ្វារ ព្រះវិហារ ឈាបនដ្ឋាន របងវត្តជាដើម។ ក្រៅពីនោះ ព្រះតេជព្រះគុណ នៅទាំងកៀរគរពុទ្ធបរិស័ទនិងសប្បុរសជនក្នុងនិងក្រៅខេត្ត ឧបត្ថម្ភកសាងផ្លូវបេតុង២ខ្សែ ដោយមានប្រវែងសរុប ៥០០ ម៉ែត្រ ទទឹង ២,៥ ម៉ែត្រ លើផ្ទៃដីរបស់វត្ត សរុបតម្លៃទឹកប្រាក់ជាង ៤០០ លានដុង។ ក្នុងនោះ ដោយឡែកព្រះតេជព្រះគុណផ្ទាល់ បានឧបត្ថម្ភចំនួនទឹកប្រាក់៤០លានដុង។ រៀងរាល់ឆ្នាំ ព្រះតេជព្រះគុណ ថាច់សុង ថែមទាំងកៀរគរសប្បុរសជនជូនអំណោយដល់អ្នកក្រ សិស្សក្រីក្រសង្វាតរៀនសូត្រ សរុបទឹកប្រាក់ជាង៧០លានដុងទៀតផង។ ព្រះតេជព្រះគុណ ថាច់សុង មានថេរដីកា៖ “រយៈពេលកន្លង គោលការណ៍ គោលនយោបាយរបស់បក្សនិងរដ្ឋ ក្នុងការគិតគូរជីវភាពជនរួមជាតិខ្មែរបានយ៉ាងល្អ។ មាមីងខ្មែរសង់បានផ្ទះសម្បែងសមរម្យ កូនចៅមានឱកាសទៅរៀនសូត្រ។ល។ បច្ចុប្បន្ន អាត្មាភាពរួមជាមួយនឹងរដ្ឋអំណាចភូមិភាគ ខ្នះខ្នែងកៀរគរមាមីងកសាងផ្នត់រស់នៅស៊ីវិល័យ”។

លោកស្រី គឹមធីបុប្ផា អនុប្រធានគណៈកម្មាធិការប្រជាជនឃុំហ្វាធ្វឹង ឱ្យដឹង៖ “ព្រះតេជព្រះគុណ ថាច់សុង តែងយកព្រះទ័យទុកដាក់ដល់ការរៀនសូត្ររបស់កូនចៅពុទ្ធបរិស័ទខ្មែរ។ ក្នុងឱកាសវិស្សមកាល ព្រះតេជព្រះគុណបានកៀរគរកូនចៅពុទ្ធបរិស័ទខ្មែរមកវត្តរៀនអក្សរខ្មែរ។ ជាមួយតួនាទីជាព្រះសង្ឃមានប្រជាប្រិយ ជាសមាជិកប្រចាំការនៃសមាគមព្រះសង្ឃសាមគ្គីស្នេហាជាតិស្រុកចូវថាញ់ ព្រះតេជព្រះគុណ ថាច់សុង តែងរួមជាមួយនឹងរដ្ឋអំណាចភូមិភាគផ្សព្វផ្សាយ កៀរគរពុទ្ធបរិស័ទអនុវត្តល្អនូវគោលការណ៍របស់បក្ស គោលនយោបាយ ច្បាប់របស់រដ្ឋ ខ្នះខ្នែងពលកម្មផលិត។ ទន្ទឹមនឹងនោះ ព្រះអង្គនៅទាំងចូលរួមសកម្មភាពសប្បុរសធម៌សង្គម ដើម្បីជួយជីវភាពជនរួមជាតិខ្មែរកាន់តែល្អប្រសើរពីមួយថ្ងៃទៅមួយថ្ងៃ”៕

សើុងម៉ាល័យ - ថាច់ធី

ចែករំលែកអត្ថបទ

ពាក្យគន្លឹះ