ព្រឹត្តិការណ៍ - នយោបាយ ព្រឹត្តិការណ៍

11/06/2026 - 22:46

ខេត្តកាម៉ាវផ្សព្វផ្សាយផែនការយកសំណាកអដ្ឋិធាតុយុទ្ធជនពលី

ថ្ងៃទី ១១ ខែមិថុនា គណៈចង្អុលការស្វែងរក ប្រមូល និងកំណត់ឈ្មោះអដ្ឋិធាតុយុទ្ធជនពលី ខេត្តកាម៉ាវបានចាត់តាំងសន្និសីទផ្សព្វផ្សាយភារកិច្ចយកសំណាក ការប្រគល់ និងធ្វើឌីជីថលសំណាកអដ្ឋិធាតុយុទ្ធជនពលីនៅលើភូមិឋានខេត្ត។

នៅក្នុងសន្និសីទ តំណាងទាំងឡាយបានផ្សព្វផ្សាយពីផែនការអនុវត្តការងារយកសំណាកនិងប្រគល់អដ្ឋិធាតុយុទ្ធជនពលី។ ទន្ទឹមនឹងនោះ ឯកភាពបណ្តាខ្លឹមសារ វិធានការនានាក្នុងការប្រមូលផ្តុំ និងការកំណត់ឈ្មោះអដ្ឋិធាតុយុទ្ធជនពលីនៅក្នុងខេត្ត។ ផ្អែកតាមសេចក្តីសម្រេចរបស់គណៈចង្អុលការស្វែងរក ប្រមូលនិងកំណត់ឈ្មោះយុទ្ធជនពលី ខេត្តកាម៉ាវនឹងបង្កើតក្រុមការងារអន្តរផ្នែកមួយក្រុម និងក្រុមប្រមូលសំណាកចំនួន ០២ ក្រុម ដើម្បីអនុវត្តភារកិច្ចយកសំណាក ការប្រគល់ និងធ្វើឌីជីថលអដ្ឋិធាតុយុទ្ធជនពលី។

គណៈបញ្ជាការយោធាខេត្តកាម៉ាវ បានចុះពិនិត្យជាក់ស្តែងនៅទីបញ្ចុះសពយុទ្ធជនពលីឃុំត្រឹងវ៉ាន់ថើយ ដើម្បីត្រៀមលក្ខណៈអនុវត្តការងារយកសំណាក ការប្រគល់ និងធ្វើឌីជីថលអដ្ឋិធាតុយុទ្ធជនពលី។

ខេត្តកាម៉ាវនឹងធ្វើការយកសំណាក និងប្រគល់សំណាកអដ្ឋិធាតុយុទ្ធជនពលីចំពោះផ្នូរចំនួន ២៦៣ ដែលមិនទាន់មានព័ត៌មានច្បាស់លាស់នៅទីបញ្ចុះសពយុទ្ធជនពលីឃុំត្រឹងវ៉ាន់ថើយ។ ពេលវេលាអនុវត្តការយកសំណាកគឺចាប់ពីថ្ងៃទី ១៥ ខែមិថុនា ដល់ថ្ងៃទី ១០ ខែកក្កដា។ ចាប់ពីថ្ងៃទី ១៩ ដល់ថ្ងៃទី ២៦ ខែមិថុនា នឹងរៀបចំការប្រគល់សំណាកលើកទី ១ និងដល់ថ្ងៃទី ៣ ខែកក្កដា នឹងរៀបចំការប្រគល់សំណាកលើកទី ២ ជូនស្ថាប័នមានសមត្ថកិច្ច ដើម្បីបម្រើឱ្យការងារពិនិត្យអង្កេត ADN កំណត់ឈ្មោញអដ្ឋិធាតុយុទ្ធជនពលី។

លោកវរសេនីយ៍ឯក ឡេក្វាងលឹក ស្នងការនយោបាយរងនៃគណៈបញ្ជាការយោធាខេត្តកាម៉ាវ បានសង្កត់ធ្ងន់៖ ការយកសំណាកដើម្បីកំណត់ឈ្មោះអដ្ឋិធាតុយុទ្ធជនពលី គឺជាភារកិច្ចមានអត្ថន័យដ៏សំខាន់ពិសេស រួមចំណែកឈានទៅរកការកំណត់ដឹងឈ្មោះបណ្តាយុទ្ធជនពលីដែលនៅខ្វះព័ត៌មាន ឆ្លើយតបទៅនឹងបំណងប្រាថ្នារបស់សាច់ញាតិយុទ្ធជនពលី ទន្ទឹមនឹងនោះ បង្ហាញយ៉ាងជ្រាលជ្រៅនូវសីលធម៌ “ផឹកទឹកនឹកប្រភព” បង្ហាញពីការទទួលខុសត្រូវ និងមនោសញ្ចេតនាដឹងគុណរបស់បក្ស រដ្ឋ កងទ័ព និងប្រជាជន ចំពោះបណ្តាវីរយុទ្ធជនពលី។ ហេតុនេះ សំណូមពរបណ្តាសមាជិកក្រុមការងារ និងបណ្តាស្ថាប័ន អង្គភាព លើកកម្ពស់ស្មារតីទទួលខុសត្រូវ បង្កើនកិច្ចសហការគ្នាយ៉ាងជិតស្និទ្ធក្នុងដំណើរការអនុវត្តភារកិច្ច។ ចាប់តាំងពីដំណាក់កាលយកសំណាក ការរក្សាទុក រហូតដល់ការធ្វើបច្ចុប្បន្នភាពព័ត៌មាន និងការប្រគល់សំណាកជីវសាស្ត្រ ត្រូវតែអនុវត្តម៉ឺងម៉ាត់តាមដំណើរការបច្ចេកទេស ធានាលក្ខណៈវិទ្យាសាស្ត្រ ច្បាស់លាស់ និងជាទីគោរពដ៏ខ្ពង់ខ្ពស់។

យោងតាមផែនការ ខេត្តកាម៉ាវនឹងធ្វើការយកសំណាកជីវសាស្ត្រចំពោះផ្នូរយុទ្ធជនពលីចំនួន ៣.៣៨២ ផ្នូរ ដែលមិនទាន់កំណត់បានព័ត៌មាន នៅតាមទីបញ្ចុះសពយុទ្ធជនពលីចំនួន ១១ កន្លែងនៅលើភូមិឋានខេត្ត ដើម្បីបម្រើឱ្យការងារពិនិត្យអង្កេត ADN។ ក្នុងនោះ មានទីបញ្ចុះសពចំនួន ០២ កន្លែងគ្រប់គ្រងដោយថ្នាក់ខេត្ត និងទីបញ្ចុះសពចំនួន ០៩ កន្លែងទៀតក្រោមការគ្រប់គ្រងរបស់ថ្នាក់ឃុំ និងសង្កាត់។ រយៈពេលអនុវត្តគឺចាប់ពីខែមិថុនា ឆ្នាំ ២០២៦ ដល់ដាច់ត្រីមាសទី ១ ឆ្នាំ ២០២៧៕

យ្វីអាញ - វ៉ាំងដុង - បកប្រែ៖ ថាច់ធី

ចែករំលែកអត្ថបទ

ពាក្យគន្លឹះ