ព្រឹត្តិការណ៍ - នយោបាយ ព្រឹត្តិការណ៍

12/11/2026 - 20:32

ឃុំលីវទូ បូកសរុបបណ្ដោះអាសន្នយុទ្ធនាការ "៦០ ថ្ងៃចេញដំណើរធ្វើឧត្តានកម្មបំណិនឌីជីថលជូនប្រជាជន"

នារសៀលថ្ងៃទី១២ ខែវិច្ឆិកា គណៈកម្មាធិការប្រជាជនឃុំលីវទូ ទីក្រុងកឹងធើ បានចាត់តាំងសន្និសីទបូកសរុបបណ្ដោះអាសន្នលទ្ធផលនៃការអនុវត្តយុទ្ធនាការ "៦០ ថ្ងៃចេញដំណើរទៅគ្រប់ច្រកល្ហក គ្រប់គេហដ្ឋាន ណែនាំប្រជាជនម្នាក់ៗអំពីបំណិនឌីជីថល និងការប្រើប្រាស់សេវាកម្មឌីជីថល" ដើម្បីចូលរួមអបអរសាទរទិវាផ្លាស់ប្ដូរឌីជីថលជាតិ ឆ្នាំ២០២៦ លើភូមិឋានឃុំ។

ទិដ្ឋភាពនៃអង្គសន្និសីទ។

យុទ្ធនាការនេះបានអនុវត្តចាប់ពីថ្ងៃទី១០ ខែតុលា រហូតដល់ថ្ងៃទី៨ ខែធ្នូ ឆ្នាំ២០២៦ ក្នុងគោលបំណងនាំយកបច្ចេកវិទ្យាបង្ខិតជិតប្រជាជន ជួយឱ្យមាមីងមានទំនុកចិត្តក្នុងការប្រើប្រាស់សេវាកម្មឌីជីថលចាំបាច់ក្នុងជីវភាពរស់នៅនិងការផលិត។ នេះគឺជាសកម្មភាពជាក់ស្តែងក្នុងការអនុវត្តសេចក្តីសម្រេចចិត្តលេខ ៥៧-NQ/TW របស់ការិយាល័យនយោបាយ ស្តីពីការជំរុញការអភិវឌ្ឍវិទ្យាសាស្ត្រ បច្ចេកវិទ្យា ផ្លាស់ថ្មីច្នៃប្រតិដ្ឋ និងការផ្លាស់ប្ដូរឌីជីថលជាតិ ព្រមទាំងផែនការចង្អុលការរបស់គណៈកម្មាធិការប្រជាជនទីក្រុងកឹងធើ។

ថ្នាក់ដឹកនាំឃុំលីវទូ និងតំណាងស្ថាប័ន អង្គភាព ក្រុមបច្ចេកវិទ្យាឌីជីថលសហគមន៍ទាំង ៨ ភូមិចូលរួមសន្និសីទ។

ជាមួយទិសស្លោក "កាន់ដៃបង្គាប់ការ និងបង្ហាញគំរូជាក់ស្តែងតាមជំហាននីមួយៗ" ឃុំលីវទូបានចាត់ចែងសុក្រឹតក្រុមបច្ចេកវិទ្យាឌីជីថលសហគមន៍ចំនួន ៨ ក្រុម នៅតាមភូមិទាំង ៨ ដោយមានសមាជិកស្នូលសរុប ៧២ នាក់ ជាយុវជន សមាជិកសមាគមនារី សមាជិកសមាគមកសិករនិងកងកម្លាំងនគរបាលមូលដ្ឋាន។ ភូមិភាគក៏បានចាត់ចែងថវិកា ៣៩០ លានដុង សម្រាប់សកម្មភាពផ្លាស់ប្ដូរ ឌីជីថល និងអនុវត្តកម្រិតឧបត្ថម្ភ ១,៥ លានដុងក្រុមនីមួយៗក្នុងមួយខែ តាមសេចក្តីសម្រេចចិត្តលេខ ២០/២០២៦/NQ-HĐND របស់ក្រុមប្រឹក្សាប្រជាជនទីក្រុងកឹងធើ។ គិតត្រឹមថ្ងៃទី១១ ខែវិច្ឆិកា ក្រោយពីអនុវត្តបានជិតមួយខែ ក្រុមបច្ចេកវិទ្យាឌីជីថលសហគមន៍បានចលនាប្រជាជន ១.៤៧៨ នាក់ចូលរួមក្រុម Zalo នៅបណ្តាភូមិ មានអ្នកចាប់អារម្មណ៍លើគណនី Zalo OA "មនោសញ្ចេតនាលីវទូ" ១.១៧៣ លើកនាក់ ដំឡើងកម្មវិធី Can Tho Smart ជូនប្រជាជន ១.៣៣៩ លើកនាក់ បង្កើនចំនួនអ្នកតាមដានទំព័រ Fanpage របស់ឃុំឡើងដល់ ៣.២៦៤ នាក់។ ចំណែកនៅលើវេទិកា "ប្រជាសិក្សាឌីជីថល" កងកម្លាំងនគរបាលឃុំសម្រេចអត្រា ១០០% កម្មាភិបាល បក្ខជន បានបញ្ចប់វគ្គសិក្សា។

ថ្លែងក្នុងសន្និសីទ លោកស្រីវ៉ធីញ៉ី អនុប្រធានគណៈកម្មាធិការប្រជាជនឃុំលីវទូ បានកំណត់ទិសដៅ រហូតដល់ថ្ងៃទី៨ ខែធ្នូ ឆ្នាំ២០២៦ ឃុំនឹងបន្តជំរុញលើកទឹកចិត្តដើម្បីឱ្យកម្មាភិបាល បុគ្គលិក អ្នករដ្ឋការ និងសមាជិកក្រុមបច្ចេកវិទ្យាឌីជីថលសហគមន៍ទាំង ៨ ក្រុម ដើម្បីបញ្ចប់វគ្គសិក្សានៅលើវេទិកា "ប្រជាសិក្សាឌីជីថល" ក្នុងខែវិច្ឆិកា ឆ្នាំ២០២៦។ ទន្ទឹមនឹងនោះ លោកស្រីបានចង្អុលការដល់នគរបាលឃុំ សហការជាមួយអង្គការនយោបាយ - សង្គមនានា ជំរុញការណែនាំប្រជាជនឱ្យប្រើប្រាស់កម្មវិធី VNeID បញ្ចូលប័ណ្ណធានារ៉ាប់រងសុខាភិបាល សៀវភៅសុខភាពអេឡិចត្រូនិក និងអនុវត្តការទូទាត់ប្រាក់ឧបត្ថម្ភសុខុមាលភាពសង្គមដោយមិនប្រើសាច់ប្រាក់។ ភូមិភាគក៏ពន្លឿនការសហការអនុវត្តទម្រង់ "ផ្សារ ៤.០" ឬ "ដងផ្លូវទូរទាត់មិនប្រើសាច់ប្រាក់" ដើម្បីរួមចំណែកនាំយកប្រយោជន៍នៃឌីជីថលឱ្យកាន់តែខិតជិតប្រជាជន៕

ហុងទើ - ពេជ្រសឿន

ចែករំលែកអត្ថបទ

ពាក្យគន្លឹះ