គោលនយោបាយ -ការរស់នៅ ច្បាប់

28/11/2022 - 16:14

បើកយុទ្ធនាការវាយលុក បង្ក្រាបបទល្មើស ធានាសន្តិសុខសណ្តាប់ធ្នាប់ទូទាំងប្រទេស

នគរបាលគ្រប់អង្គភាពនិងភូមិភាគក្នុងទូទាំងប្រទេសបានចេញទ័ពដំណាលគ្នា ដើម្បីអនុវត្តការវាយលុក បង្ក្រាបបទល្មើស ធានាសន្តិសុខសណ្តាប់ធ្នាប់ទូទាំងប្រទេស រក្សារឹងមាំសន្តិសុខសណ្តាប់ធ្នាប់ និងស្ថិរភាពសង្គម ការពារសន្តិសុខ សុវត្ថិភាពជាដាច់ខាតក្នុងឱកាសបុណ្យចូលឆ្នាំថ្មី ប្រពៃណីវៀតណាមគ្វីម៉ាវ ២០២៣។

កងកម្លាំងនគរបាលខេត្តតៀងក្វាង បើកយុទ្ធនាការចេញទ័ព វាយលុក បង្ក្រាបបទល្មើសគ្រប់ប្រភេទក្នុងទូទាំងខេត្ត។ រូបថត៖ ណាមសឿង/TTXVN

ចាប់ពីថ្ងៃទី ១៥ ខែវិច្ឆិកា ឆ្នាំ ២០២២ ក្រសួងនគរបាល បានសំណូមពរដល់គ្រប់អង្គភាព និងភូមិភាគ គប្បីយកចិត្តទុកដាក់ ផ្សព្វផ្សាយអនុវត្តព្រមៗគ្នានូវវិធានការ ក្តាប់ច្បាស់ពីដើមទង ពីចម្ងាយ និងពីមូលដ្ឋាន។ ម្ចាស់ការវិភាគ ព្យាករស្ថានភាព មុខសញ្ញានិងបញ្ហាទាក់ទងនឹងសន្តិសុខ សណ្តាប់ធ្នាប់...; ម្ចាស់ការអនុវត្តនូវវិធានការ និងវិធីសាស្រ្តទប់ទល់ឱ្យបានឆាប់រហ័ស ដើម្បីទប់ស្កាត់ និងប្រយុទ្ធ ប្រកបដោយប្រសិទ្ធភាព រួមចំណែករក្សាសន្តិសុខសណ្តាប់ធ្នាប់ មិនឱ្យបាត់ម្ចាស់ការ ឬយថាហេតុកើតមានឡើងគ្រប់ស្ថានការណ៍។ ទន្ទឹមនឹងនោះ ធ្វើសេនាធិការជូនគណៈកម្មាធិការបក្ស និងរដ្ឋអំណាចមូលដ្ឋាន ដើម្បីដឹកនាំ គណៈ ផ្នែក អង្គការមហាជនចូលរួមសហការ និងពង្រីកកម្លាំងចម្រុះនៃប្រព័ន្ធនយោបាយទាំងមូលក្នុងការវាយលុក បង្ក្រាបបទល្មើស ធានាសន្តិសុខសណ្តាប់ធ្នាប់។ ឃោសនាចលនាប្រជាជនបង្កើនការប្រុងប្រយ័ត្ន សកម្មចូលរួមចលនាទូទាំងប្រជាជនការពារសន្តិសុខ មាតុភូមិ និងបរិហារឧក្រិដ្ឋកម្ម។

នគរបាលគ្រប់អង្គភាពនិងភូមិភាគបង្កើនការវាយលុក និងបង្ក្រាបបទល្មើសគ្រប់ប្រភេទ; ផ្តុំកម្លាំងវាយលុក បង្រ្កាបឧក្រិដ្ឋកម្មដែលមានអង្គការចាត់តាំង ឧក្រិដ្ឋកម្មឥណទានខុសច្បាប់ ឧក្រិដ្ឋកម្មប្រើប្រាស់អាវុធ និងគ្រឿងផ្ទុះ ដើម្បីប្រព្រឹត្តបទល្មើសលួច ឆក់ ប្លន់ រំលោភ គៃបន្លំ... ; ឧក្រិដ្ឋកម្ម និងការបំពានច្បាប់ស្តីពីការលេងល្បែងស៊ីសង និងការភ្នាល់បាល់ទាត់ ជាពិសេស ក្នុងអំឡុងពេលប្រកួតបាល់ទាត់ ពិភពលោក (World Cup) ឆ្នាំ២០២២ និងនៅពិធីបុណ្យនិទាឃរដូវដើមឆ្នាំ។ ប្រយុទ្ធប្រឆាំង និងបោសសម្អាតការជួញដូរ ដឹកជញ្ជូនគ្រឿងញៀនទ្រង់ទ្រាយធំឆ្លងប្រទេស ព្រមទាំងទីតាំងផលិត ជួញដូរ រៀបចំនិងប្រើប្រាស់គ្រឿងញៀនក្នុងប្រទេស។ បង្កើនការប្រទះឃើញ និងប្រយុទ្ធប្រឆាំងអំពើពុករលួយ ឧក្រិដ្ឋកម្មសេដ្ឋកិច្ច ការរត់ពន្ធ ការក្លែងបន្លំពាណិជ្ជកម្ម ទំនិញក្លែងក្លាយ ទំនិញហាមឃាត់ ឧក្រិដ្ឋកម្មប្រើបច្ចេកវិទ្យាខ្ពស់ ឧក្រិដ្ឋកម្ម និងការបំពានច្បាប់ ស្តីពីបរិស្ថាន ធនធានធម្មជាតិ និងសុវត្ថិភាពម្ហូបអាហារ។ នគរបាលគ្រប់អង្គភាព និងភូមិភាគក៏បានលើកកម្ពស់ប្រសិទ្ធភាពគ្រប់គ្រងរដ្ឋ អំពីសន្តិសុខ សណ្តាប់ធ្នាប់ដោយភ្ជាប់ជាមួយការអនុវត្តយ៉ាងខ្លាំងក្លានូវដំណោះស្រាយ ប្រើប្រាស់ប្រព័ន្ធទិន្នន័យជាតិស្តីពីប្រជាជន អត្តសញ្ញាណប័ណ្ណពលរដ្ឋ និងគម្រោងទី ០៦ របស់រដ្ឋាភិបាល ដើម្បីបម្រើដល់ការគ្រប់គ្រងសង្គម និងបង្ការ បង្រ្កាបឧក្រិដ្ឋកម្ម។ បង្កើនការធានាសណ្តាប់ធ្នាប់ សុវត្ថិភាពចរាចរណ៍ បង្ការ ពន្លត់អគ្គិភ័យ និងគ្រឿងផ្ទុះ។ល។

ក្រសួងនគរបាលបានសំណូមពរដល់នគរបាលគ្រប់អង្គភាព និងភូមិភាគ គប្បីពង្រឹងការងារនយោបាយ និងឧត្តមគតិ ស្ងើចសរសើរ និងលើកទឹកចិត្តដល់កម្មាភិបាល និងយោធិន ឱ្យបានទាន់ពេល។ ធានានូវភ័ស្តុភារ អាវុធ មធ្យោបាយវាយលុក និងបង្ក្រាបឧក្រិដ្ឋកម្ម។ ត្រូវមានផែនការធានាសុវត្ថិភាពដល់ប្រជាជន កម្មាភិបាល យុទ្ធជន និងបង្ការករណីតទល់នឹងកម្លាំងសមត្ថកិច្ចដែលបំពេញភារកិច្ច។ល។៕

យោងតាម៖ ទីភ្នាក់ងារសារព័ត៌មានវៀតណាម-បកប្រែ៖ សុផន

ចែករំលែកអត្ថបទ

ពាក្យគន្លឹះ