កីឡា - ទេសចរណ៍ ទេសចរណ៍

05/06/2023 - 11:02

បណ្តែតអារម្មណ៍ជាមួយនឹងផ្កាក្ងោកពណ៌ស្វាយ

ដាឡាតនាគិម្ហរដូវ ក្រៅពីសំឡេងរៃយំសូរកង រំពងនៅតាមដងវិថីថែមទាំងមានផ្កាក្ងោកពណ៌ស្វាយរីកស្គុះស្គាយ រុះរោយជ្រុះធ្លាក់តាមជំនោរខ្យល់ទៀតផង។

អង្គុយក្នុងតៀមពិសាទឹកសណ្តែកសៀងក្តៅឧណ្ហៗ ពិសានំក្រៀបឆ្អើរ ពងទាកូនក្នុងបរិយាកាសត្រជាក់ធ្វើឱ្យភ្ញៀវទេសចរនឹងមានអារម្មណ៍ស្រស់ស្រាយ។

បីដូចជាផលិតផលពិសេសរបស់ដាឡាត ពេលឈានចូលគិម្ហរដូវម្តងៗផ្កាក្ងោក ពណ៌ស្វាយតែងរីកស្គុះស្គាយតាមដងវិថីក្រុង។ សម្រស់ផ្កាក្ងោកពណ៌ស្វាយ ហាក់អន្ទងចិត្ត ភ្ញៀវទេសចរឱ្យមកកាន់ដាឡាតកាន់តែច្រើនឡើងៗ ដើម្បីគយគន់ផ្កាក្ងោករុះរោយ ហើយបណ្តែតអារម្មណ៍បំបាត់ក្តីកង្វល់។ ដ្បិតអីពណ៌ស្វាយនៃផ្កាក្ងោកប្រកបដោយមនោសញ្ចេតនាយ៉ាងជ្រាលជ្រៅ អមដោយតំណក់ភ្លៀងរលឹមស្រិចៗនៃតំបន់ខ្ពង់រាប។ អាស្រ័យហេតុនោះ គិម្ហរដូវនៅដាឡាតមានភាពស្រពាប់ស្រពោន។ យើងសាកល្បងឆៀងចូលអង្គុយនៅជ្រុងមួយនៃតៀមកាហ្វេក្បែរចិញ្ចើមថ្នល់ ពិសាកាហ្វេមួយកែវ គយគន់ផ្កាក្ងោកពណ៌ស្វាយរុះរោយ តាមជំនោរខ្យល់ ភ្ញៀវទេសចរនឹងមានអារម្មណ៍កណ្ដែងកណ្ដោច។

ផ្កាក្ងោកពណ៌ស្វាយនៅដាឡាត។

ទោះបីជាដូច្នោះ តែព្រឹកឡើងដើមក្ងោកនោះមានផ្ការីកស្គុះស្គាយ បញ្ចេញពណ៌ស្វាយតាមដងផ្លូវ នៅពេលព្រះអាទិត្យចែងពន្លឺ។ ក្រោយពេលគយគន់ព្រះអាទិត្យរះផុតចុងស្រល់ ភ្ញៀវទេសចរអាចពិសាកាហ្វេដ៏ឈ្ងុយឆ្ងាញ់ រួចហូបគុយទាវមួយគោម ឬនំបញ្ចុកសាច់គោក្តៅហ៊ុយៗ។ ឆ្អែតតឹងពោះកាហ្វេជួយឱ្យយើងមានអារម្មណ៍ស្រស់ស្រាយ ពេលបរិយាកាសត្រជាក់ៗ សន្សើមក៏រលាយបាត់សន្សឹមៗ ខណៈដែលព្រះអាទិត្យរះឡើងញុាំងឱ្យភ្ញៀវទេសចរហាក់បីដូចពោរពេញដោយថាមពល។ ក្តីកណ្ដែងកណ្ដោចជាមួយផ្កាក្ងោក ក្តីអាណោចពីយប់មិញស្រាប់តែរសាយបាត់អស់។ មានតែដាឡាតទេ ដែលជាកន្លែងអាចធ្វើឱ្យភ្ញៀវទេសចរ មានអារម្មណ៍កណ្ដែងកណ្ដោច តែឆាប់រសាយ ក្លាយជារីករាយឡើងវិញពីព្រោះមានបរិយាកាសដ៏ពិសេសគ្មានពីរ។

ប្រហែលជាហេតុនេះហើយ បានជាភ្ញៀវទេសចរជាច្រើនជាប់ចិត្តដិតអារម្មណ៍នឹងដាឡាត។ មានអ្នកខ្លះមកកាន់ដាឡាតគ្រប់ ៤ រដូវ ក្នុងឆ្នាំ ក្នុងគោលបំណងដើម្បីលម្ហែអារម្មណ៍ក្រោយរយៈពេលធ្វើការនឿយហត់។ បងស្រីឡឹមធីហុង នៅខណ្ឌនិញកេវ ក្រុងកឹងធើ បង្ហើបឱ្យដឹង៖ “ខ្ញុំចូលចិត្តដើរទេសចរណាស់ ម្ល៉ោះហើយបានធ្វើដំណើរទៅជាច្រើនកន្លែង ប៉ុន្តែដាឡាតខ្ញុំពេញចិត្តបំផុត។ អាស្រ័យហេតុនោះ ឆ្នាំណាក៏ខ្ញុំទៅដាឡាត យ៉ាងហោចណាស់ ២ ដងដែរ។ ទៅដើម្បីសម្របខ្លួននឹងធម្មជាតិ យើងទៅដើម្បីបង្កើតថាមពលឡើងវិញ និងមានគំនិតច្នៃប្រតិដ្ឋថ្មី”។

យើងម្នាក់ៗសុទ្ធតែមានចំណាប់អារម្មណ៍ផ្សេងគ្នាពីដាឡាត ម្ល៉ោះហើយមានភ្ញៀវទេសចរខ្លះគ្រាន់តែធ្វើដំណើរជុំវិញដងផ្លូវក្នុងក្រុង ស្រូបយកខ្យល់អាកាសដ៏បរិសុទ្ធ។ ខណៈពេលរួយជើង ភ្ញៀវទេសចរឆៀងចូលអង្គុយតាមតៀមតូចៗក្បែរចិញ្ចើមថ្នល់ ពិសាទឹកសណ្តែកសៀងក្តៅឧណ្ហៗមួយកែវ និងពិសានំក្រៀបឆ្អើរដ៏ឈ្ងុយឆ្ងាញ់។ គ្រាន់តែប៉ុណ្ណេះក៏សប្បាយចិត្តរួចទៅហើយ នេះគឺទៅតាមអារម្មណ៍របស់យើងម្នាក់ៗ៕

ហាថាញ-លីសៀ

ចែករំលែកអត្ថបទ

ពាក្យគន្លឹះ