គោលនយោបាយ -ការរស់នៅ ការរស់នៅ

30/03/2015 - 17:36

ប្រសិទ្ធភាពនៃការដាំឪឡឹកលើដីស្រែ

ក្រោយពីប្រមូលផលស្រូវរដូវប្រាំង ប្រជាជននៅឃុំអាងនិញ ស្រុងចូវថាញ់ ខេត្តសុកត្រាំង បានចាប់ផ្ដើមដាំឪឡឹក។ នេះជាទម្រង់រូបភាពមួយប្រកបដោយប្រសិទ្ធភាពសេដ្ឋកិច្ច ផ្ដល់នូវក្ដីរីករាយសម្រាប់កសិករខ្មែរ។ល។

កសិករដាំឪឡឹកលើដីស្រែកំពុងរីករាយពេលមានឈ្មួញចុះមកបោះ
ប្រាក់កក់ទិញដោយតម្លៃខ្ពស់។

ទម្រង់រូភាពនៃការដាំឪឡឹកលើដីស្រែ ជារបៀបបង្កើនប្រភពចំណូលសម្រាប់កសិករក្នុងរដូវប្រាំង។ ពិសេស គ្រួសារក្រីក្រទាំងឡាយមានខ្ទង់ចំណូលបង្គួរដោយពឹងទៅលើការជួលដីស្រែដើម្បីដាំឪឡឹក។ សព្វថ្ងៃឃុំអាងនិញ មានផ្ទៃដីដាំដំណាំក្នុងវាលស្រែជាង១៨៣ហិកតា ក្នុងនោះសំខាន់គឺដាំឪឡឹក។ ពីរឆ្នាំកន្លង បងយ័ញលឿន នៅភូមិភូនិញ ឃុំអាងនិញ ជាអ្នកជោគជ័យបំផុតក្នុងការដាំឪឡឹកក្នុងវាលស្រែ។ បន្ទាប់ពីប្រមូលផលស្រូវរដូវប្រាំងរួចបងដាំឪឡឹកលើដីស្រែជាង២កុង។ បងលឿន មានប្រសាសន៍៖ "ដាំឪឡឹកលើវាលស្រែមិនពិបាកប៉ុន្មានទេ គឺគ្រាន់តែជីកចង្អូរសម្រាប់យកទឹកស្រោចស្រព។ បន្ទាប់ពីដាំបានជិត២ខែ ខ្ញុំប្រមូលផលឪឡឹកជាង២កុងនេះ ដោយទិន្នផលសម្រេចបានជាង១០តោន ថ្លៃលក់ពី៥.០០០-៦.០០០ដុង/គីឡូក្រាម។ ក្រោយពីទូទាត់ ខ្ញុំនៅចំណេញជាង៤៥លានដុង ខ្ពស់ជាងច្រើនដងបើប្រៀបនឹងការផលិតស្រូវ"។ បើតាមគ្រួសារទាំងឡាយដែលមានបទពិសោធន៍ក្នុងការដាំឪឡឹក ឲ្យដឹង៖ អាកាសធាតុកាន់តែក្ដៅ ឪឡឹកកាន់តែលូតលាស់ល្អ ហានិភ័យខាតបង់កាន់តែទាបប្រើប្រៀបនឹងការផលិតស្រូវ។ បងស្រីយ័ញធីហា នៅភូមិសាឡាង មានប្រសាសន៍៖" ឆ្នាំនេះខ្ញុំដាំឪឡឹក ពូជហាក់មីញ៉ឹង២កុង ចំណាយដើមទុនប្រមាណ៤លានដុង។ មធ្យមភាគក្នុងមួយកុងចំណេញប្រមាណ១៥លានដុង។ នេះជាឆ្នាំដំបូងហើយ ដែលខ្ញុំដាំឪឡឹកបានផលកាក់កបលក់បានថ្លៃ"។ បងយ័ញវ៉ៀក នៅភូមិសាឡាង បានឲ្យដឹងថា ដាំឪឡឹកមិនត្រឹមតែចំណេញច្រើនជាងការ ផលិតស្រូវរដូវទី៣ប៉ុណ្ណោះទេ ថែមទាំងរួមចំណែកក្នុងការកែប្រែដីសម្រាប់ផលិតស្រូវរដូវបន្ទាប់ទៀតផង។

បច្ចុប្បន្ន មិនទាន់ដល់ថ្ងៃប្រមូលផលឪឡឹកផង ឈ្មួញក៏ចុះដល់វាលស្រែដើម្បី"បោះប្រាក់កក់"ដោយតម្លៃពី៤.០០០-៥.០០០ដុង/គីឡូក្រាម (ទៅតាមប្រភេទឪឡឹក)។ ជាមួយនឹងតម្លៃដូច្នេះ ប្រសិនបើឪឡឹកបានផល អ្នកដាំក៏មានចំណេញដែរ។ លោកង៉ោអាញត្វឹង អនុប្រធានគណៈកម្មាធិការប្រជាជនឃុំអាងនិញ មានប្រសាសន៍៖ "ដាំឪឡឹកក្នុងវាលស្រែនាំមកនូវប្រសិទ្ធភាពសេដ្ឋកិច្ចខ្ពស់ ពីព្រោះចំណាយដើមទុនតិច ហានិភ័យខាតបង់ទាបប្រើប្រៀបនឹងការផលិតស្រូវរដូវទី៣។ រយៈពេល២ឆ្នាំមកអាយ ទម្រង់រូបភាពនេះត្រូវបានមាមីងអនុវត្តពីមួយថ្ងៃទៅមួយថ្ងៃកាន់តែច្រើនឡើង។ ជាមធ្យមដាំឪឡឹកក្នុងមួយកុង កសិករចំណេញពី៦លានដល់១៥លានដុង។

នេះគឺជាទម្រង់រូបភាពជួយមាមីងក្រីក្រ បង្កើនប្រាក់ចំណូលក្នុងរដូវប្រាំង ដើម្បីកែលម្អជីវភាព។ ផ្ដើមពីទម្រង់រូបភាពនេះ បានជួយឲ្យគ្រួសារជាច្រើនឈានឡើងចាកផុតពីភាពក្រីក្រ"៕

យ្វីអាញ់-ពេជ្រសឿន

ចែករំលែកអត្ថបទ

ពាក្យគន្លឹះ