សន្តិសុខ - ការពារប្រទេស ការពារប្រទេស

31/10/2022 - 14:23

ស្ងើចសរសើរជូនរង្វាន់បន្ទាន់ដល់កម្មាភិបាលការពារព្រំដែនដែលមានស្នាដៃបង្ក្រាបការរត់ពន្ធ

គណៈកម្មាធិការប្រជាជនខេត្តកាម៉ាវ បានស្ងើចសរសើរជូនរង្វាន់បន្ទាន់ដល់កម្មាភិបាលចំណុះកងទ័ពការពារព្រំដែនខេត្តដែលមានស្នាដៃឆ្នើមក្នុងការអនុវត្តភារកិច្ចយាមល្បាត ប្រទះឃើញនិងធ្វើការឃាត់កប៉ាល់នេសាទពាក់ផ្លាកលេខ CM៩៩២៤៨TS ដែលដឹកជញ្ជូនប្រេង DO ២០.៥០០លីត្រ ខុសច្បាប់តាមសមុទ្រ។

វរសេនីយ៍ឯកបម្រុងភុងឌឹកហ៊ឹង មេបញ្ជាការកងទ័ពការពារព្រំដែនខេត្ត ជូនប័ណ្ណសរសើររបស់គណៈកម្មាធិការប្រជាជនខេត្តដល់កម្មាភិបាល ៣ រូប ចំណុះកងទ័ពជើងទឹកការពារព្រំដែន ២ ដែលមានស្នាដៃឆ្នើម។

មុននោះ ក្នុងពេលល្បាតការពារអធិបតេយ្យភាពដែនសមុទ្រ នៅតំបន់ចម្ងាយពីកោះហងជូយប្រមាណ ២០ គាវុត ឆ្ពោះទៅទិសខាងលិច កប៉ាល់ល្បាតនៃកងទ័ពជើងទឹកការពារព្រំដែន ២ ក៏បានប្រទះឃើញកប៉ាល់ពាក់ផ្លាកលេខ CM៩៩២៨៤TS មានអាការៈគួរឱ្យសង្ស័យ។ ឆ្លងតាមរយៈនៃការត្រួតពិនិត្យ កងកម្លាំងអនុវត្តភារកិច្ចក៏ប្រទះឃើញក្នុងឃ្លុបកប៉ាល់មានផ្ទុកវត្ថុរាវជាច្រើនដែលធុំក្លិនប្រេង។ ប្រធាននាវិក ឱ្យដឹង៖ នោះគឺប្រេង DO ប៉ុន្តែមិនបានបង្ហាញវិក្កយបត្រ ឬសំបុត្របញ្ជាក់ជួញដូរនិងប្រភពប្រេង។ ដូច្នេះកងកម្លាំងអនុវត្តភារកិច្ចក៏បាននាំមនុស្សនិងមធ្យោបាយទៅកាន់ប៉ុស្តិ៍កងទ័ពជើងទឹកការពារព្រំដែន ២ សើុបសួរច្បាស់លាស់។

ធ្វើការជាមួយនឹងកម្មាភិបាលសើុបអង្កេតកងទ័ពការពារព្រំដែន ប្រធាននាវិកគឺលោកត្រឹងហ៊ឺវឡុក (ស្នាក់នៅសង្កាត់វិញហ៊ីប ក្រុងរ៉ាច់យ៉ា ខេត្តគៀងយ៉ាង) បានសារភាពថា កប៉ាល់ពាក់ផ្លាកលេខ CM៩៩២៨៤TS ដែលគាត់ជួលពីអ្នកផ្សេងតាំងពីថ្ងៃ ១៥ ខែសីហា ឆ្នាំ ២០២២ ប៉ុន្តែមិនបានចុះកិច្ចសន្យានោះទេ។ គិតមកដល់ថ្ងៃដែលត្រូវឃាត់ខ្លួននេះ លោកនិងក្រុមនាវិក បានធ្វើការជួញដូរដោយរលូនចំនួន ៤ លើក ហើយលើកទី ៥ នេះ កំពុងបើកស្វែងរកកប៉ាល់នេសាទដើម្បីលក់ប្រេង ស្រាប់តែកងទ័ពជើងទឹកការពារព្រំដែនប្រទះឃើញនិងធ្វើការឃាត់ខ្លួនតែម្តង។ ចំនួនប្រេងដែលបានជួញដូរសរុបប្រមាណជាង ១២០ ពាន់លីត្រ។

ដោយមានស្នាដៃឆ្នើមក្នុងការបង្ការ បង្ក្រាបការរត់ពន្ធ និងក្លែងបន្លំពាណិជ្ជកម្មនៃកងទ័ពជើងទឹកការពារព្រំដែន ២ ដូច្នេះ គណៈកម្មាធិការប្រជាជនខេត្តកាម៉ាវ បានចេញសេចក្តីសម្រេចជូនប័ណ្ណសរសើរដល់កម្មាភិបាល ៣ រូប ចំណុះអង្គភាពកងទ័ពជើងទឹកការពារព្រំដែន ២ កងទ័ពការពារព្រំដែនកាម៉ាវ; បញ្ជាការដ្ឋានកងទ័ពការពារព្រំដែនខេត្ត បានជូនលិខិតសរសើរដល់កម្មាភិបាល ២ រូប ចំណុះអង្គភាពកងទ័ពជើងទឹកការពារព្រំដែន ២ ផងដែរ។ ពិសេស បញ្ជាការដ្ឋានកងទ័ពការពារព្រំដែនខេត្ត ក៏បានជូនរង្វាន់បន្ទាន់ចំនួនទឹកប្រាក់ ១០ លានដុងដល់កងទ័ពជើងទឹកការពារព្រំដែន ២ បន្ទាប់ពីប្រទះឃើញ និងធ្វើការឃាត់កប៉ាល់ពាក់ផ្លាកលេខ CM៩៩២៨៤TS ដែលដឹកជញ្ជូនប្រេងខុសច្បាប់៕

យោង៖ កាសែតកាម៉ាវ -ប្រែសម្រួល៖ លីសៀ

ចែករំលែកអត្ថបទ

ពាក្យគន្លឹះ