សុខភាព - អប់រំ សុខភាព

23/03/2021 - 08:34

ការព្យាបាលជំងឺដោយការរាំកម្សាន្តនិងកំណាព្យកាព្យឃ្លោង

យោងតាមក្រុមអ្នកជំនាញផ្នែកខាងសុខភាព ការរាំកម្សាន្តនិងកំណាព្យកាព្យឃ្លោង មិនត្រឹមតែជាសកម្មភាពកម្សាន្តអារម្មណ៍ និងលម្ហែកាយប៉ុណ្ណោះទេ ថែមទាំងត្រូវបានប្រើប្រាស់ដូចជាវិធីសាស្រ្ត ព្យាបាលជំងឺ ជួយសម្រួលអារម្មណ៍ និងមានអត្ថប្រយោជន៍ជាច្រើនទៀតដោយមិននឹកស្មាន។

ការធ្វើចលនារាំកម្សាន្ត ជួយដល់អ្នកហាត់រាំងាយស្រួលក្នុងការបញ្ចេញចលនារាងកាយនិងអារម្មណ៍ជំនួយដល់ការព្យាបាលជំងឺ។

វិធីព្យាបាលដោយការរាំកម្សាន្ត/ការចលនា

វិធីព្យាបាលដោយការរាំកម្សាន្ត/ការចលនា មានមកក្នុងអំឡុងឆ្នាំ១៩៤០ ហើយត្រូវបានបង្កើតឡើងដោយលោកស្រី Marian Chace - ជាស្ថាបនិកមួយរូបក្នុងចំណោមស្ថាបនិកទាំងឡាយបង្កើតវិធីព្យាបាលដោយការរាំកម្សាន្តដ៏ទំនើបនេះ។ តាមសម្ព័ន្ធសមាគមវិធីព្យាបាល ដោយការរាំកម្សាន្តរបស់អាមេរិកវិធីព្យាបាលនេះ ជាទម្រង់ព្យាបាលបែបចិត្តសាស្រ្ត ដោយប្រើប្រាស់ការចលនារាងកាយនិងការរាំកម្សាន្ត ដើម្បីជំនួយសមត្ថភាពខួរក្បាល រំជួលចិត្ត និងការចលនានៃរាងកាយ។ ដោយសារជាវិធីព្យាបាលបែបសិល្បៈច្នៃប្រតិដ្ឋ វិធីព្យាបាលដោយការរាំកម្សាន្តនេះ មានការទំនាក់ទំនងនិង ការចលនានៃរាងកាយនិងការរំជួលចិត្តរបស់បុគ្គលម្នាក់ៗ ដើម្បីកែលម្អដល់សុខភាពរាងកាយនិងស្មារតីអ្នកជំងឺ។

និយាយរួម វិធីព្យាបាលដោយការរាំកម្សាន្តនេះ សមប្រកបដល់ការព្យាបាលជំងឺចំពោះមនុស្សគ្រប់វ័យ តាំងពីក្មេងតូចរហូតដល់មនុស្សចាស់។ វិធីព្យាបាលនេះ មានអត្ថប្រយោជន៍ដល់អ្នកដែលមានរោគសញ្ញាខាងរាងកាយ និងផ្លូវចិត្តអូសបន្លាយ រួមទាំងអាការៈធ្លាក់ទឹកចិត្ត វិបត្តិនៃការហូបចុកអាការៈនៃភាពរវើរវាយ ឈឺរុាំរ៉ៃជំងឺ Parkinson អាការៈវិបត្តិចុះខ្សោយចងចាំ។ តាមរយៈក្រុមអ្នកសិក្សាស្រាវជ្រាវ ការចលនារាងកាយដើម្បីជួយបង្កើនការគ្រប់គ្រងអារម្មណ៍រំជើបរំជួល និងគ្រប់គ្រងស្មារតីនៃអ្នកជំងឺ។ តាមការសិក្សាស្រាវជ្រាវមួយចំនួនបានបង្ហាញថា ការធ្វើសកម្មភាព ចលនារាងកាយមានការរាំកម្សាន្តជាដើម បានជួយដល់មនុស្សគ្រប់គ្នាមានភាពងាយស្រួលបញ្ចេញអារម្មណ៍អាក់អន់ ការខឹងសម្បារការសប្បាយចិត្តខ្លាំងនិងការព្រួយបារម្ភ។ ទន្ទឹមនឹងនោះ ជួយបង្កើតគំនិតច្នៃប្រតិដ្ឋ កែលម្អកាយសម្បទា កាត់បន្ថយភាពតានតឹងនិងគ្រប់គ្រងអារម្មណ៍បានកាន់តែល្អ។ វិធីព្យាបាលនេះ ថែមទាំងមានអត្ថប្រយោជន៍យ៉ាងច្រើនសម្រាប់កាយសម្បទា ដូចជាការកែលម្អឱ្យមានតុល្យភាពរវាងបរិមាណរាងកាយនិងជាតិខ្លាញ់ក្នុងរាងកាយ បង្កើនកម្លាំងសាច់ដុំ លទ្ធភាពនៃការរក្សាលំនឹង និងការសហការចលនា កាត់បន្ថយហានិភ័យនៃជំងឺបេះដូង។

វិធីព្យាបាលដោយកំណាព្យកាព្យឃ្លោង

នេះជាទម្រង់នៃការព្យាបាលដោយការប្រើប្រាស់អត្ថបទកំណាព្យ រឿងនិទាន ចម្រៀងរូបភាព និងការប្រៀបធៀបដើម្បីលើកកម្ពស់ការរីកចម្រើននិងព្យាបាលជំងឺដល់មនុស្សគ្រប់គ្នា ជួយប្រតិកម្មដល់ការព្យាបាលជំងឺ ប្រហាក់ប្រហែលនឹងវិធីព្យាបាលបែបសិល្បៈ និងវិធីព្យាបាលបែបតូរ្យតន្រ្តី។

របៀបដំណើរការនៃការព្យាបាលដោយវិធីសាស្រ្តនេះ មានលក្ខណៈខុសៗគ្នា ទៅតាមទិសដៅនៃការព្យាបាលរបស់អ្នកជំងឺ។ តាមធម្មតា អ្នកព្យាបាលតែងត្រៀមបម្រុងនូវអត្ថបទកំណាព្យមួយចំនួនសម្រាប់អានឱ្យឮៗ ឬសំណូមពរឱ្យអ្នកជំងឺអានឮៗ រួចហើយក៏វាយតម្លៃពីការប្រតិកម្មរបស់អ្នកនោះ។ តាមសាស្រ្តាចារ្យ Nicholas Mazza - ស្ថាបនិកទស្សនាវដ្ដី ស្ដីពីវិធីព្យាបាលដោយកំណាព្យកាព្យឃ្លោង ដំណាក់កាលនេះគឺលើកទឹកចិត្តអ្នកជំងឺបង្ហាញពីអារម្មណ៍ខ្លួនឯង និងបញ្ជាក់ពីការរំជួលចិត្តរបស់ខ្លួន។ វិធីព្យាបាលដោយកំណាព្យកាព្យឃ្លោង ត្រូវបានបញ្ជាក់យ៉ាងច្បាស់ថា នឹងនាំមកនូវអត្ថប្រយោជន៍សម្រាប់សុខភាពផ្លូវចិត្ត ដូចជា កាត់បន្ថយអាការៈធ្លាក់ទឹកចិត្ត លើកកម្ពស់ការឱ្យតម្លៃខ្លួនឯងនិងយល់កាន់តែច្បាស់អំពីខ្លួនឯង ដោះស្រាយនូវហេតុការណ៍ឈឺចាប់កន្លងមកបានល្អ ប្រឈមមុខនឹងបទពិសោធន៍អវិជ្ជមាន កែលម្អបំណិនសង្គមនិងជំរុញដំណាក់កាលត្រិះរិះពិចារណកាន់តែល្អប្រសើរ៕

 អាងញៀង (ប្រភព៖ INSIDER)-ពេជ្រសឿន 

ចែករំលែកអត្ថបទ

ពាក្យគន្លឹះ