គោលនយោបាយ -ការរស់នៅ គោលនយោបាយ

22/04/2026 - 08:14

អាទិភាពវិនិយោគអភិវឌ្ឍតំបន់ជនជាតិភាគតិច

ក្នុងសម័យប្រជុំលើកទី ៥១ គណៈកម្មាធិការអចិន្ត្រៃយ៍រដ្ឋសភា បានយល់ព្រមនឹងសំណើរបស់រដ្ឋាភិបាល អំពីគោលការណ៍រួមបញ្ចូល ៣ កម្មវិធីទិសដៅជាតិ (កសាងជនបទថ្មី បន្ថយភាពក្រីក្រដោយចីរភាព និងអភិវឌ្ឍន៍សេដ្ឋកិច្ច - សង្គមនៅតំបន់ជនជាតិភាគតិចនិងតំបន់ភ្នំ) អនុវត្តក្នុងដំណាក់កាល ២០២១-២០២៥ ទៅជាកម្មវិធីទិសដៅជាតិតែមួយ (ហៅកាត់ថា កម្មវិធី) អនុវត្តក្នុងដំណាក់កាល ២០២៦ - ២០៣៥។

ផ្លូវជនបទនៅតំបន់ជនរួមជាតិខ្មែរលើភូមិឋានទីក្រុងកឹងធើ បានចាក់បេតុងរួចរាល់។

ឆ្លងតាមរយៈនោះ កម្មវិធីរួមបញ្ចូលបានសំណើអនុវត្តលើវិសាលភាពទូទាំងប្រទេស ក្នុងអំឡុង ១០ ឆ្នាំ ចែកជា២ដំណាក់កាល៖ ២០២៦ - ២០៣០ និង ២០៣១ - ២០៣៥។ ប្រភពធនធានរបស់កម្មវិធីអនុវត្តដំណាក់កាល ២០២៦ - ២០៣០ ថវិកាគ្រោងទុក រួមមាន៖ ប្រភពទុនពីថវិកាមជ្ឈិមបែងចែកដោយផ្ទាល់ ១០០.០០០ ពាន់លានដុង; ប្រភពទុនរួមបញ្ចូលពីកម្មវិធី គម្រោងផ្សេងទៀត រួមជាមួយនឹងប្រភពទុនភូមិភាគនិងប្រភពទុនកៀរគរស្របច្បាប់ផ្សេងៗ ទៀតប្រមាណ ៣៦០.០០០ ពាន់លានដុង។

តាមប្រសាសន៍លោក ឡឹមហ្វាងម៉ូវ នាយកមន្ទីរជនជាតិនិងសាសនាទីក្រុងកឹងធើ ការរួមបញ្ចូល ៣ កម្មវិធីនេះមានសារៈសំខាន់ខ្លាំងណាស់ មិនធ្វើឱ្យគោលនយោបាយថយចុះនិងបង្រួមវិសាលភាពឧបត្ថម្ភនោះទេ ប៉ុន្តែបង្កលក្ខណៈប្រមូលផ្តុំនិងអាទិភាពជាងទៀតដល់តំបន់ជនជាតិភាគតិចនិងតំបន់ភ្នំក្នុងពេលខាងមុខ។ កម្មវិធីនេះ នឹងក្លាយជាសសរស្តម្ភដ៏សំខាន់ដើម្បីអនុវត្តយុទ្ធសាស្ត្រអភិវឌ្ឍដោយចីរភាពរបស់ប្រទេសជាតិនិយាយរួម ទីក្រុងកឹងធើនិយាយដោយឡែក សំដៅលើកកម្ពស់ជីវភាពប្រជាជន បង្រួមគម្លាតរវាងតំបន់នីមួយៗ និងកសាងជនបទថ្មី ទំនើប ស៊ីវិល័យ។

ដំណាក់កាល ២០២១ - ២០២៥ អនុវត្តកម្មវិធីទិសដៅជាតិអភិវឌ្ឍន៍សេដ្ឋកិច្ច - សង្គមនៅតំបន់ជនជាតិភាគតិចនិងតំបន់ភ្នំ ទីក្រុងកឹងធើ បានអនុវត្តជាមួយនឹងប្រភពទុនសរុបជាង ១.៥០០ ពាន់លានដុង។ មកដល់ពេលនេះ ឃុំទាំងអស់នៅតំបន់ជនជាតិភាគតិចមានផ្លូវកៅស៊ូ រថយន្ត បើកបរចូលដល់មជ្ឈមណ្ឌលឃុំ; ឃុំ សង្កាត់ទាំងអស់មានបណ្តាញអគ្គិសនីជាតិ; គ្រួសារជនជាតិភាគតិចមានអគ្គិសនីប្រើប្រាស់ជាង ៩៩,៨%; ហើយជនជាតិភាគតិចទាំងអស់បានកៀកជិតសេវាទូរគមនាគមន៍ព័ត៌មាននិងមធ្យោបាយសោតទស្សន៍បម្រើដល់ជីវភាពវប្បធម៌ស្មារតី។ល។ ប៉ាន់ស្មានមានប្រជាជនប្រមាណជាង ១២០.៦៣៧ នាក់ បានទទួលផលដោយផ្ទាល់ពីគម្រោង អនុគម្រោងចំណុះកម្មវិធីនេះ។

ក្តីរំពឹងទុកអំពីកម្មវិធីក្រោយពីរួមបញ្ចូល ព្រះតេជព្រះគុណ លីមិញឌឹក សមាជិករដ្ឋសភា នីតិកាលទី ១៦ អាណត្តិកាល ២០២៦-២០៣១ សមាជិកប្រចាំការក្រុមប្រឹក្សាភិបាលមជ្ឈិមសមាគមព្រះពុទ្ធសាសនាវៀតណាម អនុប្រធានប្រចាំការគណៈអភិបាលសមាគមព្រះពុទ្ធសាសនាវៀតណាមទីក្រុងកឹងធើ អនុប្រធានសមាគមព្រះសង្ឃសាមគ្គីស្នេហាជាតិទីក្រុងកឹងធើ ព្រះចៅអធិការវត្តសំរោង សង្កាត់សុកត្រាំង មានថេរដីកា៖ “ប្រសិទ្ធភាពក្រោយ៥ឆ្នាំអនុវត្តកម្មវិធីទិសដៅជាតិ បានជំរុញការអភិវឌ្ឍសេដ្ឋកិច្ច-សង្គម គ្រប់ជ្រុងជ្រោយនៅតំបន់ជនជាតិភាគតិច ជីវភាពសម្ភារៈនិងស្មារតីរបស់ជនជាតិភាគតិចនៅលើភូមិឋានទីក្រុងកឹងធើបានលើកកម្ពស់។ បំផុតគឺ សាលារៀន ដំណាក់សុខាភិបាល ផ្លូវជនបទ អគ្គិសនី... ត្រូវបានវិនិយោគ; តម្លៃវប្បធម៌ប្រពៃណីដ៏ផូរផង់របស់ជនរួមជាតិខ្មែរបានអភិរក្សនិងពង្រីក។ អាត្មាភាពជឿជាក់ថា កម្មវិធីក្រោយពីរួមបញ្ចូលនឹងបង្កើនប្រសិទ្ធភាពវិនិយោគបន្ថែមទៀត ពិសេសអាទិភាពប្រភពធនធានសម្រាប់តំបន់ជនជាតិភាគតិចនិងតំបន់ភ្នំ - កន្លែងដែលមានការលំបាកខ្លាំង អត្រាក្រីក្រខ្ពស់”៕

យ្វីអាញ-វិមាន

ចែករំលែកអត្ថបទ

ពាក្យគន្លឹះ