សន្តិសុខ - ការពារប្រទេស ការពារប្រទេស

24/06/2026 - 14:40

កងទ័ពការពារព្រំដែនទីក្រុងកឹងធើ អនុវត្តល្អភារកិច្ចគ្រប់គ្រង ការពារអធិបតេយ្យភាព និងសន្តិសុខព្រំដែនសមុទ្រ

នារសៀលថ្ងៃទី២៣ ខែមិថុនា គណៈបញ្ជាការកងទ័ពការពារព្រំដែនទីក្រុងកឹងធើ បានចាត់តាំងសន្និបាតបូកសរុបបណ្ដោះអាសន្នលទ្ធផលការងារការពារព្រំដែន និងការកសាងកងកម្លាំងក្នុងរយៈពេល ៦ ខែដើមឆ្នាំ២០២៦។

ក្នុងរយៈពេល៦ខែដើមឆ្នាំ២០២៦ គណៈកម្មាធិការបក្ស គណៈបញ្ជាការកងទ័ពការពារព្រំដែនទីក្រុងកឹងធើ បានជ្រួតជ្រាបនិងអនុវត្តយ៉ាងម៉ឺងម៉ាត់នូវបណ្តាសេចក្តីសម្រេចចិត្ត សេចក្តីណែនាំ និងបទបញ្ជារបស់ថ្នាក់លើ ព្រមទាំងម្ចាស់ការធ្វើសេនាធិការជូនគណៈកម្មាធិការបក្ស និងរដ្ឋអំណាចភូមិភាគក្នុងការដឹកនាំ ចង្អុលការ និងអនុវត្តប្រកបដោយប្រសិទ្ធភាពនូវភារកិច្ចគ្រប់គ្រង ការពារអធិបតេយ្យភាព សន្តិសុខតំបន់ព្រំដែនសមុទ្រ ព្រមទាំងកសាងកងកម្លាំងរឹងមាំគ្រប់ជ្រុងជ្រោយ អនុវត្តបានល្អនូវរាល់ភារកិច្ចដែលបានប្រគល់ជូន។

ពិធីចុះហត្ថលេខាលើផែនការសហការអនុវត្តកម្មវិធី “រួមដំណើរជាមួយនារីតំបន់ព្រំដែន” ដំណាក់កាល ២០២៦ – ២០៣០។

លេចធ្លោ គឺកងទ័ពការពារព្រំដែនទីក្រុងបានអនុវត្តល្អការងារដើរល្បាតនិងត្រួតពិនិត្យ ក្នុងរយៈពេល ៦ខែដើមឆ្នាំ បណ្តាអង្គភាពបានសហការដើរល្បាតចំនួន ៣៦៩លើក ដោយមានកម្មាភិបាល និងយុទ្ធជនចូលរួមចំនួន ២.៧៣៦លើកនាក់ លើចម្ងាយផ្លូវជាង ១៣.៤០០គីឡូម៉ែត្រ ទាំងនៅលើសមុទ្រនិងលើដីគោក។ អង្គភាពក៏បានសហការសង្គ្រោះជោគជ័យ១ករណីគ្រោះថ្នាក់ ដោយមានសមាជិកនាវិកចំនួន ០៤នាក់ ដែលជួបគ្រោះថ្នាក់នៅលើសមុទ្រមកកាន់ច្រាំងដោយសុវត្ថិភាព។

ការងារប្រយុទ្ធប្រឆាំងនិងបង្ក្រាបបទល្មើស បន្តបានអនុវត្តយ៉ាងមានប្រសិទ្ធភាព។ ក្នុងរយៈពេល ៦ខែដើមឆ្នាំ កងទ័ពការពារព្រំដែនទីក្រុងបានរកឃើញ ឃាត់ខ្លួន និងចាត់វិធានការលើករណីល្មើសច្បាប់ចំនួន ៣១ករណី ដែលមានជនល្មើសចំនួន ៨០នាក់។ ក្នុងនោះ បានកសាងសំណុំរឿងចោទប្រកាន់ និងស៊ើបអង្កេតដំបូងចំនួន ០៦ករណី មានជនសង្ស័យ ០៧នាក់ ពីបទរក្សាទុក និងដឹកជញ្ជូនសារធាតុញៀនខុសច្បាប់ ដោយដកហូតបានវត្ថុតាងម៉េតំហ្វេតាមីន ទម្ងន់ ១៣,៥៣៦៥ក្រាម។ ជាមួយគ្នានេះដែរ បានសហការបង្ក្រាបជោគជ័យមួយករណីពិសេស លេខ A១២៦p ពីបទល្មើសជួញដូរមនុស្ស ដោយបានចោទប្រកាន់ ០១ករណី មានជនសង្ស័យ ០៥នាក់ និងសង្គ្រោះអ្នករងគ្រោះបានចំនួន ០២នាក់ ព្រមទាំងបានពិន័យរដ្ឋបាលចំនួន ២៤ករណី មានជនល្មើស ៦៨នាក់ ដោយទឹកប្រាក់សរុបជាង ២២១លានដុង... តាមនោះ រួមចំណែករក្សាសន្តិសុខនយោបាយ សណ្តាប់ធ្នាប់និងសុវត្ថិភាពសង្គម នៅក្នុងតំបន់ព្រំដែនសមុទ្រ។

សមមិត្ត ង្វៀងហុងហា អនុប្រធានគណៈឃោសនាអប់រំនិងចលនានៃគណៈកម្មាធិការបក្សទីក្រុង បានប្រគល់ប័ណ្ណសរសើររបស់គណៈកម្មាធិការប្រជាជនទីក្រុងកឹងធើ ជូនដល់បណ្តាសមូហភាពនិងបុគ្គល។

ទន្ទឹមនឹងនោះ បណ្តាកម្មវិធីសុខុមាលភាពសង្គម និងគិតគូរដល់ជីវភាពរបស់ប្រជាជននៅតំបន់ព្រំដែនសមុទ្រ បន្តបានអនុវត្តយ៉ាងទូលំទូលាយនិងមានប្រសិទ្ធភាព។ តាមរយៈបណ្តាកម្មវិធីដូចជា "បុណ្យចូលឆ្នាំថ្មីការពារព្រំដែន- កក់ក្តៅទឹកចិត្តប្រជាជនភូមិស្រុក", "ទិវាបុណ្យការពារព្រំដែនទូទាំងប្រជាជន", "ខែមីនាព្រំដែន", "ស្តង់ទំនិញតម្លៃសូន្យដុង" បណ្តាអង្គភាពបានចាត់តាំងពិនិត្យព្យាបាលជំងឺ និងចែកថ្នាំពេទ្យដោយឥតគិតថ្លៃជូនប្រជាជនជាង ២.៦៤០លើកនាក់ ប្រគល់ផ្ទះមហាសាមគ្គីចំនួន ៤៣ខ្នង កសាងសំណង់ផ្គត់ផ្គង់ទឹកស្អាតចំនួន ០១កន្លែង និងស្ពានគមនាគមន៍ជនបទចំនួន ០១កន្លែង ព្រមទាំងបានជូនអំណោយចំនួន ៧២១ចំណែក អាហារូបករណ៍ ១០១ចំណែក និងពូជពពែចំនួន ១០គូ ដល់បណ្តាគ្រួសារនិងសិស្សានុសិស្សដែលមានជីវភាពលំបាក ដោយទឹកប្រាក់សរុបជាង ៤ពាន់លានដុង។

ជាមួយនឹងស្នាដៃដែលសម្រេចបាន មានសមូហភាពនិងបុគ្គលជាច្រើននៃកងទ័ពការពារព្រំដែនទីក្រុង បានថ្នាក់លើស្ងើចសរសើរនិងជូនរង្វាន់។ ក្នុងនោះ ប្រធានរដ្ឋបានប្រទានគ្រឿងឥស្សរិយយសយុទ្ធជ័យលេខពីរ ដល់សមូហភាពចំនួន ០១ និងបុគ្គល ០១រូប សមូហភាពចំនួន ៣៥ និងបុគ្គលចំនួន ៨១រូប បានអគ្គមេបញ្ជាការកងទ័ពការពារព្រំដែន និងគណៈកម្មាធិការប្រជាជនទីក្រុង ជូនប័ណ្ណសរសើរ ព្រមទាំងជូនរង្វាន់លើកទឹកចិត្តផ្សេងៗជាច្រើនទៀត។

នៅក្នុងសន្និបាតនេះ គណៈបញ្ជាការកងទ័ពការពារព្រំដែនទីក្រុងកឹងធើ និងសមាគមសហពន្ធនារីទីក្រុង បានចុះហត្ថលេខាលើផែនការសហការអនុវត្តកម្មវិធី "រួមដំណើរជាមួយនារីតំបន់ព្រំដែន" ដំណាក់កាល ២០២៦ - ២០៣០។

ក្នុងឱកាសនេះដែរ អគ្គមេបញ្ជាការកងទ័ពការពារព្រំដែន បានជូនប័ណ្ណសរសើរដល់សមូហភាពចំនួន ០១ និងបុគ្គលចំនួន ០២រូប ដែលមានស្នាដៃឆ្នើមក្នុងការប្រយុទ្ធប្រឆាំងនឹងបទល្មើសជួញដូរមនុស្ស គណៈកម្មាធិការប្រជាជនទីក្រុងកឹងធើ បានជូនប័ណ្ណសរសើរដល់សមូហភាពចំនួន ០៤ និងបុគ្គលចំនួន ១០រូប ដែលមានស្នាដៃលេចធ្លោក្នុងការអនុវត្តគ្រោងការឃោសនានិងផ្សព្វផ្សាយច្បាប់ស្តីពីការការពារព្រំដែនវៀតណាម ដំណាក់កាល ២០២១ - ២០២៥ និងគណៈបញ្ជាការកងទ័ពការពារព្រំដែនទីក្រុង បានជូនលិខិតសរសើរដល់សមូហភាពចំនួន ០១ និងបុគ្គលចំនួន ០២រូប ដែលមានស្នាដៃឆ្នើមក្នុងការប្រយុទ្ធប្រឆាំងនឹងបទល្មើសគ្រឿងញៀន និងបទល្មើសផ្សេងៗ៕

យ៉ីអាញ - សុផន

ចែករំលែកអត្ថបទ

ពាក្យគន្លឹះ