កីឡា - ទេសចរណ៍ កីឡា

27/02/2026 - 07:17

កីឡាការិនីយូដូជនជាតិខ្មែរពោរពេញដោយក្តីសង្ឃឹម

ផ្តើមចេញពីចំណង់ចំណូលចិត្ត សើុងធីរទ្ធា កីឡការិនីជនជាតិខ្មែរ កំណើតនៅសង្កាត់ង្វៀកហ្វា ខេត្តវិញឡុង បានតស៊ូព្យាយាមហាត់វិញ្ញាសាកីឡាយូដូ រហូតសម្រេចបានស្នាដៃគួរឱ្យមោទនៈជាច្រើនក្នុងការប្រកួតកីឡាទូទាំងប្រទេស និងក្លាយជាយុវវ័យពោរពេញដោយក្តីសង្ឃឹម សម្រាប់វិស័យកីឡានៅភូមិភាគ។

កីឡាការិនី សើុងធីរទ្ធា (រូបផ្ដល់ដោយសាមីខ្លួន)។

សើុងធីរទ្ធា កើតឆ្នាំ ២០០៨ ជាសិស្សថ្នាក់ទី ១២ នៃវិទ្យាល័យក្រុងត្រាវិញ (ចាស់) ដែលបច្ចុប្បន្នជាខេត្តវិញឡុង។ នាងធំដឹងក្តីក្នុងគ្រួសារខ្មែរ នៅអនុសង្កាត់ ១៥ (ពីមុន ជាភូមិសំរោង) សង្កាត់ង្វៀកហ្វា។ នៅឆ្នាំ ២០១៦ ពេលអាយុ ៨ ឆ្នាំ រទ្ធា បានចាប់ផ្តើមធ្វើការស្វែងយល់ពីវិញ្ញាសាកីឡាយូដូ ហើយបានបង្ហាញពីទេពកោសល្យ រហូតបានជ្រើសរើសចូលក្រុមយុវវ័យទេពកោសល្យនៃខេត្តត្រាវិញ (ចាស់)។ រំលឹកអំពីបុព្វហេតុដែលចាប់យកកីឡាយូដូ រទ្ធា ឱ្យដឹង៖ “ឃើញមិត្តភក្តិដែលមានវ័យស្របាល់គ្នាទៅហាត់យូដូ ខ្ញុំក៏មានចិត្តចង់ដឹងចង់ឃើញ ហើយក៏សាកល្បងហាត់តាម។ ដំបូងលំបាកណាស់ដែរ ព្រោះមិនទាន់យល់ដឹងអ្វីសោះអំពីវិញ្ញាសានេះ ប៉ុន្តែដោយសារការជក់ចិត្តនិងទទួលបានការណែនាំអស់ចិត្តចិត្តពីគ្រូបង្វឹក ធ្វើឱ្យខ្ញុំមានការរីកចម្រើនយ៉ាងរហ័ស”។

ក្នុងដំណើរការហ្វឹកហាត់ រទ្ធា តែងទទួលបានការយកចិត្តទុកដាក់និងគាំទ្រពេញទំហឹងអំពីសំណាក់គ្រួសារ។ បងស្រី ថាច់ធីសាថា ម្តាយរបស់រទ្ធា បានឱ្យដឹងថា គ្រួសារគ្រាន់តែប្រាថ្នាឱ្យកូនហាត់ប្រាណដើម្បីសុខភាពប៉ុណ្ណោះ ប៉ុន្តែនៅពេលឃើញកូនមានទេពកោសល្យ គ្រួសារតែងតែបង្កលក្ខណៈងាយស្រួលជូនទៅហាត់និងលើកទឹកចិត្តឱ្យកូនហ្វឹកហាត់ឱ្យបានទៀងទាត់។ មិនត្រឹមតែហ្វឹកហាត់កីឡាប៉ុណ្ណោះទេ រទ្ធាក៏រក្សាបានលទ្ធផលសិក្សាល្អបង្គួរ និងពូកែជាច្រើនឆ្នាំជាប់ៗគ្នា។

ដោយសារការខិតខំប្រឹងប្រែងមិនឈប់ឈរ រទ្ធា បានបញ្ជាក់ពីសមត្ថភាពរបស់ខ្លួនក្នុងព្រឹត្តិការណ៍ប្រកួតធំៗជាបន្តបន្ទាប់។ ជាច្រើនឆ្នាំជាប់ៗគ្នា នាងបានចូលរួមការប្រកួតកីឡាយូដូជើងឯក យុវវ័យក្នុងទូទាំងប្រទេស នៅទីក្រុងដាណាំង និងទីក្រុងហ្វេ ដោយដណ្ដើមបានមេដាយប្រាក់ ចំនួន ២គ្រឿង។ ពិសេស ក្នុងការប្រកួតកីឡាយូដូជើងឯកយុវវ័យទូទាំងប្រទេសឆ្នាំ ២០១៩ នៅខណ្ឌទូឌឹក (ទីក្រុងហូជីមិញ) រទ្ធា សម្រេចបានលទ្ធផលយ៉ាងឆ្នើម ដោយដណ្ដើមបានមេដាយមាស។ បន្ទាប់មកក្នុងការប្រកួតកីឡាយូដូជើងឯកយុវវ័យទូទាំងប្រទេសឆ្នាំ ២០២០ ក្នុងវិញ្ញាសាទម្ងន់ក្រោម ៣៦ គីឡូក្រាម រទ្ធា បានបង្ហាញនូវទេពកោសល្យដ៏ល្អ ហើយឈ្នះបានមេដាយមាសបន្ថែមទៀត បន្ទាប់ពីយកឈ្នះគូ ប្រកួតក្នុងរយៈពេលត្រឹមតែ៣០ វិនាទី ក្នុងវគ្គផ្តាច់ព្រ័ត្រ។ ក្នុងដំណាក់កាលឆ្នាំ ២០២៣ -២០២៤ នាងបន្តទទួលបានមេដាយសំរឹទ្ធនិងមេដាយប្រាក់ ក្នុងការប្រកួតកីឡា Kurash ជើង ឯកយុវវ័យទូទាំងប្រទេសលើកទី ១ ទោះបីជាវិញ្ញាសាថ្មីថ្មោង ប៉ុន្តែនាងនៅតែសម្របខ្លួននិងប្រកួតបានយ៉ាងល្អ។

តាមប្រសាសន៍លោក វឿងហ្វាងវឹង គ្រូបង្វឹកផ្ទាល់ បានឱ្យដឹងថា រទ្ធា គឺជាកីឡការិនីដែលមានស្មារតីវិន័យខ្ពស់ ឧស្សាហ៍ព្យាយាមហ្វឹកហាត់ និងជាកីឡាការិនីពោរពេញដោយក្តីសង្ឃឹម អាចលេចធ្លោនៅពេលអនាគត។ នៅឆ្នាំ ២០២៤ ប្អូនរទ្ធា បានជ្រើសរើសចូលក្រុមជម្រើសយុវវ័យរបស់ខេត្តវិញឡុង។ បច្ចុប្បន្ន រទ្ធា កំពុងត្រៀមខ្លួនសម្រាប់ការប្រឡងសញ្ញាបត្រមធ្យមសិក្សាទុតិយភូមិ និងមានបំណងចង់បន្តការសិក្សាផ្នែក គរុកោសល្យ ដើម្បីចាប់យកអាជីពគ្រូបង្រៀន ព្រមទាំងធ្វើឱ្យរីកសាយភាយក្ដីស្រឡាញ់ចំពោះវិស័យកីឡា ជាពិសេសគឺវិញ្ញាសាកីឡាយូដូ ឱ្យយុវវ័យជំនាន់ក្រោយ៕

ទីទុយ - ថាច់ធី

ចែករំលែកអត្ថបទ

ពាក្យគន្លឹះ