មហាសាមគ្គីជនជាតិ គំរូក្នុងសហគមន៍

07/06/2022 - 09:29

បំណងប្រាថ្នារបស់យុវសិស្សក្រីក្រ

“ប្អូននឹងខិតខំរៀនឱ្យពូកែ ដើម្បីក្លាយជាគ្រូពេទ្យ ថែទាំសុខភាពជូនប្រជាជន ពិសេសគឺមាមីងខ្មែរនៅភូមិស្រុក”-នោះគឺជាការសំណេះសំណាលរបស់យុវសិស្សក្រីក្រ ត្រឹងហ្វាងធីសិស្ស ថ្នាក់ទី ១២C1 សាលាវិទ្យាល័យជនជាតិអន្តេវាសិកបាកលីវ ខេត្តបាកលីវ។

ប្អូនត្រឹងហ្វាងធី

ដោយជីវភាពគ្រួសារក្រលំបាក ម៉្លោះហើយឪពុកម្តាយបានយកប្អូនទៅផ្ញើជាមួយយាយតាតាំងពីតូចម៉្លេះ ដើម្បីទៅធ្វើកម្មករនៅទីក្រុងហូជីមិញ។ អស់រយៈកាលជាច្រើនឆ្នាំមកនេះ ទោះបីគ្មានឪពុកម្តាយនៅក្បែរក៏ដោយ ប៉ុន្តែប្អូនធី មានយាយតាគិតគូរដល់ការរៀនសូត្រ។ ប្អូនធី រៀបរាប់៖ “ជារៀងរាល់ខែ ឪពុកម្តាយតែងផ្ញើប្រាក់ឱ្យរៀនសូត្រនិងទូរស័ព្ទសួរសុខទុក្ខ លើកទឹកចិត្តប្អូនឱ្យខិតខំរៀនសូត្រ។ ឪពុកម្តាយធ្វើកម្មករនឿយហត់ណាស់ ម៉្លោះហើយ មានបំណងចង់ឱ្យប្អូនរៀនមហាវិទ្យាល័យដើម្បីមានអនាគតល្អ”។ ជាមួយនឹងការលើកទឹកចិត្តរបស់គ្រួសារនិងការជំនួយពីលោកគ្រូអ្នកគ្រូនិងមិត្តភក្តិ ប្អូនធី កាន់តែមានភាពជឿជាក់និងកម្លាំងចិត្តដើម្បីរៀនសូត្របានល្អ។ មិនធ្វើឱ្យគ្រួសារអស់សង្ឃឹម ក្នុងរយៈពេល ១១ ឆ្នាំបន្តបន្ទាប់ ប្អូនធីជាសិស្សសម្រេចនិទ្ទេសបង្គួរនិងពូកែ បានមិត្តភក្តិនិងលោកគ្រូអ្នកគ្រូអាណិតស្រឡាញ់។ មធ្យមភាគវិញ្ញាសាដែលប្អូនសម្រេចបានគឺពិន្ទុចាប់ពី ៨.០ ឡើងទៅ។ និយាយពីវិធីសាស្ត្ររៀនសូត្រ ប្អូនឱ្យដឹង៖ “មុនពេលចូលថ្នាក់ ប្អូនមើលមេរៀនជាមុន ដូច្នេះ នៅពេលគ្រូពន្យល់មេរៀនគឺចាំបានយូរ។ ចំណុចណាមិនទាន់យល់ ប្អូនសួរលោកគ្រូអ្នកគ្រូ ឬក៏ប្តូរយោបល់នឹងមិត្តភក្តិក្នុងក្រុម។ ត្រឡប់មកបន្ទប់ ប្អូនធ្វើលំហាត់ក្នុងសៀវភៅទាំងអស់ ដើម្បីបង្កើនចំណេះដឹង។ ក្រៅពីនេះ ប្អូននៅទាំងខ្ចីសៀវភៅនៅបណ្ណាល័យ បើកប្រព័ន្ធអុីនធឺណិតស្រាវជ្រាវធ្វើលំហាត់កម្រិតខ្ពស់។ បច្ចុប្បន្ន ប្អូនកំពុងរៀនដើម្បីត្រៀមប្រឡង បញ្ចប់វិទ្យាល័យដូច្នេះ ក្រៅពីរៀនក្នុងថ្នាក់ ក្នុងម៉ោងរៀនខ្លួនឯង ប្អូនសាកសួរលោកគ្រូ អ្នកគ្រូណែនាំបន្ថែម”។

អ្នកគ្រូង៉ោធីលី គ្រូអចិន្ត្រៃយ៍ថ្នាក់ទី ១២C1 វាយតម្លៃ៖ “ប្អូនត្រឹងហ្វាងធី ចេះស្តាប់បង្គាប់ ចេះជម្នះនូវការលំបាកដើម្បីរៀនពូកែ។ ក្នុងម៉ោងរៀន ប្អូនតែងយកចិត្តទុកដាក់ស្តាប់លោកគ្រូអ្នកគ្រូពន្យល់និងត្រៀមបម្រុងមេរៀនមុនពេលចូលថ្នាក់។ ក្រៅពីនេះ ប្អូនគឺជាប្រធានថ្នាក់គំរូម្នាក់ ចេះគួរសមចំពោះលោកគ្រូអ្នកគ្រូ ជិតស្និទ្ធនឹងមិត្តភក្ដិ។ ចូលរួមយ៉ាងសកម្មរាល់ការចលនាដែលសម្ព័ន្ធយុវជនសាលាបំផុស។ ជាមួយស្មារតីជម្នះលំបាករៀនសូត្រ ខ្ញុំជឿជាក់ថា ប្អូននឹងអនុវត្តបំណងប្រាថ្នារបស់ខ្លួនបានជោគជ័យ”៕

លីធាន-លេងមី

ចែករំលែកអត្ថបទ

ពាក្យគន្លឹះ