គោលនយោបាយ -ការរស់នៅ គោលនយោបាយ

05/09/2023 - 16:40

ពង្រីកប្រសិទ្ធភាពគោលនយោបាយសម្រាប់អ្នកមានប្រជាប្រិយ

ខេត្តសុកត្រាំង បានអនុវត្តគ្រប់សព្វនូវគោលនយោបាយសម្រាប់អ្នកមានប្រជាប្រិយក្នុងជនរួមជាតិភាគតិច។ អាស្រ័យហេតុនេះ អ្នកមានប្រជាប្រិយបានពង្រីកនូវតួនាទីរបស់ខ្លួនក្នុងការកសាងធ្លុងមហាសាមគ្គីជនជាតិ អភិវឌ្ឍសេដ្ឋកិច្ច-សង្គមនិងរក្សាសន្តិសុខសណ្តាប់ធ្នាប់នៅមូលដ្ឋាន។

ជូនប័ណ្ណសរសើររបស់គណៈកម្មាធិការប្រជាជនខេត្តសុកត្រាំង ដល់អ្នកមានប្រជាប្រិយឆ្នើមលើវិស័យជាច្រើន។

អ្នកមានប្រជាប្រិយជាង៦០០រូបនៅខេត្តសុកត្រាំង គឺជាកងកម្លាំងស្នូល ជាស្ពានតភ្ជាប់ដ៏សំខាន់រវាងគណៈកម្មាធិការបក្ស រដ្ឋអំណាចជាមួយនឹងប្រជាជន ហើយបានទទួលនូវរបបគោលនយោបាយគ្រប់សព្វតាមសេចក្តីកំណត់។ គណៈជនជាតិខេត្ត បានរៀបចំកិច្ចប្រជុំចំនួន៥១០លើក ផ្សព្វផ្សាយនិងផ្តល់ព័ត៌មានដល់ប្រជាជនជិត១២.៤០០លើកនាក់។ អញ្ជើញទៅសួរសុខទុក្ខនិងជូនអំណោយដល់អ្នកមានប្រជាប្រិយ៣.៥៥៥រូបនៅក្នុងថ្ងៃបុណ្យនានា និងបុណ្យចូលឆ្នាំថ្មី; ជួយឧបត្ថម្ភពេលឈឺថ្កាត់ មរណទុក្ខដល់អ្នកមានប្រជាប្រិយ៦៨៣រូប; នាំអ្នកមានប្រជាប្រិយ១៧០រូបទៅទស្សនា និងសិក្សាបទពិសោធន៍នៅកូងដៅនិងបណ្តាខេត្តនៅភូមិភាគខាងជើង។ល។ ដោយថវិកាសរុបជាង១២ពាន់លានដុង។ ក្រៅពីនេះ ខេត្តបានផ្តល់ប័ណ្ណធានារ៉ាប់រងសុខាភិបាលដល់អ្នកមានប្រជាប្រិយចំនួន៣៣០រូប ឧបត្ថម្ភថវិកាប្រចាំខែដល់អ្នកមានប្រជាប្រិយ២៥៦រូប ដោយទឹកប្រាក់ជាង៥៦២លានដុង។ ប្រធានគណៈជនជាតិខេត្តសុកត្រាំង លោកលីរដ្ឋា មានប្រសាសន៍៖ “ខេត្តតែងយកចិត្តទុកដាក់អនុវត្តគ្រប់សព្វនូវគោលនយោបាយ ម្ល៉ោះហើយអ្នកមានប្រជាប្រិយបានជឿជាក់និងពង្រីកនូវតួនាទី ភារកិច្ចរបស់ខ្លួន។ អ្នកមានប្រជាប្រិយគឺជាកត្តាសកម្មក្នុងការឃោសនា និងកៀរគរជនរួមជាតិអនុវត្តល្អនូវគោលការណ៍ គោលមាគ៌ារបស់បក្ស គោលនយោបាយ និងច្បាប់របស់រដ្ឋ។ ថែរក្សានិងពង្រីកអត្តសញ្ញាណវប្បធម៌ប្រពៃណីដ៏ល្អរបស់ជនជាតិ។ កៀរគរជនរួមជាតិខ្មែរ សកម្មចូលរួមបង្ការទប់ស្កាត់បទល្មើស។ល។ រួមចំណែករក្សាលំនឹងសន្តិសុខសណ្តាប់ធ្នាប់នៅមូលដ្ឋាន”។

លោកឡឹមផឹង អ្នកមានប្រជាប្រិយនៅឃុំថាមដូង ស្រុកមីស្វៀង បាននិយាយ៖ “ខេត្តតែងតែផ្តល់ព័ត៌មានអំពីកម្មវិធីនិងគម្រោងវិនិយោគដល់តំបន់ជនជាតិភាគតិច បើកវគ្គហ្វឹកហាត់ឃោសនា ផ្សព្វផ្សាយ អប់រំច្បាប់។ ចុះសួរសុខទុក្ខ ជូនអំណោយក្នុងថ្ងៃបុណ្យនានានិងចូលឆ្នាំថ្មី ព្រមទាំងនាំទៅទស្សនា សិក្សាបទពិសោធន៍នៅបណ្តាខេត្តនៅភូមិភាគខាងជើង។ល។ ហេតុនេះ ខ្ញុំតែងលើកទឹកចិត្តមាមីងខិតខំប្រកបរបររកទទួលទាន ចូលរួមកម្លាំងពលកម្ម សម្ភារៈ បរិច្ចាគដី។ល។ ដើម្បីកសាងភូមិស្រុកឱ្យកាន់តែស្រស់ស្អាត”។ ព្រះតេជគុណ សើុងមិញហៀង ព្រះចៅអធិការវត្តដើមពោធិ៍ ឃុំដាយអឹង២ ស្រុកត្រឹងដេ មានថេរដីកា៖ “ក្នុងនាមព្រះចៅអធិការ អាត្មាតែងតែលើកទឹកចិត្តពុទ្ធបរិស័ទខិតខំពលកម្មផលិត និងអនុវត្តឱ្យបានល្អនូវគោលការណ៍ គោលមាគ៌ារបស់បក្ស គោលនយោបាយ និងច្បាប់របស់រដ្ឋ។ល។ ជាពិសេស គឺចលនាពុទ្ធបរិស័ទរស់នៅសាមគ្គី តស៊ូប្រឆាំង បង្ការទប់ស្កាត់បទល្មើសគ្រប់ប្រភេទ ក៏ដូចជាមិនជឿពាក្យញុះញង់ពីកម្លាំងខាងក្រៅ ធ្វើឱ្យបែកបាក់ធ្លុងមហាសាមគ្គីជនជាតិ”។

តាមប្រសាសន៍អនុលេខាគណៈកម្មាធិការបក្សខេត្តសុកត្រាំង លោកស្រីហូធីកឹមដាវ អ្នកមានប្រជាប្រិយតែងជាគំរូឆ្នើមលើវិស័យជាច្រើននៃជីវភាពសង្គម តែងធ្វើជាគំរូនិងនាំមុខក្នុងការឃោសនា កៀរគរប្រជាជនអនុវត្តឱ្យបានត្រឹមត្រូវតាមគោលការណ៍ បទប្បញ្ញត្តិរបស់បក្សនិងច្បាប់របស់រដ្ឋ; សកម្មចូលរួមអភិវឌ្ឍសេដ្ឋកិច្ច-សង្គម លុបបំបាត់ភាពអត់ឃ្លាន និងកាត់បន្ថយភាពក្រីក្រ។ អភិរក្សនិងពង្រីកតម្លៃវប្បធម៌ប្រពៃណីដ៏ល្អរបស់ជនជាតិភាគតិច; រក្សាសន្តិសុខសណ្តាប់ធ្នាប់ កសាងប្រព័ន្ធនយោបាយនៅមូលដ្ឋាន និងពង្រឹងធ្លុងមហាសាមគ្គីទូទាំងជនជាតិ៕

លីធាន-បកប្រែ៖ សុផន

ចែករំលែកអត្ថបទ

ពាក្យគន្លឹះ