គោលនយោបាយ -ការរស់នៅ ច្បាប់

03/01/2023 - 16:35

ប្រកាសឱ្យប្រើជាផ្លូវការអនុក្រឹត្យពាក់ព័ន្ធនឹងការលុបចោលសៀវភៅគ្រួសារក្រដាស ចាប់ពីថ្ងៃទី ១ ខែមករា ឆ្នាំ ២០២៣

ឧបនាយករដ្ឋមន្ត្រី វ៉ូវឌឹកដាម បានចុះហត្ថលេខាប្រកាសឱ្យប្រើអនុក្រឹត្យលេខ ១០៤ /២០២២/NĐ-CP ស្តីពីការធ្វើវិសោធនកម្មមាត្រាមួយចំនួននៃអនុក្រឹត្យពាក់ព័ន្ធនឹងការដាក់ និងបង្ហាញសៀវភៅគ្រួសារ និងសៀវភៅស្នាក់នៅបណ្តោះអាសន្ន ពេលអនុវត្តបែបបទរដ្ឋបាល និងការផ្តល់សេវាសាធារណៈ។

រូបថតជាឧទាហរណ៍។

អនុក្រឹត្យរួមមាន ១៥ មាត្រា ក្នុងនោះ ចាប់ពីមាត្រា ១ ដល់មាត្រា ១៣ នៃអនុក្រឹត្យ បានចែងអំពីការធ្វើវិសោធនកម្មមាត្រាមួយចំនួននៃអនុក្រឹត្យពាក់ព័ន្ធនឹងការដាក់ និងបង្ហាញសៀវភៅគ្រួសារ និងសៀវភៅស្នាក់នៅបណ្តោះអាសន្ន ពេលអនុវត្តបែបបទរដ្ឋបាល និងការផ្តល់សេវាសាធារណៈ។

អនុក្រឹត្យដែលបានធ្វើវិសោធនកម្ម សំខាន់គឺពាក់ព័ន្ធទៅនឹងការបញ្ញត្តិស្តីពីគោលនយោបាយឧបត្ថម្ភបង្កើតការងារធ្វើ; ប័ណ្ណធានារ៉ាប់រងសុខាភិបាល; គោលនយោបាយឧបត្ថម្ភសិស្សនិងសាលាចំណេះទូទៅនៅឃុំ ភូមិលំបាកខ្លាំង; គោលនយោបាយអភិវឌ្ឍការអប់រំកុមារមត្តេយ្យ; យន្តការប្រមូលនិងគ្រប់គ្រងថ្លៃសិក្សា ចំពោះគ្រឹះស្ថានអប់រំស្ថិតក្នុងប្រព័ន្ធ អប់រំប្រជាជាតិ និងគោលនយោបាយកាត់បន្ថយ លើកលែងថ្លៃសិក្សា ឧបត្ថម្ភថ្លៃសិក្សា ថ្លៃសេវាកម្មក្នុងវិស័យអប់រំបណ្តុះបណ្តាល; អគ្គិសនី លំនៅឋាន ដីធ្លី សុខាភិបាល។ល។

យោងតាមនោះ ជំនួសឱ្យការដាក់ឬបង្ហាញសៀវភៅគ្រួសារ សៀវភៅស្នាក់នៅបណ្តោះអាសន្ន ឬក៏ខិលិតស្នាមនិងឯកសារផ្សេងៗបញ្ជាក់ពីការស្នាក់នៅ ពេលអនុវត្តបែបបទរដ្ឋបាលក្នុងវិស័យដូចពោលខាងលើ ប្រជាជនគ្រាន់តែបង្ហាញនូវក្រដាសស្នាមណាមួយ ដូចជាអត្តសញ្ញាណពលរដ្ឋ អត្តសញ្ញាណប័ណ្ណ ក្រដាសស្នាមបញ្ជាក់ពីព័ត៌មាននៃការស្នាក់នៅ លិខិតប្រកាសលេខកំណត់អត្តសញ្ញាណ និងព័ត៌មានក្នុងមូលដ្ឋានទិន្នន័យជាតិអំពីប្រជាពលរដ្ឋ។

មាត្រា ១៤ នៃអនុក្រឹត្យ ចែងអំពីការទាញយកផល ប្រើប្រាស់ព័ត៌មាននៃការស្នាក់នៅ ដើម្បីដោះស្រាយបែបបទរដ្ឋបាល និងការផ្តល់សេវាសាធារណៈ។ មាត្រា ១៥ នៃអនុក្រឹត្យ ចែងអំពីកាតព្វកិច្ចអនុវត្តនិងបទប្បញ្ញត្តិអនុវត្ត។

អនុត្រឹត្យនេះ មានសុពលភាពចាប់ពីថ្ងៃទី ១ ខែមករា ឆ្នាំ២០២៣៕

យោង៖ កាសែតនគរបាលប្រជាជន-មុនី

ចែករំលែកអត្ថបទ

ពាក្យគន្លឹះ