គោលនយោបាយ -ការរស់នៅ គោលនយោបាយ

14/06/2022 - 09:40

បែងចែកថវិកាជាង ៩២.០០០ ពាន់លានដុង សម្រាប់អនុវត្ត ៣ កម្មវិធីទិសដៅជាតិ

ប្រធានរដ្ឋសភា វឿងឌិញហ្វែ ទើបនឹងចុះហត្ថលេខានិងប្រកាសឱ្យប្រើសេចក្តីសម្រេចចិត្តលេខ ៥១៧/NQ-UBTVQH15 បែងចែកថវិកា ៩២.០៥៧.៨៦១ ពាន់លានដុង សម្រាប់ផែនការដើមទុន វិនិយោគអភិវឌ្ឍន៍ប្រភពថវិកាមជ្ឈិមដំណាក់កាល ២០២១-២០២៥ សម្រាប់មូលដ្ឋាននានាអនុវត្ត ៣ កម្មវិធីទិសដៅជាតិ។

បែងចែកថវិកាជាង ៩២.០០០ ពាន់លានដុង ដើម្បីអនុវត្ត ៣ កម្មវិធីទិសដៅជាតិ ។

ជាក់ស្តែង៖ កម្មវិធីទិសដៅជាតិអភិវឌ្ឍសេដ្ឋកិច្ច-សង្គម នៅតំបន់ជនជាតិភាគតិច និងតំបន់ភ្នំមានចំនួន ៤៧.០៥៧,៨១៦ ពាន់លានដុង; កម្មវិធីទិសដៅជាតិកាត់បន្ថយភាពក្រីក្រដោយចីរភាព គឺ ១៨.០០០ ពាន់លានដុង; កម្មវិធីទិសដៅជាតិកសាងជនបទថ្មីគឺ ២៧.០០០ ពាន់លានដុង។ ចំពោះទុនវិនិយោគអភិវឌ្ឍន៍ចំនួន ៧.៩៤២.១៣៩ ពាន់លានដុងពីថវិកាមជ្ឈិម គឺមិនទាន់គ្រប់លក្ខណៈបែងចែកនៅឡើយ រដ្ឋាភិបាលកំពុងប្រញឹកក្នុងការពិនិត្យ បង្ហើយនូវមូលដ្ឋានច្បាប់ ផែនការបែងចែក និងធ្វើរបាយការណ៍ជូនគណៈកម្មាធិការអចិន្ត្រៃយ៍នៃរដ្ឋសភា ដើម្បីធ្វើការពិចារណា និងសម្រេចចិត្ត។

ក្នុងសេចក្តីសម្រេចចិត្តដូចពោលខាងលើ គណៈកម្មាធិការអចិន្ត្រៃយ៍នៃរដ្ឋសភាក៏បានបែងចែកថវិកាមជ្ឈិម ឆ្នាំ ២០២២ គឺ ៣៤.០៤៩ ពាន់លានដុង (រួមទាំងទុនវិនិយោគអភិវឌ្ឍន៍ចំនួន ២៤ ពាន់ពាន់លានដុង និងដើមទុនបុព្វហេតុចំនួន ១០.០៤៩ ពាន់លានដុង) ដល់ក្រសួង ស្ថាប័នមជ្ឈិមនិងមូលដ្ឋាន រួមមាន៖ កម្មវិធីទិសដៅជាតិអភិវឌ្ឍសេដ្ឋកិច្ច-សង្គមនៅតំបន់ជនជាតិភាគតិច និងតំបន់ភ្នំគឺ ១៤.៤២៩ ពាន់លានដុង; កម្មវិធីទិសដៅជាតិកាត់បន្ថយភាពក្រីក្រប្រកបដោយចីរភាព គឺ ៨.៦២០ ពាន់លានដុង; កម្មវិធីទិសដៅជាតិសម្រាប់កសាងជនបទថ្មីគឺ ១១.០០០ ពាន់លានដុង។

នាយករដ្ឋមន្ត្រី ប្រគល់ផែនការដើមទុនអភិវឌ្ឍន៍ថវិកាមជ្ឈិមដំណាក់កាល ២០២១-២០២៥ និងគ្រោងថវិកាមជ្ឈិមឆ្នាំ ២០២២ ដល់ក្រសួង ស្ថាប័នមជ្ឈិម និងមូលដ្ឋាននានាស្របតាមសេចក្ដីកំណត់នៃច្បាប់វិនិយោគសាធារណៈ ច្បាប់ថវិការដ្ឋ និងសេចក្តីសម្រេចចិត្តរបស់គណៈកម្មាធិការអចិន្ត្រៃយ៍នៃរដ្ឋសភា មុនថ្ងៃទី ១ ខែមិថុនា ឆ្នាំ ២០២២។ ប្រគល់ឱ្យរដ្ឋាភិបាលចង្អុលការដល់ក្រសួង ស្ថាប័នមជ្ឈិមនិងមូលដ្ឋាន បែងចែកប្រគល់ផែនការដើមទុនថវិកាមជ្ឈិមដំណាក់កាល ២០២១-២០២៥ និងគ្រោងថវិកាមជ្ឈិមឆ្នាំ ២០២២ និងបែងចែកទុន បដិភាគពីថវិកាមូលដ្ឋានស្របតាមច្បាប់វិនិយោគសាធារណៈ ច្បាប់ថវិការដ្ឋ បណ្តាសេចក្តីសម្រេចចិត្តរបស់រដ្ឋសភា សេចក្តីសម្រេចចិត្តរបស់គណៈកម្មាធិការអចិន្ត្រៃយ៍នៃរដ្ឋសភា និងច្បាប់ដែលពាក់ព័ន្ធមុនថ្ងៃទី ១ ខែកក្កដា ឆ្នាំ ២០២២។ ប្រញឹកអនុវត្តបណ្តាដំណោះស្រាយ ដើម្បីពន្លឿនការអនុវត្ត ៣ កម្មវិធីទិសដៅជាតិ ស្របតាមសេចក្តីសម្រេចចិត្តរបស់រដ្ឋសភា ធានាការគ្រប់គ្រង និងប្រើប្រាស់ប្រភពទុនស្របតាមច្បាប់ ចំគោលដៅសម្រេចប្រសិទ្ធភាពខ្ពស់។ ប្រញឹករាយការណ៍ជូនគណៈកម្មាធិការអចិន្ត្រៃយ៍នៃរដ្ឋសភា អំពីវិធានការបែងចែកទុនវិនិយោគអភិវឌ្ឍន៍ចំនួន ៧.៩៤២.១៣៩ ពាន់លានដុងពីថវិកាមជ្ឈិម ដំណាក់កាល ២០២១-២០២៥ សល់ពីនោះគឺមិនទាន់បែងចែកមុនថ្ងៃទី ១ ខែកញ្ញា ឆ្នាំ ២០២២។

គណៈកម្មាធិការហិរញ្ញវត្ថុ ថវិកា ក្រុមប្រឹក្សាជនជាតិនិងគណៈកម្មាធិការផ្សេងៗទៀតនៃរដ្ឋសភា គណៈប្រតិភូរដ្ឋសភា តំណាងរដ្ឋសភា ក្រុមប្រឹក្សាប្រជាជនគ្រប់លំដាប់ថ្នាក់ និងសវនកម្មរដ្ឋ ក្នុងវិសាលភាពនៃតួនាទី សិទ្ធិអំណាច ត្រួតពិនិត្យ និងសវនកម្មលើការអនុវត្តសេចក្តីសម្រេចចិត្តនេះ៕

យោង baodantoc.vn - ប្រែសម្រួល៖ វ៉ាន់តឹន

ចែករំលែកអត្ថបទ

ពាក្យគន្លឹះ