គោលនយោបាយ -ការរស់នៅ គោលនយោបាយ

17/07/2018 - 09:20

បរិច្ចាគដីធ្វើផ្លូវ

ប្រជាជននៅតាមបណ្ដោយផ្លូវដុងកាយតាវ ស្រុកអ៊ូមិញ ខេត្តកាម៉ាវ បានស្ម័គ្រចិត្តបរិច្ចាគដី ដំណាំឈើហូបផ្លែ ដើម្បីជួសជុលបង្កើនកម្រិតផ្លូវគមនាគមន៍ដែលមានប្រវែង១០គីឡូម៉ែត្រ ទទឹង២,៥ម៉ែត្រ។

គ្រួសារប្រជាជនជាច្រើននៅតាមបណ្ដោយផ្លូវដុងកាយតាវ ឃុំង្វៀនភិចចាប់ពី
ប្រឡាយហាយគាង រហូតទៅទល់នឹងទីប្រជុំជនអ៊ូមិញ បរិច្ចាគដីធេី្វផ្លូវ។

អនុប្រធានគណៈកម្មាធិការប្រជាជនឃុំង្វៀនភិច-វ៉វ៉ាន់លីវ ឲ្យដឹងៈ ឆ្នាំ២០១៧ ដោយបានការចង្អុលការរបស់គណៈកម្មាធិការប្រជាជនស្រុកអ៊ូមិញ ឃុំបានសហការជាមួយនឹងការិយាល័យសេដ្ឋកិច្ច-មូលដ្ឋាន បើកកិច្ចប្រជុំផ្សព្វផ្សាយទូលំទូលាយក្នុងប្រជាជន អំពីទិសដៅ អត្ថន័យនៃការកសាងផ្លូវគមនាគមន៍ដុងកាយតាវចាប់ពីប្រឡាយហាយគាង រហូតទៅជាប់នឹងទីប្រជុំជនអ៊ូមិញ ដើម្បីប្រជាជនយល់និងចែករំលែកមួយចំណែករួមជាមួយនឹងរដ្ឋតាមគោលលំនាំ “រដ្ឋនិងប្រជាជនរួមគ្នាធ្វើ”។ តាមរយៈការផ្សព្វផ្សាយ គ្រួសារប្រជាជនទាំង១៥៧ព្រមព្រៀងស្ម័គ្រចិត្តបរិច្ចាគដី១៥០.០០០ម៉ែត្រការ៉េសម្រាប់ធ្វើផ្លូវ គិតជាតម្លៃទឹកប្រាក់រាប់ពាន់លានដុង។ បច្ចុប្បន្ន ការដ្ឋានកំពុងដំណើរការកសាងតាមការគ្រោងទុក ផ្លូវនេះសម្រេចរួចរាល់នឹងដាក់ឲ្យប្រើប្រាស់នៅចុងឆ្នាំ២០១៨នេះ។

ភូមិ៦ជាភូមិមានជនរួមជាតិខ្មែររស់នៅកុះកររបស់ឃុំង្វៀនភិច។ នៅពេលចលនាបរិច្ចាគដី មាមីងខ្មែរស្ម័គ្រចិត្តចូលរួម។ អ្នកមីងម៉ាយធីធ្វី នៅភូមិ៦ ឃុំង្វៀនភិច ចែករំលែក៖ “ជីវភាពគ្រួសារខ្ញុំនៅខ្វះខាត អាស្រ័យការចលនារបស់រដ្ឋអំណាចគ្រួសារខ្ញុំក៏បរិច្ចាគដីជាង៧៥ម៉ែត្រការ៉េ ដើម្បីរួមចំណែកធ្វើផ្លូវ”។ ចំណែកលោកផាមវ៉ាន់តា នៅភូមិជាមួយដែរបាន រ៉ាយរ៉ាប់៖ “ថ្វីបើសព្វថ្ងៃនេះ តម្លៃដីឡើងខ្ពស់ក៏ពិតមែនប៉ុន្តែដើម្បីរួមចំណែកជាមួយនឹងភូមិភាគអភិវឌ្ឍភូមិស្រុក គ្រួសារខ្ញុំស្ម័គ្រចិត្តបរិច្ចាគដី ទទឹង២ម៉ែត្រ បណ្ដោយជាង៩០ម៉ែត្រដើម្បីពង្រីកផ្លូវ ដោយមិនទាមទារកម្រៃអ្វីនោះទេ។ ដ្បិតថា ការកសាងផ្លូវគមនាគមន៍គឺបម្រើដល់ការធ្វើដំណើរទៅមករបស់ប្រជាជនក្នុងឃុំមានភាពងាយស្រួល ក្នុងនោះ ក៏មានគ្រួសាររបស់ផងខ្លួនដែរ”។

ដើមឆ្នាំ២០១៨ ឃុំខាញ់តៀង ក៏បានវិនិយោគទុនពីប្រភពថវិការដ្ឋ ដើម្បីពង្រីកផ្លូវប្រឡាយទីវយឿដល់ប៉ុស្តិ៍ការពារព្រំដែន ផ្ទៃផ្លូវទទឹងពី២,៥ម៉ែត្រដល់៣,៥ម៉ែត្រ និងបណ្ដោយជាង៤គីឡូម៉ែត្រ ដោយការបរិច្ចាគដីរបស់ប្រជាជនចំនួន៦៦គ្រួសារ។ លោកម៉ាយត្វឹងអាញ់ ប្រធានស្ដីទីនៃគណៈកម្មាធិការប្រជាជនឃុំខាញ់តៀង ឲ្យដឹង៖ “បន្ទាប់ពីមានគ្រោងការវិនិយោគទុនពង្រីកផ្លូវ គណៈកម្មាធិការប្រជាជនឃុំ បានចាត់ឲ្យផែ្នកនានា ផ្សព្វផ្សាយចលនាប្រជាជនបរិច្ចាគដីដើម្បីកសាងផ្លូវ។ ឆ្លងតាមរយៈការចលនា មាមីងស្ម័គ្រចិត្តចូលរួមគាំទ្រ។ ផ្ដើមពីការផ្ដុំកម្លាំងការព្រមព្រៀងរបស់ប្រជាជនមុខមាត់ជនបទកាន់តែស្រស់បស់ រួមចំណែកក្នុងការអនុវត្តសំដៅឆ្ពោះទៅកាន់គោលដៅឃុំជនបទថ្មីក្នុងឆ្នាំ២០១៨”។

អាស្រ័យមានការជឿជាក់ និងស្ម័គ្រចិត្តចូលរួមរបស់ប្រជាជន ជាកត្តាសំខាន់មួយក្នុងចំណោមកត្តាដ៏សំខាន់ដទៃទៀតដែលគណៈកម្មាធិការបក្ស រដ្ឋអំណាចគ្រប់លំដាប់ថ្នាក់ក្នុងស្រុកបានធ្វើ គឺជាការអនុវត្តបានល្អត្រឹមត្រូវតាមលក្ខណៈប្រជាធិបតេយ្យមូលដ្ឋាន ជាមួយនឹងគោលលំនាំ “ប្រជាជនដឹង ប្រជាជនពិភាក្សា ប្រជាជនធ្វើ ប្រជាជនត្រួតពិនិត្យ”។ ឆ្លងតាមរយៈនោះ ជួយប្រជាជនលើកកម្ពស់ការយល់ដឹង និងយល់បានពីអត្ថន័យ ខ្លឹមសារសំខាន់ៗនៃការងារដែលខ្លួនបានធ្វើ ផ្ដើមពីនោះ ខ្នះខ្នែងចូលរួមជាមួយនឹងភូមិភាគ ធ្វើឲ្យមុខមាត់ជនបទកាន់តែស្រស់បំព្រង៕

យោងតាមកាសែតកាម៉ាវ - ប្រែសម្រួលៈ ពេជ្រសឿន

ចែករំលែកអត្ថបទ

ពាក្យគន្លឹះ