សន្តិសុខ - ការពារប្រទេស ការពារប្រទេស

15/08/2022 - 14:22

សាលាមធ្យមសិក្សាបំពេញវិជ្ជាបាលីណាមបូ ជាមួយនឹងទម្រង់ "គ្មាន ៤ មាន ៣''

សាលាមធ្យមសិក្សាបំពេញវិជ្ជាបាលីណាមបូ ខេត្តសុកត្រាំង អនុវត្តល្អទម្រង់រក្សាសន្តិសុខសណ្តាប់ធ្នាប់ក្នុងសាលារៀន ដូច្នេះ សមណសិស្សស្ងប់ព្រះទ័យក្នុងការសិក្សា។

កម្មាភិបាល គ្រូបង្រៀន បុគ្គលិកនិងសមណសិស្សរបស់សាលា ចូលរួមហ្វឹកហាត់បង្ការពន្លត់អគ្គិភ័យ។

សាលាមធ្យមសិក្សាបំពេញវិជ្ជាបាលីណាមបូ តែងអនុវត្តល្អសារាចរលេខ ១២៤/២០២១/TT-BCA របស់ក្រសួងនគរបាល បញ្ញត្តិស្តីពីមណ្ឌលតាំងទីលំនៅ ឃុំ សង្កាត់ ទីប្រជុំជន ស្ថាប័ន អាជីវកម្ម គ្រឹះស្ថានអប់រំសម្រេចបទដ្ឋានសុវត្ថិភាពខាងសន្តិសុខសណ្តាប់ធ្នាប់”; អនុវត្តនូវបទបញ្ជាលេខ ០៩ របស់គណៈលេខា ស្តីពី “បង្កើនការដឹកនាំរបស់បក្ស ចំពោះចលនាទូទាំងប្រជាជនការពារសន្តិសុខមាតុភូមិក្នុងស្ថានភាពថ្មី”។

កម្មាភិបាលគ្រូបង្រៀន បុគ្គលិកនិងសមណសិស្សរបស់សាលា ចូលរួមសិក្សាបធានបទឯកទេស។

សាលាបានបង្កើតគណៈចង្អុលការទម្រង់ “គ្មាន ៤” (គ្មានការបាត់របស់របរ គ្មានបាបគ្រោះសង្គម គ្មានអគ្គិភ័យ គ្មានជនទុច្ចរិតឆ្លៀតឱកាស អូសទាញបញ្ចុះបញ្ចូល)។ ឆ្នាំសិក្សា ២០២១-២០២២ គណៈចង្អុលការបានឯកភាពប្តូរទៅជាទម្រង់ “គ្មាន ៤ មាន ៣” (មាន ៣ នោះគឺ មានស្មារតីពេលចូលរួមចរាចរណ៍ មានស្មារតីប្រយុទ្ធប្រឆាំងជំងឺ COVID-១៩ និងមានស្មារតីបញ្ចេញមតិប្រកបដោយវប្បធម៌លើបណ្តាញសង្គម)។ ជារៀងរាល់ឆ្នាំ គណៈចង្អុលការទម្រង់របស់សាលា បានសហការជាមួយនឹងការិយាល័យកសាងចលនាការពារសន្តិសុខសណ្តាប់ធ្នាប់ និងការិយាល័យជំនាញនៃនគរបាលខេត្ត រៀបចំផ្សព្វផ្សាយអំពីចំណេះដឹងមូលដ្ឋាននៃការងាររក្សាសន្តិសុខសណ្តាប់ធ្នាប់ បាន៣លើកដល់កម្មាភិបាលគ្រូបង្រៀន បុគ្គលិកនិងសមណសិស្សរបស់សាលាជាង ៥៧០ អង្គនិងរូប។ ខ្លឹមសារផ្សព្វផ្សាយសំខាន់គឺផ្តោតទៅលើច្បាប់ចរាចរណ៍ផ្លូវគោក ច្បាប់បង្ការពន្លត់អគ្គិភ័យ ក្រមសីលធម៌បញ្ចេញមតិលើបណ្តាញសង្គម។ល។ ក្រៅពីនោះ រៀងរាល់ត្រីមាសសាលានៅទាំងសហការជាមួយគណៈឃោសនាការអប់រំនៃគណៈកម្មាធិការបក្សខេត្តសុកត្រាំង របាយការណ៍អំពីស្ថានភាពព័ត៌មាននៅភូមិភាគ ក្នុងប្រទេសនិងអន្តរជាតិ; បធានបទ”រៀនសូត្រនិងធ្វើតាមឧត្តមគតិ សីលធម៌ ឥរិយាបថហូជីមិញ”។ សមណសិស្ស តាំងត្រាយ ជាសិក្ខាកាមរបស់សាលា មានថេរដីកា៖ “ពេលបានសិក្សាអំពីច្បាប់ ជ្រាបច្បាស់ព័ត៌មានអំពីស្ថានភាពក្នុងប្រទេសនិងអន្តរជាតិ ដូច្នេះ សមណសិស្សគ្រប់អង្គតែងលើកកម្ពស់ស្មារតី ប្រុងប្រយ័ត្នចំពោះឧបាយកលរបស់អានុភាពអមិត្ត មិនទុកឱ្យជនទុច្ចរិតអូសទាញ បញ្ចុះបញ្ចូលបានឡើយ; មិនប្រព្រឹត្តល្មើសច្បាប់ និងតែងព្រួតដៃជាមួយសាលារក្សាសន្តិសុខសណ្តាប់ធ្នាប់។ ជាច្រើនឆ្នាំមកនេះ ស្ថានភាពសន្តិសុខ សណ្តាប់ធ្នាប់ក្នុងសាលាត្រូវបានធានា ដូច្នេះ អាត្មាភាពស្ងប់ព្រះទ័យក្នុងការសិក្សា”។

លោកគ្រូឡឹមញ៉ឹម នាយកសាលាមធ្យមសិក្សាបំពេញវិជ្ជាបាលីណាមបូ ឱ្យដឹង៖ “ទម្រង់គ្មាន ៤ មាន ៣” ពិតជាពង្រីកបានប្រសិទ្ធភាពនិងទទួលបាននូវការចូលរួមគាំទ្រយ៉ាងសកម្ម ពីសំណាក់កម្មាភិបាលគ្រូបង្រៀន បុគ្គលិក និងសមណសិស្សគ្រប់ព្រះអង្គ។ បំផុតគឺ សមណសិស្សតែងខ្នះខ្នែងហាត់ពត់ លត់ដំក្រមសីលធម៌ អនុវត្តម៉ឺងម៉ាត់នូវលក្ខន្តិកៈសាលា វិន័យសង្ឃនិងបទប្បញ្ញត្តិច្បាប់។ ហេតុនេះ សន្តិសុខសណ្តាប់ធ្នាប់របស់សាលាត្រូវបានធានា សមណសិស្សគ្រប់អង្គស្ងប់ព្រះទ័យក្នុងការសិក្សា ម៉្លោះហើយ គុណភាពអប់រំត្រូវបានលើកកម្ពស់ពីមួយថ្ងៃទៅមួយថ្ងៃ។ ឆ្នាំ២០២១ សាលាទទួលបានប័ណ្ណសរសើររបស់គណៈកម្មាធិការប្រជាជនខេត្ត ព្រោះសម្រេចបានស្នាដៃឆ្នើមក្នុងចលនាការពារសន្តិសុខមាតុភូមិ”៕

យ្វីអាញ-មុនី

ចែករំលែកអត្ថបទ

ពាក្យគន្លឹះ